Wednesday, December 20, 2006

من العقل الباطن إلى العقل الواعي ...

(حوار عامي ركيك)

..

العقل الباطن : يا عم ارحم نفسك، الراجل اتخنق منك، خليته هيولع في نفسه .

العقل الواعي : بص يا باطن.. انا مش فاضي.. اكتم خالص بدل ما أهزقك وامسح بكرامتك الأرض .

العقل الباطن : انت حتصدق نفسك..؟ ده انا اللي بمشي صاحبك ده على مزاجي..! أنا ليا 90% من الراس دي.. انت أساسا ولا ليك لازمة في الحياة، بس عمال تزهق صاحبنا من روحه، وترمي بلاك عليا انا .

العقل الواعي : يا ابني انا السبب الحقيقي في نظام حياة صاحبنا ده، أنا الأساس في المعلومات اللي في راسه، أنا اللي بنيت مستقبله، وانا اللي بحميه من أمثالك ..!

العقل الباطن : ربنا يسامحك.. عشان تبقى عارف بقى.. آخر قصيدة كتبها صاحبك كانت بسببي أنا، وكذلك آخر قصة ومقال.. كل ده بسببي أنا .

العقل الواعي : يا رب ارحمني...!

العقل الباطن : ربنا ياخدك ...

العقل الواعي : شوف يا باطن، انا كنت بحترمك لما كنت عامل توازن في حياة الراجل ده، لما كنت مخزن لتجاربه، لما كنت بتمده بالأفكار، لما كنت بتساعدني ...

العقل الباطن : ودلوقت انا بعمل إيه إن شاء الله ..!؟

العقل الواعي : حتودي الراجل في داهية، كل افكاره بقت نجسه.. على طول تايه ... و.......

العقل الباطن : لأ معلش، عشان تبقى عارف، انت اللي جايب له وجايب لي اكتئاب، انا بشتغل على المعلومات اللي جايياني يا حبيبي.... وبعدين كفاية القلق اللي عاملهولنا ده.

العقل الواعي : طب وبعدين..!؟

العقل الباطن : أنا رأيي نسيبه حبه من غير عقل خالص، عشان يريح مننا، واحنا كمان نفضى لحياتنا .

العقل الواعي : أنا موافق ... نسيبه يومين من غير عقل .

**

C U

8 comments:

بحرينية said...

وااااااااو فرصة و لا في الاحلام
موبس حق عقله الباطن و عقله الواعي
بل هي فرصة له ايضا لكي يرتاح منهم
و لا تنسى فهناك الكثير مما يتمتع به المجنون
و من اكثر تلك المميزات شهرة
انه يقدر يقول اللي يبيه بدون لا احد يحاسبه
>>> مجددا نظرة الى الجانب المملوء من الكأس


اشكرك على البوست
من المتابعين دائما
:)

Epitaph said...

hmm..I know when they do this..I would just wish to explode my brain to be at ease!!

tell them to give me a break!
ده حتي التلاجة بتفصل انا مش ح افصل خالص كدة
:))

أحمــــــــدبــــــــــلال said...

أحم لو ممكن سؤال
هل انت متأكد من قواك العقلية ؟
يابنى بدأت أقلق عليك
يبدو أنك خلاص هنجت و محتاج فرمتة قريب

Abdou Basha said...

بحرينية

أنا عجبتني فكرة صراع العقل الباطن والعقل الواعي، مش عارف ممكن تؤدي لإيه في الآخر ..!؟
**
Epitaph

أخطر شيء هو تحالف عدوين على طرف، أكيد الطرف التالت بيكون أضحى الضحايا اللي ممكن حد يضحي بيهم .
مش عارف ايه الأضاحي الكتير دي
:)
كل سنة وانتم طيبين بمناسبة عيد الأضحى .
**
أحمد بلال..
ده تعليق تسيبه برضه يا احمد
انت أخدت الموضوع عليا ليه..؟
ربنا يسامحك
انا مخاصمك .

sara86 said...

فعلا يهدر الانسان عمره وهو يحاول ان يعرف ماهيته وهو يحاول ان يبحث عن طريقه وهو يحاول ان يكون شيئا اخر
وهو تائه بين عقله الباطن والواعى

صحيح فيها ايه لو الواحد ريح عقلينيه الاتنين ومشى من غيرهم؟
دول حتى المجانيين الايام دى عسل اوى وبيعملوا اللى هما عايزينه ومبيتقلهمش لا ولا حد بيلومهم

تحياتى عبدو باشا
حوار جامد اوى وحلو بجد

anima said...

ياه حلوة نسيبه من غير عقل دي يا ريتها تحصلي
:)

layal said...

يا سلام يومين من غير عقل
لو كنت قدره اخلص نفسي من مثل هذه الافكار
لكنت اعطيتك الحل
لكن مش عرفه اخرج من هذه الدوامه
لكن الحمد لله في غيري معاي داير بالدوامه
:-)
انت قادر علي التعبير عن هذه الامور
اللهم لا حسد :-)
وزي ما نقول
محسود الفقير علي موت الجمعه

شكرا يا عبدو

The Eyewitness said...

أنا عارف أن تعليقي جاي متأخر جداً. بس أنا بقى لي فترة شبه منقطع بسبب الأنشغال عن العالم التدويني.
لكن كل آلي عايز أقوله أن أنا شخصياً أرحت كتير يوم مقررت أقلل التفكير شوية، فيه بعض الأشخاص أنا منهم وقد تكون أنت منهم واخدين كل حاجة على عقلهم وده أحياناً بيكون فعلاً مزعج جداً وكمان مش مثمر.