Thursday, August 10, 2006

اللمبي

قناة إل بي سي اللبنانية تذيع بالأمس فيلم اللمبي، علما بأن الأمس قد شهد إعلان أحد الوزراء الإسرائيليين أن القتال سيستمر لأكثر من شهر ضد حزب الله .. هل هناك علاقة بين اللمبي ونية إسرائيل للحرب..؟

**

إحدى مقولات اللمبي الخالدة في فيلم الناظر مع علاء ولي الدين تقول...

"ما دمت مش قد الأسد – أو العفريت مش فاكر – متسخنوش"

أو كما قال..

**

ربما كانت الإل بي سي تريد إذاعة هذا النص الشهير وأخطأت وأذاعت فيلم اللمبي بدلا من الناظر..؟ ربما..!؟

أشعر أن أجواء العبث تزداد مع الحروب .

**

في التلفزيون المصري الميمون

كانوا يذيعون في مثل تلك الأجواء فيلم صلاح الدين وأغاني فيروز والحلم العربي ..الخ

ده حسب الخطة الإعلامية التي يضعها الأستاذ ميمون

12 comments:

Captain L.J.Silver said...

Fe3lan elmawkef el 3ageeb men elqanawat el 3arbeya beyfakkarny be maqoola 7`aleda le 3ammo el lemby ..ala wa heya :

( HATE3MELHOMLY NELLY NELLY ...HA3MELHOMLAK SHARIHAN SHARIHAAAAN )

!!!!!!!!!!!!!!!!!!!!!!

Mohamed Mehrez said...

يا حاج عبده...كده انت بتضيع التراث وبتبوظ الدنيا
اسمها "اللي مبيعرفش يصرف جن بلاش يحضره" ...حرام عليكم يا مثقفين انتو...انتو اللي هتخربوا التراث الليمباوي

bluestone said...

اللي لفت نظري جدا في الكام يوم اللي فاتوا .. الاوبريت الخايب اللي عملوه عشان مساندة لبنان ..

الاوبريت اللي اتصور كليب وبيتذاع يوميا على ميلودي بيغني فيه مجموعة من نجوم الصف التاني وانصاف النجوم العرب والمصريين .. ومعاهم يسرا

ما ادهشني فعلا ان الكلمات المايعة للاغنية .. كلمات مش محددة ابدا زي ما يكونوا خايفين يتكلموا .. والكلام كله عن ان الليل بيعدي والنهار اقوي والورد اوقى من الدمار .. وكلام خايب كده ..

اللي عزز الفكرة اللي وصلتني تصوير الاغنية أو مشاهد الحرب والدمار اللي اضيفت للتصوير .. واغلبها من تفجيرات الاردن وشرم الشيخ ودهب ,,
اما الصور التي التقطت من لبنان لا تتعدى صورتين تلاتة ..

ولم افهم سر هذا الخنوع والتراجع والمياعة في المواقف حتى في حتة أغنية لا راحت ولا جت

Abdou Basha said...

كابتن سلفر
تقريبا هو القنوات عايزة تجدد فبترتجل
على فكرة فيلم الليمبي حظي معاه سيء حتى مكملتوش امبارح
:(

محمد محرز
فضحتني يا عم محرز بقى شكلي وحش كده
:)
أنا أصلي شفت الناظر من كذا سنة
وحتى مش عندي ع الكمبيوتر دلوقت
مع انه من المرجعيات الهامة :)

بلو ستون
تصدقي أنا شفت الأغنية النهارده بس
عارفة حسيت إيه ..؟
حسيت إنها قديمة
وبعدين لقيت فيها ناس جداد زي إيوان ووعد وغيرهم.
الظاهر إنها اتطلبت من العدل بسرعة .
بجد أنا حاسس إن اللحظة دي عبثية بطريقة غريبة ..

Tarek said...

يا سيدي هو الوليد بن طلال صاحب الإل بي سي ماله و مال لبنان أصلا ... ما تتحرق ... المهم الفلوووووووووووس

walaa said...

كتير بحس دلوقت من متابعة قنواتنا الفضائية الخارقه ان في كتير منهم بيغطوا الأحداث لمجرد انه يكون ليهم وجود في الصورة مش اكتر .. يعني تأدية واجب والسلام ..

وكله في سبيل رفعة قنواتنا الميمونه( على فكرة لؤطة وصفك ده)

اما اللمبي فانا كمان عمري ما كملته ولا مرة ..

Bella said...

هي فعلا ميمونة

الاغاني الموسمية سبوبة حلوة جدا وبتعمل شغل هايل

صحيح انا مرارتي لاتحتمل هذه الايام الفرجة على القنوات الفضائية الاخرى بخلاف الجزيرة لااتفرج هذه الفترة

لكن سبوبة المناسبات ذكرتني بموقف لايقل عبثية عن هذا الموقف مع الفارق الهائل بين الحدثين

تذكرت ايام مرض احمد ذكي وفي ايامه الاخيرة وكيف ان كل من سولت له نفسه ان يغني غني اغنية للتعبير عن مشاعره تجاه احمد ذكي

الحقيقة استغربت جدا الموضوع ليس للفكرة نفسها

ولكن استغرابي كان من الهوجة التي صاحبت مرض الرجل وكأن كل من دخل الفن من تحت عقب الباب اراد ان يكسب نقاط على حساب رجل طريح الفراش واستغلالا لشعبية احمد ذكي وحب الجماهير له

نفس الامر مع ذكرى سعاد حسني والموالد التي تنصب للبكاء على السندريلا

سبوبة واستغلال

نفس الامر مع الاغنية التي تحدثتم عنها ولو اني لم ارها ولكني متوقعة كيف يكون الامر في اغنية وطنية تغني فيها الست يسرا

ياللا

خللى الناس تسترزق

المهم الناس اللى فوق ماتنزعجش بمناظر الهدم والدمار وأشلاء الجثث في لبنان

علشان كده لازم يكون الكليب ماسخ زي المرقة المكعبات بالضبط

محمد أبو زيد said...

السؤال الحقيقي
إيه هو وجه الشبه بين اللمبي
والحكام العرب

Ahmed Shokeir said...

هما كانوا بيذيعوا اللمبي على الال بي سي

الناس دي عجيبة أوي

انا مش عارف إيه اللي جاب القلعة جنب البحر

sydalany-وش مكرمش said...

هههههههههه
كان المفروض يجيبوا عوكل أو الفيلم بتاع فاتن حمامة

"جدر البطاطا كان السبب يا ضنايا"

Me2 said...

أنا مضربة عن متابعة القنوات العربية ماعدا قناة اليوم ودي كمان مش دايما
و بكده أرتاح من وجع القلب

قلم جاف said...

وأنا زي مي2.. آخري الجزيرة الرياضية ودبي تي في علشان عيون البوندزليجا.. أخويا اللي مبطل كورة من زمان اتشد للماتش اللي كان يوم الجمعة بين بايرن ميونخ وبروسيا دورتموند .. الكورة مش ساحة كذب زي السياسة..

الزميلة بيلا : كتبت عن أغاني عبده حريقة بعد العدوان على لبنان بأربع أيام:
http://foorga.blogspot.com/2006/07/blog-post_16.html

من مأثورات اللمبي ، وهي مهداة للمعارضين والحكام والبيروقراط والمنظرين العرب على حد سواء :

الرجولة أدب مش هز كتاف..

أوعى يغرك جسمك..

المنحرفين الكمل!

إرغي يا عم الأمور!

وأخيراً .. التحية اللمباوية :

مع السلامو عليكم!