Wednesday, January 31, 2007

الأهرام بترمي إفيهات

كان ليا صاحب اتعرفت عليه فترة قصيرة... اكبر مني بحوالي 10 سنين، كان شخصية غير تقليدية تماما، ودايما عنده حكايات، تركته بعد فترة قصيرة اتعرفنا فيها على بعض، العلاقة انقطعت تقريبا، وبعد كده بقيت أشوفه في التلفزيون بيطلع في الإعلانات بس.

**

هو محب للتمثيل، وكان ليه تجربة في الإخراج تقريبا.. كانت قصصه مشوقه، وأسلوبه ظريف في الحكي، أكتر كلمتين كان بيستخدمهم، كلمة "إفيه"، اللي هي بتستخدم في السينما للتعبير عن الجمل الشهيرة العالقة بالأذهان، كمان كان بيستخدم كلمة "كاركتر" !

**

هستعين هنا بكلمة "إفيه" في العنوان، للتعبير عن حاجتين قرأتهم في الأهرام.. الجريدة الأولى في مصر (على فكرة الأهرام تستحق مدونة كاملة ليها)

**

الأول

الخبر ده كان من حوالي أسبوع كده :

_______________________

كتب ـ محمد شومان‏:‏

بمناسبة الاحتفالات بأعياد الشرطة قامت الإدارة العامة لمرور الجيزة بتوزيع باقات الزهور علي قائدي السيارات بجميع شوارع وميادين الجيزة منذ الصباح وذلك تنفيذا لتوجيهات اللواء عادل الهلالي مساعد الوزير لأمن الجيزة واللواء محمد درويش مدير الادارة العامة لمرور الجيزة بمشاركة جميع المواطنين بالاحتفال بعيدهم‏.‏

..

الصراحة خبر تحفة، وتخيل إن الظباط اللي هيعطوك الوردة مين؟؟

ظباط المرور..

إحساسي إنه الوردة حتكون بعد ما تاخد المخالفة

أو إن الحركة كانت كمين، عشان صاحب العربية يهدي السرعة عشان ياخد الوردة، فيروح الأمين اللي مع الظابط مقيد مخالفة على طول .

..

الثاني

الخبر ده كان اول امبارح :

ـــــــــــــــــــــــــــــــــــــــــ

..

أسوان ـ من موفق أبوالنيل‏:

أصدر الرئيس حسني مبارك توجيهاته بسرعة دراسة الأحكام القضائية النهائية ضد‏600سيدة نوبية من المقيمات بقري التهجير‏,‏ وحصر المبالغ المطلوبة لوقف تنفيذ أحكام ضدهن بالحبس من سنة لسنتين‏,‏ حيث تعرضن للنصب من شخص يدعي عبدالرحيم حسنين‏,‏ حصل علي قروض بأسمائهن‏,‏ يتراوح القرض الواحد بين‏16‏ و‏30‏ ألف جنيه‏,‏ وطلب الرئيس أن تقوم رئاسة الجمهورية بالسداد حماية لهؤلاء السيدات‏.‏

وكان الرئيس قد استمع ـ خلال لقائه أمس الأول بقيادات أسوان ـ إلي مشكلة هؤلاء النسوة اللاتي وقعن ضحية لنصاب استغل صعوبة ظروفهن الاقتصادية‏,‏ وعرض عليهن مساعدته في الحصول علي قرض بمبلغ ألف جنيه بضمانه أمام بنك التنمية والائتمان الزراعي مقابل مائة جنيه لكل سيدة‏,‏ وبعد ذلك فوجئن بأنهن حاصلات علي قروض تصل أحيانا إلي‏30‏ ألف جنيه‏,‏ وفي الموعد المحدد للسداد طالبهن البنك بالوفاء بالقرض وفوائده التي تراكمت‏,‏ وإزاء عدم السداد قدم مستنداته للمحكمة التي أصدرت أحكامها‏,‏ والنصاب من قرية ابريم‏,‏ وشهرته كل عام‏.‏

وفور قرار الرئيس بتحمل الرئاسة السداد‏,‏ عاشت منطقة النوبة أفراحها ابتهاجا بالقرار الإنساني للرئيس‏,‏ الذي قال بعد علمه بالتفاصيل‏:‏ هم النصابين وصلوا أسوان‏!!‏ وكان خمس سيدات من اللاتي تعرضن للنصب قد تم طلاقهن‏,‏ بعد أن اكتشف الأزواج تورطهن في الواقعة‏.‏

..

المهم في الخبر او الإيفيه الحقيقي..

هو العبارة دي من الريس اللي كتبتها الأهرام

" قال بعد علمه بالتفاصيل‏:‏ هم النصابين وصلوا أسوان‏!!‏ "

الصراحة أنا فطست على روحي من الضحك بعد ما قريت الإفيه ده من الريس.. ومش بضحك على الريس قد ما بضحك على اللي نشر الموضوع بالصورة دي.

كإن الإفيه ده جاي من حد في قعدة حشيش.. الجملة محشورة في الخبر من غير معنى خالص .

" هم النصابين وصلوا أسوان‏!!‏ "

صباااح الخيييييير

**

الأهرام جريدتي المفضلة

10 comments:

أنيما said...

صباح الخير يا مصر
" هم النصابين وصلوا أسوان‏!!‏ "

كلام لوجيك said...

الاهرام ذلك الصرح العريق اصبح مقهى لأنصاف الصحفيين
وهو الان الناطق الرسمى للحزب الوثنى العاكم
لا ينطق الا بكل ماهو رائع وجميل صفحاته كلها وردية واخباره ندية وكأنه يتكلم عن شعب اخر غير الشعب المصري المطحون

الغباء احيانا كثيرة يولد الافيهات لطرافة الموقف
ويكون افيه ممتزج بالسخرية ويصاحبه غثيان
ونظرا لغباء حكومتنا الرشيده فإننا نحصل دوما من ورائها على ما لذ وطاب من الافيهات الحارة والساخنة والمغليه

حكومه تجري وراء الشرفاء وتنكل بهم
وتترك اللصوص والفاسدين وتمنحهم حمايتها
واخيرا فإنه اذا كان للمصريين عيب..... فهو انهم يرضون بإستمرار مثل تلك الحكومة الغبيه

دمتم بخير
اسامة سامى

Epitaph said...

ده تحت بند خمسة فرفشة
و اضحك كركركررررر

:))

Mirzade said...

اتخلقنا عريانين
شوية و لبسنا كوافيل
لأجل ما نخبي أجسدنا
و شوية كمان غطنا عقولنا
هي العقول ضرورية علشان نعيش...؟!

Abdou Basha said...

أنيما
صباح الخير يا انيما.. قال يعني اتفاجيء بالخبر
:)
**
ساكاماكا نيوز
مرحب بيك يا اسامة
بس منقدرش ننكر انه الأهرام جريدة مسلية
:)
**
ابيتاف
أيوه..
حاجة كده زي أضحك مع الرئيس
:)
**
مايا
مممم
العقول ضرورية؟
المسألة نسبية.. محدش يعرف يحدد مين العاقل ومين اللي مش عاقل.
ممكن العاقل يقول على اللي مش عاقل عاقل، وممكن اللي مش عاقل يقول على العاقل مش عاقل
:)
خصوصا لو فيه وسائل اعلام بتتحكم فيها عوامل كتير.
أعتقد انا بنتكلم على ظاهرة انسانية .

عبدالله said...

جامده قوي الحركه بتاع العربيات بس انت فهمتها غلط يا ابني الورد ده مش للرجاله ده كل ظابط شرطه هيوقف الستات بس و يطلعها ورده وفيها الكارت بتاعه و يقولها اي خدمه يا جميل ده نوع من الترفيه عن رجال الشرطه مش عن المواطنين طبعا
:)))))
موضوع اسوان بقي ده الي تحفه اول حاجه فيه ده يدل علي عمق ثقافه الرئيس انه عارف ان في حته في مصر اسمها اسوان
وتاني حاجه يدل علي عمق ثقافته برضه انه عارف ان بقيت مصر كلها نصابين اصله معزور مش شايف في الحكومه حد مش نصاب
:)
تحياتي

smraa alnil said...

ههههههههههههههههههههههههههههههههههههههههههههههههههههههههههههههههههههههههه

والله ما شفته الا دلوقتي
مسااااااء الخييييييييييييير

ههههههههههههه
بجد مش قادرة ابطل ضحك
حسبي الله ونعم الوكيل
هو لفساد بقي كدة عيني عينك
وعلي راي احد المدونين
اه يا بلد عايزة ولد
بس انا بقي بنت

bnita said...

هههههههههههههههههههه
لا حول و لا قوة إلا بالله

tota said...

عبده باشا
تصدق فكرة الوردة مغرية طيب ممكن تكون فى الفالنتين علشان تكون مناسبة اكتر علشان تبقى رسالة حب للمواطن ومش للستات علشان الكلام واضح وسلوكهم كمان واضح

صحيح هما النصابين وصلوا مصر اصلا محدش قالى كنت فكراهم لسه على الحدود اه شوفت الشقاوة هما وصلوا بداية من اسوان

افيه مسخرة
تحياتى

Anonymous said...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html