Saturday, March 10, 2007

رنة محمول

.. في (السي تي إيه)، على فكرة بأكره جدا كلمة سي تي إيه.. عموما هو الأتوبيس المكيف، المهم إنه المحمول رن.. تركته لمدة بسيطة كي أتأكد أن المتصل يريد الاتصال، ولا يرغب فقط (بالرن) للونس.

كان يجلس خلفي شابتان.. من النوع المتين، الضحوك، شعرت للحظة إن إحداهن وهي تضحك تفرغ (السي تي إيه) من الهواء.

رن المحمول، أنا أضع داخل الموبايل هذه الأيام رنة، خاصة.. لموسيقى قد لا يعلمها الكثيرون، ربما تكون مألوفة لدى البعض، هي لموشح لما بدا يتثنى، جاءني تعليق من الخلف، إيه ده؟؟ علاء الدين، حاولت زميلتها تهدئة الموقف، وذكرت لها أنها موسيقى معروفة، وأخذت تدندن مع الموبايل، حتى قطعت عليها انسجامها ورددت على الاتصال .

**

(ممكن أكمل عامي J ؟! )

**

الحقيقة.. أنا قيل لي قبل كده انه النغمة لما تبقى ميدي فايل، دي بتبقى حاجة تعبانة، وعيب انه الواحد يحطها على موبايل، وتماشيا مع هذا الرأي فكرت إنه أضع موسيقى أغنية حماقي الأخيرة.. لكن مش متشجع.

لكن الموسيقى اللي فعلا كنت عايز أحطها على الموبايل، ومن الصعب ان ده يحصل، هي المقدمة الموسيقية لأغنية بوس الواوا، للمغنية هيفاء وهبي.

بعيدا عن هايفا... الموسيقى رائعة .

**

بعد ما أنهيت المكالمة قررت أغير نغمة – علاء الدين على رأي البنت الكلبوظة – وحطيت نغمة Historia de un Amor ، مش عارف إذا كان حد هيحبها اذا سمعها او لأ، بس هي مألوفة، وجميلة ورومانسية... وكمان ميدي فايل، يمكن ده عيبها .

فيه عندي نغمة كنت حاططها أول ما جبت الموبايل، مش بشغلها حاليا خالص، أصبحت لما أسمعها بتجب لي انقباض، رغم انه الموسيقى حلوة.. هي New malaguena، توزيع للمقطوعة الشهيرة، لكنها بتفكرني بفترة قلق .

**

فيه نغمة هادية بشغلها في المحاضرات والميتنج والقعدات الهادية، لكن عمري ما سمعتها وحد اتصل بيا وأنا حاططها، هي مقدمة أغنية لبينك فلويد، The Division Bell ..

فيه رنات كتير حاططها وعايز أحذفها.

**

فيه زميلة ليا كل ما اتصل بيها ألاقي أغنية حسين الجسمي الأخيرة .. اللي هي أغنية فيلم بيتعرض حاليا !؟؟

اسمها إيييه؟؟

(بعد البحث في جوجل)

اسمها بحبك وحشتيني... اللي هو كل أما اتصل بيها بعد أول رنة ألاقي الجسمي بيرد عليا ويزعق في وشي.

عندي نغمة بستخدمها مع خاصية الاهتزاز.. يمكن عشان هي من موسيقى صالصا فالاهتزاز يبقى شغال صح هنا، برضه ميدي..اسمها مورينا، أصبحت مرتبطة معايا بشارع رمسيس والدوشة.. ليه؟، لأني مرة كنت في شارع رمسيس.. كنت فاكر ان الرنة دي عالية ودوشة، لكن محستش بيها خالص، لولا خاصية الفايبريشن .!!

**

مش عارف ليه بحكي في الموضوع التافه ده ؟، يمكن هروب من موضوعات أكبر وأعمق...!؟

ويمكن لأني متغاظ من رنات بعض الناس .... الواحد بيسمع حاجات عجيبة في الموبايل..

مثلا؟!

إيه معنى انه حد يحط قرأن رنة محمول؟؟؟ هو المفتي أفتى ان ده غلط؟! فيه الخير، أنا كنت محتاج رأي زي ده من مدة، لأنها حاجة ملهاش معنى، واحد يقرا قرآن ولا يقول دعاء ولا أذان، واروح قافل واقول ألووو.. بركة يعني؟!

فيه رنات تانية محتاجة فتوى، عشان انا زهقت منها..... رنة رأفت الهجان!؟.. رنة الضوء الشارد، رنة حسين الجسمي الأخيرة.. طبعا كل واحد حر في اختياره...

المهم... رنة محمولك إيه؟؟J

23 comments:

yara said...

أنا بقالى 5 سنين بستعمل نفس النغمات مخما إتغير الموبايل و نوعية النغمات
ها حبيبى كاظم الساهر للأصحاب
و حنيت لعمرو ديلب ل
*****

Lasto-adri *Blue* said...

اصلا مش عارفة الناس بتتعب نفسها فى الرنات ليه؟ تقريبا الحكاية ولا على بالى

من يوم ماوعيت على موبيلى وهو عليه موسيقى التانجو
la cumparsita
ولما اتعرض مسلسلى الكورى المفضل، عملتها عليه.. بس ماما اختدها منى... ساعتها اضطريت بدل اللخبطة اغير نغمتى
بقت اغنية "كنت فين وانا فين" لعبد الحليم.. يمكن اكتر من سنتين دلوقتى
:D

مابحبش عبد الحليم... بس لقيت النغمة ممكن تتسمع بوضوح وخلاص

bluestone said...

كام رنة تقريبا مش بيتغيروا
المقدمة الموسيقية للتحفة الفريدة فات الميعاد للست
اغنية كيفك انت للست فيروز
الساوند تراك بتاع فيلم شوكولا
موسيقى ألف ليلة وليلة
اتفرج على الحلاوة لمتقال :)

MSameer said...

Eagles Hotel California

و لما مسحتها بالغلط و ماكنش فيه ميمورى ارجعها تانى حطيت

bee gees how deep is your love

انا باستعمل ميدى و اللى مش عاجبه يسد ودانه!

Bella said...

ازيك ياعبده باشا

فينك مختفي من فترة ؟؟

انا مش غاوية تغيير نغمات الموبايل ولا وجع القلب ده

حاليا عندي نغمة زقزقة عصافير

جميلة جدا وفيها اشراق وتفاؤل


اما بالنسبة للى بيحط نغمات قرآن او دعاء فصراحة انا كمان باتضايق منه جدا
باحس بنوع من المزايدة وانه بيعمل اعلان عن نفسه انه متدين

مسألة مظهرية بحتة

sMrMr said...

ازيك ياعبده..اتأخرت المرة دى
رنة الموبايل..
انا كنت فى الاول بهتم اد ايه النغمة بتعبر عنى..عايشة بقى فى دور التعبير عن النفس وان انا استغل كل فرصة اعبر بيها عن نفسي...بس لقيت كل الاغانى اللى بتعبر عنى..للأسف بتشتغل وتخلص وانا لسة مسمعتش الموبايل ولو اشتغلت وخلصت مرتين كمان مش هسمعه..فقررت للأسف الاسيف ان انا احط نغمة من نغمات الجهاز..عالية جدا علشان ظروف ودانى
بس قبل مااحطها كنت حاطة كذا نغمة...منهمlambadaلkaoma
butterfliesلkarlwolf
وكنت احطة كمان مزيكا سمعتها على النايل تى في..بتيجى حوالى الساعة 7 وخمسة الصبح..ههههه فى تقديم برامج اليوم...
سجلتها وحطتها فترة
بس هى دى نغماتى

Entropy said...

انا مو من الجماعة اللي يغيروا رنة التلفون كثير ... يعني لما اشتري جوال اختار له نغمة من اللي موجودين عليه أصلا وتفضل هي دي النغمة لغاية ما ينسرق أو يسلم الروح :-)

ودائما ما تكون من النغمات اللي أشبه برنة تلفون و ليست أغنية أو موسيقى أغنية.
وكمان ما احب اللي يخلوا القرآن أو صوت الأذان رنة!!! دا اسمه عدم احترام للقرآن و فلسفة زايدة

:-)

walaa said...

معاك في رفض التوظيف التجاري للادعية والقرءان وسوء الاستخدام الحالي ليهم،، بالشكل السيئ ده،، وحقيقي كنت بلاقيها حاجه غير لائقة ..

عن رنة تليفوني .. بميل اكتر انها تكون مقطوعة موسيقية ومش اغنية .. وطبعا على راس قايمة الاغاني فيروز الجميلة ..

Anima said...

أنا كمان مش غاوية تغيير رنة الموبايل

صحيح عندي رنات كثير بس وحدة اللي باستعملها " امشي و سيبني" ل جيني، صحيح أنا ما بحبش المغنية دي بس عجبتني موسيقى الأغنية و حطيتها

مرة غيرت الرنة و حطيت "عمري عمري" للشاب مامي بس مانت نحس عليا و رجعت جيني

مين عندو رنة "كيفك إنت" لفيروز؟؟؟؟؟؟؟؟؟

عبدو ابقى حط " ياختي عليها ياختي عليها" ل ريا و سكينة هههههههههه

Epitaph said...

بحلم معاك لنجاة
للاغلبية

للاهل - انا لك علي طول

اصدقاء -hello Lionel Richie

و الرسالةsms : يا انا لفيروز

و اي حد غير المسجلين because you love me- Celine Dion

و ببدل ساعات و احط حاجات لفيروز و Hotel California , Love story!

اللي عايزاها
what a wonderful world

النظام حلو برضه

Epitaph said...

اه نسيت

انا فعلا باتغاظ معلهش من اللي حاطين الاذان او سورة من القران كرنة ع الموبايل

و مش عاجباني برضه اغنية حسين الجسمي
بتاع وانتي مطلعة عيني ده

حد يقول كدة بذمتك

:))

أحمــــــــدبــــــــــلال said...

فكرتنى بأعلان رنتك تعبر عن شخصيتك
كان الاعلان عن واحد مهم قوى بيلعب جولف و الخادم بتاعه ماسكله الشنطة و حاجاته و فجأة الموبايل رن بتاع الراجل المهم
لتجد الرنة ما هى ألا شخص ينادى عليه بقول
يا حمار ياحمار

و الفتى الذى يجلس مع والديه و جدته يتناولون الطعام لتجد رنة موبايل ما هى الا أغنية لأيمينيم فينظر الاب و الام للولد نظرة غاضبة لنوع الكلمات و الموسيقى التى يستخدمها
و فجأة تكتشف أنه هاتف الجدة نفسها

على العموم الرنة بتكون حسب الموود اللى أنا فيه خلال الايام و لا أهتم كثيراً بأضافة رنات ألا ما يناسب ذوقى مهما كان قديم أو غير مهم لمن حولى
فالرنة رنتى

أحمــــــــدبــــــــــلال said...

و على فكرة خليت زملائى فى الشغل كلهم يشيلوا الرنة اللى عبارة عن آية أو دعاء
لأنها برضه بتتقطع و تمنع أكمال الاية القرآنية
على العموم الرنات اللى عندى غريبة شوية

اللى بينى و بينك - عمرو دياب
billie jean - Michael Jackson
My heart will go on - Celine Dion
it's gonna be me - NSync
theme of FRIENDSموسيقى مسلسل
theme of X FILESموسيقى مسلسل
you are not alone - Michael Jackson

قلم جاف said...

جيت ع الجرح يا عبود ، فكرتني بموضوع "ليه ما تخليش لتليفونك رنة تكسبك حسنات وتدخلك الجنة"!

نجاح أغنية حسين الجسمي المذكورة علامة استفهام كبيرة ، هية معلقة مع ناس كتير لكن مش معلقة لا معاك ولا معايا أنا كمان.. ومستغرب من هيام أيمن بهجت قمر - كاتب الأغنية - بتطليع العين اللي كرره في أغنية نانسي عجرم "أطبطب وأدلع".. تلاقيه كان بيتفرج على فيلم "المشبوه" ساعة ما كان بيكتب الأغنيتين!

بالمناسبة .. العبد لله حيجيب بإذن الله محمول قريب ، وحيحط عليه النغمات القديمة منتهية الصلاحية لأني بحبها جداً جداً..

Anonymous said...

الـسـلام عـلـيـكـم



عـبـد الرحمـن أعتـقد إنـي اتـفق معــاكم فـي حـكـاية الأذان والقـران .. بـحس ان فـيها
اسـتهـتار واضـح بـكلام اللـه..
ماعـليـنا ..

انـا موبـايلي الان فـي حـالة حـداد منـ أكـثر من سـنـتـينـ
يعني على الصامت مسـكيــن الـي يـتـصل بيــا.. مـا اعـرف السـبب بالـظبط .اعتـقد انـه نـكد منـ عنـد نـفسي -.- بـس الـصراحـة اتفـتحت نـفسي إني احـط نغـمة جديـدة .لـلـموبـايل..بـعد مـاقرأتــ المـوضوع.. تـسـلم يـا اخي ..

بـس عجـبتني حكـاية البنـتين الي فيـ السي تي ايه .. حسيـتهـم مـسلـيات و ظـريـفات ... كـنت خلـيت البـنت تـكـمل دنـدنـة مع النـغمة .. بـدل مـاتقطع علـيها اندماجـها ..
^-^

تـحيـاتي ..

G.C.C.United said...

مرحبا يا باشا موضوعاتك دائما شيقة كما عودتنا من قبل لقد عدت بعد انقطاع دام لعدة اشهر فأحببت ان اسلم على اصدقاءنا القدامى و نعدكم بالمزيد

و دمتم

Abd El Rahman said...

عارف انا الرنة اللي تفكر الواحد بفترة قلق دي ، انا أكتر نغمة محمول بحبها الى الان اغنية ميتحكيش عليها لعمرو دياب

بس دلوقتي فضل شاكر : ابقى اطمن عليه

MiaMi said...

أنا ما أفكر ولا دقيقة في رنة المحمول

أشوف الجهاز أيش فيه نغمات

وأختار منها

فقط لا غير

إلا بعض الأشخاص المميزين أضع لهم نغمة خاصة

تكون مقطع من أي أغنية ودائماً تكون أغنية عربية

تحيّاتي لك ،،

my sold said...

استخدم النغمه الي تحبها انت مش هم

ومالك من الناس

layal said...

اتصدق بالله يا عبدو
ان موضوع اللي كنت حنزله الاسبوع هذا كان اسمه رنه الهاتف وامور اخري
بس حسيتوا زي ما قلت انت تافه :-)
ضحكتني البنت دي ولو اني استغربت في حد ما يعرف هذا الموشح ؟؟
عبدو تذكر اغنيه
احمد الجميري (وش عليا انا من الناس وش علي الناس مني )
اما رنتي فخليها للبوست

awres said...

والله هواتف اليوم اصبحت متقدمه جدا من فبل كنا ندفع اثمان الرنات التي نحملها اما الان اصبحنا نستطيع ان نحمل و نغير متى شئنا و نتبادل الرنات بخدمة البلوتس
نحياتي اخي عبد الرحمان

Abdou Basha said...

يارا
انا بحب حنيت لعمرو دياب جدا.. ذوقك رائع
:)
**
بلو

حمدلله ع السلامة يا ايمان.. وحشتني زياراتك يا باشمهندسة، عبدالحليم حافظ؟؟ أوكيه

جميل.. كمان الأغنية ذوقها راقي، بس ده مش ينفع في الزمن ده...
ارجوكي، فيه أغنية الحنطور جربيها ولو انها قدمت شوية.
:D
**
bluestone
ايه الروقان ده.. هتجبريني أقر عليكي :D
موسيقى 1000 ليلة وليلة رغم انها ممكن تكون مسموعة لكن جملتها أصيلة قوي.
ومقام نهاوند...على حد علمي
بليغ حمدي كان فنان رائع
**
MSameer

هوتيل كاليفورنيا.. بتفكرني بأيام ثانوي :))

أنا بصيت ع البروفايل بتاعك يا محمد لقيتك فعلا قدي تقريبا... دي كانت اغنية رايجة هي والبيجيز رغم انهم قدام أصلا.

مس هتصدق اذا قلت لك انه فيه نغمة الرسايل عندي أغنية لمايكل جاكسون.. ولإنها حاجة قديمة بحس انها حاجة تكسف

:(

**
بيلا..

منورة من زمان مش بتزوريني.. على فكرة أي موبايل عليه زقزقة عصافير بيفكرني يإنسانة كنت أعرفها زمان، وليها فضل عليا، حتى لما بسمع الزقزقة من موبايل ولد بفتكرها برضه .
:)
**
سمرمر

ازيك.. منورة البلوج..واضح انك بتعرفي لغات انا مش عارف النغمات دي.. هههه
على فاكرة زميلتي اللي حاطة نغمة الجسمي كلمتني برضه عن التعبير عن النفس عبر النغمات.
أنا مش مقتنع بكلامها
**
Entropy

ازيك.. انا غيرك مقدرش استخدم النغمات اللي جاية مع الموبايل، بفكر أحذفهم كلهم؟؟ أحس انهم مفروضين عليا
على فكرة أنا اساسا بكره الموبايل، أصله كمان مكلف.
:-s
**
ولاء
أنا بشكرك على إيميلك الجميل النهاره، يمكن لولاه مكنتش جيت النهاردة أعلق
أنا بشكرك بجد
**
أنيمة
حسرة عليها... :)
تخيلي لو في محاضرة أو اجتماع واشتغلت والناس مندمجة هههه
**

ابيتاف

الله عليكي.. تعرفي انا نفسي أعمل زيك كده واقسم الرنات حسب الجروبز اللي عاملها في الكونتاكت.
حلو الانجليزي اللي بالعربي اللي انا فيه ده، قال الجروزبر اللي في الكونتاكت قال!
:))
**

أحمد..

رنات جميلة يا احمد، أنا برضه مكنتش في البداية قادر أنسجم مع رنات القرآن دي، والصراحة مع أي حاجة دينية.
حاسس انها مش مكانها .
**
شريف

مبروك على الموبايل مقدما... وانا معاك فعلا على اغنية الجمي ، رأيي انها نجحت لإن الجسمي كان مفاجأة فيها
**

انونيموس

أنا عرفتك على فكرة على طول، ومش حقول اسمك
:)

وسعيد بزيارتك كتير، عايز أقولك لأ، شغلي نغمات الموبايل، واختاري نغمة بتحبيها، على الأقل ونس .
**
G.C.C.United

مرحبا بعودتك يا عزيزي، من زمان مش متواجد وظننت انك انقطعت عن التدوين، حمدالله على السلامة، وفي انتظار جديدك
**
عبدالرحمن

ذوقك عالي جدا
على فكرة من كام يوم بدأت أعيد اكتشاف فضل شاكر من جديد، الراجل ده فنان فعلا .
**
ميامي

يبدأ الاهتمام بنغمات المحمول مع التحويل بين نغمات outdoor; general; وغيرها هكذا تبدأ معي المسالة فأفكر في اضافة جديد .
لكن بيني وبينك السايلنت أفضل شيء، وأحيانا الأوفلاين
:)
**
ماي سولد

ألقيت بحكمة، أتمنى أن أعمل بها، واتجرأ أكثر..
فعلا الناس ما تستاهل انه الواحد يركز على اراءهم كده. في النهاية لابد ان ينتقدوا
:(
**
ليال

أنا فاكر الأغنية طبعا، لسه كنت من كام يوم براجع الموضوع هنا في المدونة وانا باضع الليبل...
انا منتظر جديدك
**
أوراس
نعم معكِ حق.. فواتير لتلفون المنزل وكذا فاتورة لهواتف أفراد الأسرة النقالة
:)

Me2 said...

الله يسامحك خليتني ادور على قناة فيها أغنية حسين الجسمي علشان أعرف إيه هي و للأسف تاكدت ( اكتر من الاول) إن الناس السميعة أصيبت بالصمم :)

عمري ما فكرت في رنة الموبايل مع إني كنت من الأوائل اللي جابوا الموبايل أيام ما كانت الخطوط لسه ب ألفين جنيه ومكانش فيه نغمات و اول موبايل جبته و فيه إدخال نغمات كان الكل يتمناه وقتها 3210
دلوقتي توصلت لفكرة إن الموبايل فايدته في الطواريء مش زي الإكسسوار الحريمي اللي كل واحدة بتغيره مع الطقم
وبالتالي آخر موبايل جبته كان أقل واحد لقيته قدامي في السعر لان هدفه الوحيد إن جوزي او اهلي يكلموني عليه لما مبقاش في البيت و على فكره مفيهوش إدخال نغمات :)
بس لو ليا في موضوع النغمات أفضل أي حاجة ل Enya
بالأخص caribbean blue