Sunday, November 26, 2006

حب ولا إعجاب..!؟

مطلوب مني حاجات كتيييييييير

بدأت أحبط.. حاسس بعدم توازن .. يمكن عشان عايز أنام..!؟

لازم أسرق وقت عشان أكتب فيه هنا، عشان لازم أغير المود يا إما.........

**

المهم..

الموضوع يمكن يكون مدرسي، أو أشبه بموضوعات المنتديات، أو موضوع في مجلة شبابية، كلها صور ورد ودباديب... لكن هو موضوع في بالي من مدة، وبفكر فيه .

**

حب.. ولا إعجاب..!؟

إيه الفرق بينهم..؟؟

كشخصية تقليدية، أقول إن الحب هو الزواج، أعتقد إن ده هو المرادف المنطقي .

لكن إن الأمر يكون.. علاقة فقط، وأوقات ظريفة، ممكن تنتهي بارتباط أو لأ، وممكن يكون الارتباط مصاحب لإحساس بالورطة، ده شيء....... مش مفهوم بالنسبة لي.

**

زميلي كان بيقول لي إنه فقد الثقة في الحب أو الزواج، هو بيبحث عن الجوهرة المكنونة في قاع المحيط، لكن هو مش شاغل باله بالموضوع ده، اتضح إن الولاد عندهم كوارث بيفكروا فيها أكتر من البنات، خصوصا لو قرر الشاب إنه يعتمد على نفسه بجد.... (عموما مفيش حد تقريبا بيعتمد على نفسه بالصورة دي) .

**

حب ولا إعجاب..!؟

هي بنت كويسة، والبنت التانية كمان كويسة، طب ما البنت التالتة كمان نفس الحكاية..!!

للزواج... طب ما هو فلانة بنت حلال، طب ياسيدي ما هو علانة برضه طيبة وتعرف ربنا، كمان ترتانة دي احنا عارفين أهلها ..!

العجيب إنه كله ينفع... وفي النهاية بتلاقي نفسك بتقول لا...

مش هو ده الحب.. كلهن كويسات، لكن العيب مش فيهم هم... العيب إنك أنت لست أهلا للحب، مش وقته.

**

وضعت تعريف الحب لدى الرجل:

يقول كيوبيد الذي توحدت معه روحيا كي أبرر هذا الاقتباس : " الحب هو إعجاب، جاء في زمان ومكان... كان فيهما الشاب مؤهل أن يتزوج وأن يعيش مع امرأة بقية حياته، فعندما تأتي تلك اللحظة يكون أول إعجاب قوي هو الحب"

شرح ما قيل: مفيش حاجة اسمها حب غير لما يكون فيه مجال لده، فيه بيت، فيه نية لإنجاب أطفال، لإنشاء أسرة، لارتباط يتشرف به الطرفان .

غير كده تبقى ورطة.. أو مسخرة.. أو طرف بيظلم الطرف التاني.

**

الحب هو ما ينتج نتيجة الصبر على الإعجاب.

عندما تعجب بإحداهن.. انتظر قليلا، أو كثيرا

وقتها ستجد نفسك علمت ما هو الحب، أو علمت أنك في حاجة إلى انتظار الحب.

**

في النهاية.. الحب آخر الكلمات التي أرددها، لأن هناك الكثير من الأمور تفسد ما نحب.. أو تفسد احساسنا بالحب .

20 comments:

Aladdin said...

شيء مؤلم بجد لما "الكوارث" التي أشرت إليها عَرَضاً بتجعلنا نغلق قلوبنا الغضّة وهيا في عز شبابها لنستمع بما تسميه "حباً" بعد فوات الأوان!!

لكن، بنظري أن "الكارثة" الحقيقية لا تكمن في الفقر (انظر تجد ان فقراء بلدك يتزوجون مبكراً جداً)، بل في منظومة عفنة من أخلاقيات البرجوازية الجديدة التي تنخر في عظامنا مثل السوس.

"إنهم يسرقون أعمارنا" (بتصرف) هكذا قال الشاب الغاضب في "انظر خلفك في غضب" للمسرحي الإنجليزي أوزبورن.

كبير المتشردين said...

لا اعتقد ان هناك احد يستطيع ان يعرف الحب ودرجاته مهما عاش من قصص الحب

foxamr said...

تصدق بجد احنا غير مؤهلين للحب
البنات قدامنا و نعرفهم من الكويس من الوحشة و كده بس النفس
او ممكن الخوف من المسئولية
انا عاجبني كلامك لانه بجد

layal said...

اعتقد انك فسرت الموضوع بطريقه واقعيه ومنطقيه بعيد عن العواطف
كلهم كويسين
بنات وأولاد
لكن هناك نقطه تفصل بين الكل والواحد الذي نبحث عنه

أحمــــــــدبــــــــــلال said...

الموافق على هذا الموضوع يتفضل برفع يده

موافقة

aymen.farouk said...

موضوعك لذيذ بس انا كان رأى تقوم تنام احسن ةعشان تعرف تكتب وتمتعنا وانت فايق ومذاجك رايق
دى اول مره ادخل عندك
وانشاء الله مش اخر مرة

هديل said...

أنا بس جايه أرفع يدي وأقول:
عجبني البوست!

Abdou Basha said...

Aladdin
على فكرة أنا أسعد جدا بزيارتك أو الاطلاع على تعليقاتك في اي مكان..
واتفق معك ان الحواجز والضغوط ليست مالية فقط .
**
كبير المتشردين
مرحبا بك في تعليقك الأول
أتفق معك، فعلا لكل منا تعريفه للحب، واحساسه الخاص
**
foxamr
أكيد هو الخوف أو كمان ممكن الاحساس بإنه كله زي بعضه في المرحلة دي، ساعات بفكر في ناس اتجوزت وبعد كام سنة يبدأ الفتور والهروب من البيت بأي حجة والتلقيح بالكلام على الطرف الاخر.. رغم إنه ظاهريا وتمثيليا وادائيا كان فيه - نظريا - قصة حب .
**
ليال
فعلا.. انا أيضا اتساءل هل يتعجل البعض..؟ أم هل الانسان مضطر انه يتعجل..؟ أم أن الحب الخيالي ليس له وجود وان الفكرة هي مجرد اعجاب تقليدي لكنه في مرحلة صالحة لتكوين ارتباط..؟ ربما هنا تكمن الحيرة .
**
أحمدبلال
شكرا يا عم احمد.. بس كده انت بتوجد قوى معارضة بهذا التأييد المطلق .
:)
**
اهلا يا أيمن..
لو كنت قمت نمت، كنت مش هكتب حاجة..
;)
أنا بسرق وقت عشان اسجل حالات وأفكار بتتكرر في دماغي .
المرة الجاية ان شاء الله، وسعيد بمرورك
**
هديل
وانا يعجبني مرورك، ويزيدني تشريف .
:)

karakib said...

اجمل الحب الذي نصادفه و نحن نبحث عو اي شيء اخر ...
----------------
ليه يا حبيبتي ما بينا دايما سفر
ده البعد ذنب .. ذنب كبير لا يغتفر
ليه يا حبيبتي ما بينا دايما بحور
اعدي بحر الاقي غيره اتحفر



انتوك

*~Daisy~* said...

3agebny ta7leelak...
bedoon ta7ayyoz...

tamer said...

الحب موجود وهو شريان الحياة لاانسان

والنهاية الطبعية المفروض تكون الزواج والارتباط بين الطرفين ممكن فية ظروف تمنع البعض من الارتباط لكن الحب موجود

تحياتى

بحرينية said...

بالنسبة لنظرتك تجاه الحب
فما عندي غير اقول
صح لساااااااااااااانك
هذا اهو الحجي الصح
اشكرك على البوست

walaa said...

جميل البوست .. وجميل التعريف والشرح التالي للتعريف .. منطقي جدا

تعرف فكرتني بالحوار ده، البطل: انتي بتحبيني عشان عاوزه تبقي زيي، ولا عاوزه تبقي زيي عشان بتحبيني؟؟! ..البطلة وكالعادة : والله مانا عارفه

كتير جدا بيدور التساؤل ده في بالي .. الاعجاب مدخل للحب ولا الحب هو ايل بيخلينا نعجب بالشخص..؟؟!

بس تعرف .. كلامك اسلم .. الاعجاب مش شرط يؤدي للحب .. وبعدين الحب او ما كنا نعتقد بانه حب لو جيه في وقت مش مناسب بتكون نتيجته طبعا........

تحياتي لعبدوباشا

RAT said...

الزواج مقبرة الحب
و الحب عبارة عن تفاعلات كيميائية بين شخصين لا تلبث ان تخبو بعد حين
هيك انا بفكّر

soosa el-mafroosa said...

انت عارف هي بالنسبة للبنت ساعات كتير بتبقى سهلة قوي

فيه واحده صاحبتي مثلا اتخطبت 3 مرات و كل مرة تكتب نمرة خطيبها في الموبايل تحت اسم حبيبي

و تتكلم عنه بهيام و دوبان و مصدقة نفسها جدا و انت مصدقها انها بتحبه

وأول ما تفسخ الخطوبة و تتخطب لغيرة يبقى الجديد حبيبها و روحها و ماتقدرش تبعد عنه

كلنا نفسنا نحب و نتحب للدرجة اللي بتخلينا نتلكك

عن نفسي أي حي لا يؤدي الي الزواج يبقى كلام فارغ و لعب عيال

و الجواز هو شركة بين اتنين بيجمعوا مرتباتهم على بعض عشان يربوا عيال صغيرين

بس خلاص

anima said...

كشخصية تقليدية، أقول إن الحب هو الزواج، أعتقد إن ده هو المرادف المنطقي .

Abdou Basha said...

karakib
هاني.. كل حدث فيه صدفة تغير مسار حياتك دع شيء رائع في كل ..عمل ارتباط.. أنا أتفق معاك أن في ده متعة .
**
*~Daisy~*
وأنا عاجبني تعليقك الذوق
:)
**
tamer
ساعات الواحد نظرا لظروفه مش بيعرف يفرق بين الحب والإعجاب، أو بيقول على الحب إعجاب لتبرير واقع أو العكس.
**
بحرينية
الله يكرمك، أهو كده تحكي بالبحريني على راحتك بعد كده
عشان لهجة جميلة
:)
**
ولاء
أول ما قريت تعليقك قعدت أفكر فيه كتير.. النهاردة قريته، لقيته عميق جدا، فكرة إن الحب ممكن يكون محاولة للتوحد مع تجربة او شخصية أخرى..
فكرة جميلة، زي ما نقول كده العلاقة بين مثل أعلى وبنت او أستاذ وتلميذه .

دي فكرة حلوة
لكن محتاجة نقاش تاني خصوصا لو اتحولت لمشكلة
**
رات
عموما انا لم أجرب بعد
أسمع كلامك على ضمانتك..؟
;)
**
سوسة المفروسة
فعلا كلامك صحيح ويمكن يخلينا نفتكر الكلام عن مشاكل الزواج، مفيش في المحبين كتير أبطال، بيتعاونوا مع بعض ويبتدوا ويتحملوا ومؤمنين ببعض..

تحسي بطغيان دور الأهل بصورة فجة

يمكن مش مشكلة طبقة قد ما هي مشكلة جيل .
**
أنيمة
تعرفي..؟!
أحيانا عندما أعترف أنني في كثير من الأحيان تقليدي، يعتبر البعض هذا أمر غير محبب .
لكن أحيانا التقليدية تكون مرادف الطبيعي .

Rasha said...

حب ولا اعجاب

اولا البوست جميل
اعتقد ان الحب هو مختلف هينما تفكر في الارتباط فالحب لا يكفي لخلق علاقة صحيحة بين طرفين سيعيشانها سويا لمدة طويلة

الحب هو مهم طبعا ولكن يجب ان ياتي معه التفاهم الاحترام المشاركة
واحتواء الاخر بكل ما فيه من اخطاء
وطبعا القدرة على تحمل هذه المسؤلية

اما الاعجاب فهو شعور اخر قد يحدث فجأه
قد يتطور في احيان الى حب
وقد ينتهي لوحده

اعجبتني تحليلاتك كثيرا واوافقك في معظمها

تحياتي

Epitaph said...

طب و بعدين
كدة خطر علي عقلي الباطن
علي رأي زينات صدقي
ههههههههههههه

تحليل منطقي لولبي حلازوني
اوافق عليه و بشدة

موافقة
:)

saso said...

كلام كيوبيد هنا معناة نفس كلام فرويد انها عاطفة سابقة التجهيز
موجودة ومنتظرة اول شخص ملائم للتركيب عليه
مش عارفة بس لو الحكاية كده..تبقي سخيفة اوي..مش كل الكتب والروايات والشعر بتتكلم عن الاعصار المجتاح والاندلاع المفاجئ والحاجات دي
:))