Monday, February 12, 2007

Visitors online - خيال

على يمين المدونة، كنت حاطط مظهر بلدان الزوار.. كان شيء رائع، كنت بأحبه أكتر من عداد الزوار، يمكن لأني ساعات كنت بلاقي بلدان غريبة مكنتش أتوقع إنها تكون موجودة معايا على المدونة في نفس الوقت .

دي صور أخدتها زمان لجنسيات متعددة كانت معايا على المدونة في نفس الوقت .

**

**

كنت ساعات كتير ألاقي فيه ضيف من إسرائيل معايا في نفس الوقت على المدونة، هل هو من عرب إسرائيل؟؟ مسيحي.. مسلم ولا يهودي؟؟ مش مهم... في مرة فكرت إني أكتب رسالة إلى هذا الضيف واضع الصورة الموجودة أعلاه، لأني لا أعرف مدونين داخل إسرائيل، كنت أريد أن يتحدث بدلا من أن يتركني هكذا والأفكار تجول برأسي حول هوية هذا الزائر الإسرائيلي.

**

**

في يوم آخر.. وجدت زائر من أفغانستان.

بن لادن يحاول انه يتصفح المدونات المصرية عبر اللابتوب ؟

الظواهري؟؟ ولا الرئيس الأفغاني داخل يرمي السلام؟

مش عارف.. كانت الزيارة غريبة .

**

**

الزيارة اللي أسعدتني كانت من موريتانيا.. شعرت أنه هناك إخوة عرب مهتمين بزيارة صفحة أخ ليهم في شرق القارة الأفريقية يقطن في آخرة حارة مصرية.

مرحبا بك عزيزي الموريتاني دائما، وفي أي وقت أنت ضيفي المميز.

**

**

الرئيس الإيراني أحمدي نجاد سمعت انه عنده مدونة على الانترنت.. تقريبا هو حب يوطد العلائق بين المدونين المصريين والثورة الإسلامية، فقام بزيارة خاطفة تزامن وجودي معها في تلك الأثناء.

هل ممكن يكون الرئيس الإيراني لسه بيزور المدونة وأنا مش عارف بسبب انتهاء صلاحية مظهر بلدان الزوار؟؟

صعبة حبتين ... انه أصلا يكون بيقعد على الانترنت عشان يتابع المدونات.

**

**

خيال بخيال .. قلت أكيد انه الرئيس الأمريكي جورج بوش علم بزيارة أحمدي نجاد وشعر إن المدونة سيتم اختطافها وضمها إلى تحالف الهلال الشيعي المزمع إقامته، أو إلى محور الشر الذي أشار إليه عدة مرات .

عموما.. فيه مدونين مصريين في أمريكا، وأمريكيين بزور مدوناتهم وممكن عادي انه يكون حد منهم .

بس أنا خيالي واسع جداااا اليومين دول.

**

**

3 زوار.. واحد كان من بلجيكا ويمكن من بروكسل عاصمة الاتحاد الأوروبي، والتاني من السويد، بلد نوبل ومقر لجنة جائزة نوبل، التالت من روسيا.

يمكن كانت زيارات طريفة جدا، لكن مش غريبة لأنه فيه عرب هناك فعلا، إلى جانب انه هناك 1000 طريقة ممكن حد من البلاد دي يزور بيها المدونة .

**

**

ساعات كانت بتبقى المدونة زحمة.. لكن مش الازدحام الشديد، يعني ممكن العديد يصل إلى سبعة زوار في وقت واحد وقت الزحام أو اكتر.. وساعات كتير يكون فيه اتنين او تلاتة معي على المدونة .

في الصورة أعلاه تلاتة معايا على المدونة، من مصر وألمانيا وانجلترا.

**

**

ساعات كمان كان بيبقى معايا زائر من فلسطين، وده شيء جميل، واتبسطت كتير منه .

أدعو الله انه تتحسن الأوضاع في الأراضي الفلسطينية بعد التوترات اللي حصلت مؤخرا .

**

**

المشهد ده مش غريب عليا.. كنت متعود عليه وأنا بزور المدونة، إني ألاقي حد معايا من مصر على المدونة، خصوصا انه الزوار المصريين مش لازم يكونوا مدونين، ممكن ناس عرفوني من أماكن تانية، وحبوا يتابعوا أحوالي إيه

كمان كتير كنت بلاقي زائر من السعودية .

**

الصراحة انا مفتقد الــ Visitors online حبتين، لكن أحب أضيف تفسير لوجود الجنسيات الكتير المتنوعة اللي ممكن الواحد يلاحظ وجودها في مدونته، زي اليابان، أو روسيا، أو البرازيل.. الخ

أولا انه هناك عرب في هذه البلدان

لكن الأهم انه فيه ناس كتير بتزور المدونة عن طريق جوجل.

انا منساش الانونيموس اللي مستلمين المدونة وبيحطوا إعلانات في البوستس القديمة بصورة يومية، وهما مش عرب، بس بيعملوا اللي عليهم .

وأحيانا البعض بييجي ورا صورة أو ملف صوت وهو بيبحث على الجوجل.

في كل الأحوال.. مرحبا بكل زائر أيا كان أصله أو فصله.

19 comments:

عبدالله said...

:) جامد قوي البوست ده
ايه يا ابني ده مالكش حل و كمان بتحتفظ ب صور للكاونتر ياريق انت
وايه الخيال ده كمان كتبتلك قصه قصيره و انت قاعد كده
افكار جميله

تحياتي

ماشي صح said...

وفي مرات تجي زيارة من مكان مجهول
يمكن
زوار من الفضاء عشقوا مدونة آخر الحارة
:)

Anonymous said...

ازيك ياعبده
فكرة والله...ههههه
ساعات بدخل علشان الاقى ناس برده...او الاقى نفسي...
او اشوف شكل جديد وختلف للدنيا.زى ماشفت انهاردة


so keep on

Epitaph said...

:))

ليك حق و الله
انا بعد ما راح مني عداد الزوار بافكر احط بتاع البلدان ده..عامل زي تيرموتر قياس الزيارات الخاطفة و الدائمة من مختلف بلدان العالم

بس الله يكرمك
لو العم سام كان هنا
والاخ بوش عدا من هنا
قوله ارحم حبتين
:))

حــلم said...

عبدو باشا
جميل البوست
تعرف انى ساعات باحب ادور على مدونات مجهولة من خلال الزرار بتاع
next blog
بالاقى مدونات من كل الدنيا

فممكن دى برضه تكون طريقة الوصول ليك
فى آآآآآخر الحارة

:)

**********
لاحظت وانا باعلق انك لسه على النسخة القديمة
خللى بالك بلوجر هيعملها فجأة وتلاقى نفسك حولت
فياريت تنسخ التامبلت بتاعتك وخصوصا السايد بار
وخصوصا خصوصا
الكود بتاع الزوار

علشان تبقى تستعملها بعد كدة
نصيحة اخوية يعنى

yara said...

هو نوع من أنواع التواصل
مش عارفة ليه الواحد بيتبسط لما بيلاقى تفاعل من الناس اللى حواليه
مع إنى أنا مثلاً كنت طول الوقت بيتهيألى إنى مستغنية و إنى أقدر أكون كاملة جداً من غير ناس حواليا
بس طلعت تهيأللت
لما إنت مفتقد ال
bar
ده رجعه تانى

adhm said...

يعنى هو نوع من الونس جميل جدا
خصوصا لو مصحوب بالخيال اللى انت عايش فية
يعنى مثلا لية اللى من امريكا ما يكونش واحد من الاف بى اى وبيكتب تقرير ويمررة لبتاع مباحث امن الوطن هنا فى لاظوغلى
او اللى من اسرائيل بدال ما يكون مواطن عربى مثلا يكون من الشاباك او حتى حفيد جولدا مائير
ربنا يكفينا شرهم جميعا

الهام said...

عندما نبدأ بالتفكير بمن خلف الفضاء الرقمي
ننسج القصص وعندما نفكر بما ننجزة من خلال هذا الفضاء نشعر بقيمتنا أكثر وبجمال ما نقوم به ...قال لي أحد المدونيين بقدر ما هذا العالم هلامي بقدر ما هو ساحر
أتفق معه تماما
تحياتي

أنيما said...

طب و أنا ويني مش موجودة ليه؟
حلو انك تلاقي زوار من بلدان مختلفة و ده كان دايمت بيحصل في مدونتي

tota said...

عبده باشا
فعلا انا كمان بهتم بالعداد ده
بس كمان بدأت اخمن مين من اللى اعرفه ومعتاد التعليق بيعيش فى الدول دى
وبربطها بالتعليق فى نفس التوقيت
وفعلا كان فى بوست عند احمد شقير اسمه القارئ المجهول
ليس مدون وليس معلق مجرد قارئ تصادف وجوده واعجبته المدونة
فكرة الربط بين المكان والاشخاص المهمة لطيفة جدا وضعت ابتسامة جميلة

يا سلام بقى لما الناس دى تكون من زوار مدواناتنا وبيعرفوا عربى مصيبة يكونوا مش بيعرفوا وبيتفرجوا على الصور بس

تحياتى

Abdou Basha said...

عبدالله

انا داخل على سنة بتعامل مع المدونة دي، الصور دي فيه منها من زماااااان
:)
**
ماشي صح

أيوه فعلا زوار الفضاء انا حاسس بيهم اليومين دول كتير، بيدخلو يتركوا اعلانات ومطلوب اني احذف وراهم

:(

**

Anonymous

أنا قريتلك تعليقين لحد دلوقت وحاسس اني اعرفك بجد
:)

انا سعيد بوجودك
**

Epitaph

على فكرة فيه موقع ممكن تدخلي عليه يعرفك اكتر زوار جاؤوا المدونة من اي بلد، وبالترتيب
للأسف ناسي الرابط
بس لقيت الترتيب عندي، مصر والسعودية وامريكا والإمارات .. حسب ما انا فاكر

كان محتاج أخد لها صور هي كمان الاحصائية دي
:)
**

حلم

بجد أنا بشكرك كتير على المعلومة دي، لإني ما كنتش واخد بالي منها خالص أنا لا حظت اني مش عارف أحذف تعليقات دلوقت، للأسف شكلي مش هقدر استمر وغصب عني هغير رغم ان كل الناس كارهة البيتا ده
:(
**
يارا

فكرت ارجعه لقيت الاشتراك مش نافع، والصراحة انا فيه حاجات كنت عايز أغيرها ومش لاقي وقت
:(

**
أدهم

أفكارك جميلة ، انا محبتش اكتب كده ليقولوا ده عنده عقدة اضطهاد
قال يعني نجاد وبن لادن اللي بيزوروا مش فكرة مريضة برضه
:))

**
الهام

الغموض دائما يعطي فرصة للخيال، وصنع افتراضات
ربما هي ميزة هذا العالم، اضافة انها صفة عربية نتيجة نقص المعلومات الدائم .
**
أنيما

ازيك؟
ملحقتش أخد لك صورة وانتي داخلة المدونة،
:)

مش حتكتبي تاني في مدونتك؟
**
توتا

حتة اللي بيزرورا عشان الصور دي فعلا في بالي كتير، لإنه فيه بلاد فعلا كنت باستغربها

ده غير طبعا الناس اللي بتسيب اعلانات بالإنجليش وروابط مواقع تجارية .

anima said...

صباح الخير عبدو
نسيت أقولك اني انتقلت للمدونة دي بمشاركة صديق
http://2fous.blogspot.com

Entropy said...

المرة الجية لما تلاقي زائر
من أمريكا اعرف انه أنا
أصلي كنت متعشيّة مع الواد بوش من كم يوم
وعرّفني على مدونتك
في الحقيقة هوّ مدحها أوي
وآل الواد دا شكله دمه خفيف وابن نكتة
ولما عرف انه بنلادن بيزورها كل فترة و فترة
آل أنه مش حيتحرك من هنا
إلا لما يكفشو

;-)

layal said...

في حاجه ثانيه تظهر في سجل الزوار
ةهي المدينه اللي موجودين فيها
والحقيقه دايم بتظهر لي اني من مدينه غير مدينتي
مدينتي
خيالك واسع يا عبدو

Abdou Basha said...

حطيت مظهر البلدان جديد


مش عارف اللي من كوريا الجنوبية ده جاي ليه؟

:)

Anonymous said...

السلام عليكم


كنت من اوائل القراء الى قامو بقرأة هذا الموضوع .. لمن للاسف لم تكن الصور ظاهرة .

يبدو ان العملية الاخيرة في نحاولة تحديث وتصليح المدونة اتت بنتيجة ..


فكرة لزيزة يا عبدو ..

دام التواصل بينك وبين جميع القراء

وانا هنا لاثبت ما وعدك به ..

اختك .emoo star ^-^

Dananeer said...

ياسيدى ياسيدى على المطار
الاقى عندك واحد كورى

Anonymous said...

انا مصرى مسلم عايز اقول لكم ياجماعة انتم جدعان فعلا
انتم مصريين بجد
أحمد القوصى

Anonymous said...

انا مصرى مسلم عايز اقول لكم ياجماعة انتم جدعان فعلا
انتم مصريين بجد