Tuesday, February 06, 2007

س و ج

اية اللي حيحصل لايميلك لما تموت ؟

.

هدخل دي اس ال في الطوربة، وابص من وقت للتاني

smileys

طبعا هوتميل وجميل وياهو هيقوموا بالواجب.
**

اديت الباس وورد لحد قبل كده؟

.

اه .. ، وهو أكيد نسيها بعد كده، أنا كمان بستخدم كذا باسوورد

**

لو اه كانت طبيعة علاقتك بيه اية؟

.

أخويا

smileys

**

اسمك؟

عبدالرحمن

**

اسم الدلع المشهور في وسط اصحابك؟

.

عبده.. عوبد

وعبده باشا

smileys

**

عمرك؟

.

26 وكام شهر

**

برجك؟

.

في الأوراق الرسمية برج الميزان، لكن في الحقيقة....

خمنوا انتم..!

smileys

**

مجالك أو مجال دراستك ؟

.

كلية آداب – عين شمس

حاليا بحضر تمهيدي ماجستير، وغالبا حاسس إني مش هكمل عشان مش فاضي

مش عايز استفيض هنا

smileys

**

شخصيتك نوعها اية؟

.

نوعها ايه؟؟

بيجو 405

smileys

امممم ممكن نقول مثلا :

طيب (فيه حد يقول على نفسه طيب)

متحفظ أحيانا، أكره قلة الذوق..

من السهل أن تخسرني بتصرف أحمق.. لا أحب الحفلات أو الصخب والنفاق أو حتى المجاملات. (حاجة غم)

بوجه عام شخصية هادئة، لكن متقلب المزاج جدا.

كالغريب بين اللئام

smileys

**

السفر بالنسبة لك؟

.

السفر حياة..

وهواية قديمة لا أمارسها الآن.

**

المود بتاعك؟

.

منيل بنيله... قلوق جدا، وباخد كل حاجة على أعصابيsmileys

**

وقت فراغك بتعمل فيه اية؟

.

يعني ايه وقت فراغ؟؟

وقتي كله فراغ وكله عمل.. مفيش فواصل محددة.

smileys

**

الأكلة المفضلة؟

.

كبده اسكندراني..

**

الصفات اللي خدتها من بابا؟

.

الجدية، والصراحة والوضوح.

**

الصفات اللي خدتها من ماما؟

.

الله يرحمها

إلى حد ما مسالم.. القدرة على قراءة الأشخاص وشخصياتهم .

كمان ارتداء النظارات

**

اكتر 6 حاجات بتكرهها؟

.

1- الغل والحقد والمشاعر السيئة

2- قلة الذوق وطولة اللسان حتى لو بهزار

3- منطقة المطرية (حي قاهري)

4- لؤم الفلاحين

5- الانتظار بوجه عام

6- المستشفيات .. أصبح عندي رهاب منها

**


اكتر 6 حاجات بتحبها؟

.

1- إني أقابل حد ابن ناس وذوق

2- الشكولاته والشيبس

3- سماع الموسيقى.. واكتشاف المقامات الموسيقية، بحب مقامات الكورد، والحجازكار، والنهاوند

4- التسكع في القاهرة وأنا حاسس إني مش ورايا شيء

5- صلاة العشاء

6- إني أحس إن ربنا معايا، واني مش لوحدي في الدنيا.

**

الشغل بالنسبة لك؟

.

مغامرة غامضة.. أو محاولة للانتحار، مش متأكد

**

الكومبيوتر والانترنت بالنسبة لك؟

.

حاليا هو حياتي، أو على الأقل أغلبها

smileys

14 comments:

layal said...

تخيلت شكل القبر وبجنبه الكمبيوتر
وكأنه رسم كركاتوري
واعجبتني عبارتك
كالغريب بين اللئام

اما الشغل فليس انتحار ولكنه موت بطيء مثل السيجاره
تحياتي

Epitaph said...

:))

a very calm atmosphere..created through your words... just as your character!! masha Allah

حــلم said...

هادى ورايق
هى دى سمة الباشوات
:)
حلوة حكاية دى اس ال تحت
بس ياترى هتركب وصلة مع كام مرحوم
:)

ايه الافكار الغريبة دى.. ربنا يخليك يافندم
وتبقى مقبل على الحياة دايما
تحياتى يا باشا

عبدالله said...

ردود جميله و ان مش عجبني موضوع الوصله دي الموت ليه حرمه برضه اكبر من اننا نضحك عليها رغم ان الافيه حلو
:)
برضه عجبني موضوع بتكره لؤم الفلاحين دي حاجه بتجيب شلل كامل ومؤقت

سؤال رخم ليه بتكره المطريه
:)

تحياتي يامقبل علي الحياة نشوفك بعد الجواز هتعمل ايه
:)

smraa alnil said...

اولا خسارة اني مش لحقت البوست اللي فات نظرا لظروف مرضي بس ملحوءة بقي

ثانيا انت في تمهيدي ماججيستير بس حاول تكمل بجد

انا عارفة ان هي رخمة ومملة ومتعبة وتضيع وقت بس هتفيدك اوي وهتندم لو مش كملته
انا بقي اللي في تانية ماجيستير وبفكر اعتذر هههههههه

سؤال بجد بقي
ليه بتكره المطريه
والله دي منطقة حلوة وتحس ان فيها كل حاجة
اوعي تكون من سكانها

عامة ربنا يبسطك كمان وكمان يارب
انا اصلا بحب مدونتك اوي

أنيما said...

أولا الله يرحم والدتك
ثانيا ليه اخترت صلاة العشاء بس من بين الصلوات؟
القدرة على قراءة الأشخاص و شخصياتهم: طب ايه شخصيتي أنا؟ يالله جاوب

Me2 said...

لحد ما قرأت التاج ده كنت متأكده إنك تربية موسيقية :) او موسيقى عربية
بس الروقان ده جديد ... يا رب يكون خير :)

walaa said...

عجبتني اوي حكاية التسكع في القاهرة دي،، تعرف جميلة .. خصوصا لما تكون ملم بتاريخها وحكاويها القديمة وحكاوي بيوتها وجوامعها وحكامها،، طابع تاني مشوق وجميل ..

عجبني كمان حبك لصلاة العشا .. بحس انه وقت هدوء حقيقي وسكينة .. فكرتني بالمسجد جنب بيتنا لما كنت بسمع الشيخ فيه وهو بيتكلم في الوقت ده عن درس او حديث مختصر ويحاول يوصله للناس ..

اما حكاية متقلب المزاج دي، امممممم اعتقد في كتير منا كده اولهم انا وبرجي
الهوائي ههههههه

س و ج جميلة .. تحياتي

ذو النون المصري said...

هما الفلاحين ناقصين غلب تيجي انت كمان تقول لؤم الفلاحين
بقالهم لؤم!!!!؟
ياعم
ارحم

ام العيال said...

عبدو باشا
ازيك
اجوبتك ريييييييئا
تحياتي

MAKSOFA said...

والله انت زي العسل
موش عارفه ممكن اخمن البرج هو واحد بين اتني محوطين برج الميزان
يبقي العذراء او العقرب
وياريت تكون العقرب لأنه برج ابني

Abdou Basha said...

ليال
معك حق، انا أشعر بحالة من التشتت هذه الأيام ليس فقط بسبب العمل لكن، لكثرة الضغوط.
:(
**
ابيتاف

الله يكرمك، كلامك بجد كله ذوق

**
حلم

:)
مش عارف اصل ملقتش غير الإجابة دي، أول مرة حد يسالني هيحصل ايه لإيميلك لما تموت، وقتها انا مش حبقى فاضي اساسا.
**
عبدالله

أهلا بيك يا عزيزي
بكره المطرية عشان دايما مش بعدي فيها الا واكون في ظروف مهببة.
حظها سيء معايا.
**
سمراء النيل
تعتذري ازاي يا بروف عن الماجستير، اوعي تعملي حاجة كده، ده هو ده مستقبلك.. مينفعش خالص، ان شاء الله بس يوم المناقشة متنسيش تندهيلي عشان انا بحب أحضر الحاجات دي
:)
**
أنيما العزيزة
صلاة العشا بعدها الواحد بيحس - نوعا ما - انه عمل اللي عليه، طبعا بقول نوعا ما، كمان بحزن لما بنام وافوتها لأي سبب.
بالنسبة لشخصيتك
اممممم
مينفعش من عندي هنا أحدد، لازم اعمل زيارة المغرب، أو أبص بصة على البلورة السحرية .
:)
**
مي 2
أهلا بعودتك، انتي فين من زمان؟
هو انا درست حبة موسيقى شوية، بس غربي، ومكملتش
ونسيتها
:))
**
ولاء
برجك إيه؟
:)
التسكع في القاهرة محتاج الواحد ينسى الحاضر ويفتكر الماضي اكتر، لأن احنا على ارض كان عليها حضارات قبلنا
الفكرة دي لوحدها مخيفة ومثيرة
**
ذوالنون
انت زعلان مني ليه يا عم؟
:)
واحد اسمه عبده باشا واقطاعي، والزمن دار وخلاه في آخر الحارة متوقع مشاعره هتكون ازاي تجاه الفلاحين..؟

بس عايز أقولك، انه هناك فعلا ما يسمى بلؤم الفلاحين، واللي كلمني عنه اكترهم فلاحين أساسا، انا مش بفتري على حد.
**
أم العيال
الله يخليكي ومنورة المكان
**
مكسوفة
للأسف.. حسب كلام العيلة، انا مولود في برج العذراء مشعارف دي حاجة كويسه ولا لأ
:))

yara said...

إمبارح و أنا بوضب أوضتى حركت الكومبيوتر غصب عنى ف إتشالت الفيشة و أناما شفتش إنها إتشالت بس كل اللى لقيته إن الكومبيوتر إطفى ووقع قلبى فى رجلية
مش قادرة أوصفلك عدد الأفكار الى جت فى دماغى فى الثانية اللى قبل ما أكتشف حقيقة اللى حصل إترعبت إنه يكون باظ و إنى ها أفضل كام يوم منغيره لغاية ما يتصلح
عجيبة فعلاً حالة الإرتبلط اللى بتحصلنا أحياناً مع أشياء أو جماد

Anfal said...

عبدالرحمن
أنا قرأت دي
:)
جميلة اوي .. و الاجابات حلوة أوي
تعرف و انت رايق يا عبدالرحمن .. بتبقى مختلف أوي
و بيبان حتى في وسط الكلام اللي بتكتبه .. انك رايق من جوة
و دة جميل.
أنفال