Wednesday, May 03, 2006

التخابر مع جهة أجنبية

- اقعد..

* .......

- انت بقى (...)..؟!

* أيوه

- ....... مش عيب واحد زيك عامل مثقف، وبيكتب وعامل فيها بيفهم، يغلط الغلطة دي..

* غلطة إيه حضرتك..؟!!

- إنت حتعمل عبيط...!!؟ (ابتسامة صفراء)

* مش عبيط ولا حاجة .. بس حضرتك بتتكلم عن إيه ..؟!

- إنت بتكتب في موقع "..." ، وجريدة "..." ، و.....

يا فتحي هات شاي

عايز تشرب حاجة ..؟!

* لأ .. شكرا

- بتاخد كام على الكتابة في الحتت دي ..؟!

* مفيش.. بس جريدة "..." اللندنية هي اللي بتدفعلي كل فترة .

- عندك حساب في بنك "...."..مش كده.؟؟!

ويوم 12/../ 2006 إنضاف لحسابك مبلغ قيمته (..)

* أيوه فعلا.. ده من الجريدة اللي بتعامل معاها .

- والله انت عبيط.. جريدة إيه يا ابني..؟! إنت بتستهبل ....... يعني إنت أساسا مش عارف الفلوس دي مصدرها إيه وقاعد قدامي زي الحمار..

يكون في علمك احنا عارفين تعاملتك جوا مصر وبراها.

تسمع عن تهمة التخابر مع جهة أجنبية، وتلقى أموال من الخارج ...!؟

* إزاي بس ...!!؟ يا فندم ده أجري عن الكتابة .

- أنت بتشتغل إيه ..؟!

*.......... (حالة خنقة)

- صايع ... أهلك صرفوا عليك دم قلبهم وإنت عامل فيها كاتب ...!؟

* (لا تعليق)

- مش عيب واحد متعلم زيك وعامل فيها مثقف، يقع في الفخ ده ... تاخد فلوس مش عارف مصدرها إيه ..!!؟

* يا فندم ده أجري، وأنا قلت لحضرتك إن الفلوس دي باعتاها ليا الجريدة.

- طيب... لحد ما تثبت بقى يا (...) ، حتتحجز .

* (حالة صمت وذهول)

- فتحي... ابعت الواد ده لــــ (..) ، وانده لي " فرج " .

4 comments:

ahmad said...

آااه .. بص .. عشان ما تتلخبطش بعد كده، أي حد بيبعتلك فلوس باليورو ، يبقى تخابر ، خليك في المصري ، و ياريت الأضمن ، يبقى مصري من الحكومة ، أبو حوافز و بدلات

Abdou Basha said...

منور البلوج يا احمد..

zordeak said...

هشتكنا وبشتكنا يا ريس
يا قارفنا ومطلع روحنا
يا بارك على كل طموحنا
خليتنا فى احلامنا نشيش

هشتكنا وبشتكنا يا ريس
فى سجونك سبعين مليون
وكلابك ميت شكل ولون
واللى يفكر يبقى نضيف
واللى يحاول يبقى كويس
يبقى اكيد إرهابى خطير
يتبهدل والـكـل يهيص
هشتكنا وبشتكنا يا ريس

وقالك ايه ..قالك آه
قالك شعب يحب بلاه
متبهدل من يوم رمسيس
وفى ايد الحكام بيبوس
وان واحد قالك هنثور
يبقى أكيد راجل مطيور
ويقولو سكران ومهيس
هشتكنا وبشتكنا يا ريس

وقالك ايه.. قالك اه
قالك دى بلدنا منهوبة
حتة بخمسة وخدلك طوبة
ولو عايز تشترى اهرامنا
ادفع اكتر يا ولداه

قالك ايه ..قالك اه
يا زعيمنا يا حاكمنا بعدلك
لو راجل تنزلى لوحدك
وميلاده ده هيبقى طهوره
وهخلى وشه فى قفاه

قالك ايه ..قالك اه
قالك دى بلدنا منصورة
خدنا اخر كاس فى الكورة
سيبك من اللى بيموتو يا عم
مالنا احنا ومال الغم

يا زعيمنا
يا كبيرنا
يا ريس
هشتكنا
وخلينا
نهيص

walaa said...

ياااااااااه ده احنا لسه بقى زي ما كنا بنشوف في افلام زمان وحكايات زمان ايام المحتل والظلم والاستبداد .. بس ان الظلم ده يجي مننا احنا لبعض دي تبقى كارثه .. بجد كلامك رعبني واحزنني لما لقيت ان ده موقف فعلي وحقيقي مش تمثيل ولا هزار .. انه يبقى الفرد متراقب في كل خطوة وشارده ووارده ده شيئ بصراحه مش عارفه اوصفه ازاي .. ربنا يكون في عون كتبابنا من اصحاب الضمائر الحية اذا وممن يعبرون عن رايهم محاولين بذلك القاء الضوء على الفساد في المجالات المختلفة .. دائما وابدا وعلى مر كل العصور كان استخدام منطق الحديد والنار في مواجهة كلمة حق تقال.. ولكن دائما وابدا ستظل كلمة الحق تابى الا ان تقال وسيظل الراي الحر .. الراي الحق المنطقي الواقعي الذي لا يهدف الى ضلال بقدر ما يهدف لتبيان الحق واقراره سيظل دائما وابدا هو الامل لعبور اشد الفترات ظلمة وسواد ..
اعانك الله ووفقك وحفظك من كل شر ومكروه وحفظ الوطن من كل شر يراد به