Monday, July 09, 2007

حالة تكلف: كلامك كلام مش عادي

تحزير : الكلمات القادمة تعاني من الركاكة.. والاحبااااط..... برجاء عدم تفسيرها على إنها حكد أو عوقد، هو بس قرف ومزاج منقرف، ضريبة عدم التكلف أو التخلف
**
س : مش فاهم ليه لسه فيه ناس مصرين على الكلام الكبير ؟
واحد يقولك: الواحد مهموم بالوطن، وواحد تاني يقولك : أصلي معجون بتراب البلد .معجون إيه وقرف إيه!؟ ليه التمثيل؟؟.. ما تخليك طبيعي زي البشر.. والناس اللي عايشين.. يعني هما اللي ولاد
)......(
والتاني يقولك أصل أنا زي السمك مطلعش من الميا.. لو سبت مصر أموت. ويبتدي يلأح بالكلام على اللي بيسافروا بره.
يا عم انت مش لاقي سفرية .. ارحمنا بقى؟
طب ما هو فيه حرامية زي السمك عايشين في البلد لحد ما بقوا حيتان
إييييييه الأسلوب ده؟؟ بيزوقوااا نفسيهم !؟
**
أكتر حاجة تضايق.. عبارة : وجعني كلامك أو كلام بيوجع
!!!!!!!!!!
إيه اللغة دي؟
احنا في مسرح الهناجر!!؟
**
من ضمن التكلف.. تكلف المخطوبين والمتزوجين حديثا
حاجة ....... فعلا......... شلل
قال يعني بيحبوا بعض.. وزي ما انتو عارفين عشان فيه شباب حالته هباب.. وفيه بنات حالتها زفت، فبيبقوا في حالة ذهول لما واحدة تلاقي شاب تتجوزه، والواد بيبقى مش مصدق انه بقى راجل، ومعاه حرمة..
وتكتشف بعد 5 : 10 سنة أشكال جديدة، وأسرة تجيب الفقر، وتكتشف انه كل اللي فات ده كان كدب
**
حاجة لاحظتها فعلا ومنتشرة بين البنات عن الولاد.. فيه نوع من البنات لما تتخطب او يتكتب كتابها، بتبقى مش طبيعية ، كإنها عدت من الصراط المستقيم ودخلت الجنة، وتلاقيها بتغيظ اللي حواليها بطريقة غير مباشرة.. على طريقة احنا فرحانين هيييييييه.. وعريسي حياخدني بالسلامة يا ماما
!!
والشاب تلاقيه عايش في دور المهموم.. وعامل فيها راجل وبيأثث بيت الزوجية بقىههه، وهو أبوه اللي جايبله الشقة والعربية وساعات بيصرف عليه وعلى امه
يعني الحالة كلها هباب.. وقاعدين بيتمنظروا ويتكلفوا ويمثلوا
**
انك تلاقي حد عادي بيتكلم على طبيعته زي بقية البشر الظاهر إنها أصبحت حاجة نادرة...
على رأي الأغنية.. كلامك كلام مش عادي
الظاهر انه لازم الكلام يبقى مش عادي ومتكلف عشان يبقى حلو و يغني له فضل شاكر
**
على هامش الرغي
الأغنية بتاعت كلامك كلام مش عادي أغنية جميلة جدا بس كلامها عجيب.. فيه حد يقول لحد بيحبو "جايني في زمان مش عادي"، ده أكيد كان مخنوق منه ناقص يقوله غوووور من وشي الله ياخدك

تحميل

7 comments:

Anonymous said...

السلام عليكم ..

هههههههه

عبد الرحمن يا عبد الرحمن ..ولك شو هاد يا زلمة ..

نفسي انسخ البوست دا ..وكل شخص اقابله اديه نسخه .. خلي الشعب يتثقف يا عبدو ..

ماشاء الله عليك الله يسعدك يا عبدو قول امين .

كلامك بجد ريحني ..كان نفسي اتكلم عن الموضوع دا من زمان لكني لم اجد الطريقة المثالية لفتحه ..

بس عندي تعليق صغير يا عبد الرحمن .. بالنسبة للكلام الجارح ..الصراحة حلوة .. بس في كلام ممكن انه يتعدي الحدود ويكسر الخاطر يا عبدو .

يلا ربنا يسعدك .. شكلك معصب اليوم xD

بالتوفيق ان شاء الله ..
انتبه على نفسك .
بارك الله فيك .

بحرينية said...

معجونين بتراب الوطن و ما يقدرون على فراقه و اهمه في الحقيقة مو محصلين سفرة لبره
هذول الناس قالوا الاوليين عنهم هالمثل الشعبي
" اللي ما يطول العنقود يقول عنه حامض "
او اذا بغينه نبسطها مثل ما قالت احلام في اول اغانيها اللي ما يطول العنب حامضن عنه يقول خخخ
نسبة التهكم في هذا البوست مركزة جدا
كتب البوست في حالة من النكد
بس يوم قريته
صرت اضحك
الله يساعدك يارب
و ان شالله تتخطى حالة النكد هاذي باقرب فرصة
شكرا يا عبدالرحمن على البوست
من القراء دائما ان شالله :)

summar said...

هههههههههه
ضحكتنى والله

..
فى فعلا ناس كتير بتغير طريقتها
يعنى انت قلت نوعية
فى ناس تانية مابتتكلمش بالفصحى بس تلاقيهم بيتعمدو يقولو مصطلحات جديدة
زى بنت خالى كل ماشفها تقلى بيس يامان
رغم ان انا مش مان خالص
..
بس برده فى ناس بتكون بتتكلم بجد..
..
اهم حاجة تكون اتكلمت براحتك...

Anonymous said...

وصف ممتع لحالة التمثيل الي نشوفها



شكرا

قلم جاف said...

أزيدك يا عبود من الشعر أبيات :

1-البهوات السادة منهم والسيدات اللي بيتكلموا عن الجواز والطلاق في غرفهم المكيفة ، وضرورة أن يتم تيسير الزواج للشباب ، وما تلاقيش واحد طلع بعقاد نافع ، دة ربما يتغير موقفه 180 درجة لما ابنه أو بنته تتجوز..

2-فيه بالنسبة للبنات حاجة غريبة .. فيه منهم اللي بتأكد لطوب الأرض إنها حتموت على عريس ، في الوقت اللي بتعامل فيه اخواتها معاملة غريبة بتلقي بظلال هباب على العيشة مع جوز المستقبل ، وفيه اللي بتقول إنها بتمووووووت في الأطفال ، وهي بتتخنق منهم على أتفه سبب ، وفيه اللي بتقول على مواصفات غريبة للعريس المنتظر ويتضح إنها مش عايزاها ، يعني متعرفش إن كانت عايزة الفقير ولا الغني ولا المثقف ولا الجاهل ولا المستقيم ولا الدون جوان ولا العيل ولا الناضج ولا اللي بين البينين!

3-ومتعاطين السياسة دول قصة في تكلفهم.. ومتعاطين الدين كمان .. الأمة الأمة الأمة!

وكل دول بيربط بينهم العيشة في الدور ، اللي غالباً ما بيفوق إمكانياتهم وقدراتهم ومؤهلاتهم ، والله أعلم!

Hiba said...

ya salaaaaaam 3leek ya 3bdo
ana a7eb el klam mn el alb da...
sade2 ... wade7 ... sareeeeee7 ...
w dy a7la 7aga ..
sorry 3la ta27'eer el comment :)

Anfal said...

على فكرة كاية البنات المخطوبين دي صح جدا
و انا باعاني منها شخصيا
اي و الله
اي واحدة من صاحباتي تتخطب تحسسني ان انا في الواقع ماليش لازمة
عارف المشكلة فين؟
ان البنات بيتباهوا بقلوب اللي بيحبوهم
فاهمني؟
يعني انا لانة خطيبي بيحبني بيهتم بيا يعني انا جميلة
يعني انا محترمة
يعني يوجد من يرغب بي و هيدفع فيا دم قلب اللي جابوه
بس انتي مش مخطوبة
يعني محدش بيهتم بيكي
محدش بيحبك
و محدش بيعبرك
تمت الترجمة على اساس اني بنت
و على اساس ان مفيش حد اعرفه مش متجوز غيري :)
شكرا :)