Sunday, July 29, 2007

تدوينة بالحبر السري – ما تقرؤه غير مكتوب

  • مهنة حقيرة: الصحافة - مهنة مهينة: التدريس - مهنة خنيقة : المحاسب - مهنة ليس لها معنى: الباحث (والكاتب) - مهنة ذهب عنها العلم: الطب - مهنة استعراض: الهندسة - مهنة العاطلين: الضابط - مهنة الوضوح والشفافية: الدعارة
    **
    لأسباب شخصية بدأت بالصحافة، لأنه لم أقابل حتى الآن شخصية في هذا الكارير، أو سمعت عن شخص يجبرني إني أحترمه أو أتعاطف معاه
    لا يوجد من يسير في طريق المثالية رغم الادعاءات التي تتلى علينا ليل نهار، حتى من به أمل، لابد من تصرف مقزز يفسد عليك إحساسك بالأمل
    كمان لما تشوف ضحايا هذه المهنة، لازم تصاب بالـــــــــــ
    **
    أما التدريس فلأني شاهدت المدرسين في المدارس أزاي بيكون للفراش دور أهم منهم، فده سبب لي عقدة، كمان عبثية أجواء المدرسة اللي كنت فيها في ثانوي كان ليها دور.
    مدرستي اللي اتخرج منها فاروق الباز، افتكر الآن مشهد الحمام القذر بتاعها اللي مكانش لقضاء الحاجة، لكن لأغراض أخرى، وافتكر كمان منظر الحوش اللي كانت أحيانا أوقات الحصص زي الفسحة .. عادي
    الخ
    **
    أصعب شيء في مصر... إنك تعيش الحياة المصرية، وتتعمق فيها ، وتتأملها
    حتتعب .
    خصوصا لما تلاقي ناس كتير إما مغيبين، أو منافقين
    الآن أنا أكتب بنرجسية.. لأسجل هذا المود، خصوصا في المرحلة التاريخية الهامة دي من حياتي
    **
    مهنة المحاسب فعلا مهنة خنيقة.. لما خصوصا إذا كنت عايش أربع سنين أو أكتر على ورق الملازم وبعدين تيجي تشتغل يقوموا يعلموك من أول وجديد
    **
    مهنة الباحث والكاتب.. وممكن نضيف ليهم مهنة الاديب، وخصوصا لو أديب شاب، هل ممكن يكون فيه حد منهم مفيد !!؟ لما تبقى الشغلانة دي مجرد لقب لأي حد، وملهاش أي فايدة هتعود على بلد متخلفة، تبقى حاجة ملهاش معنى
    **
    نتيجة تجربة ذاتية، كان ليا تجارب مع الدكاترة من كل صنف ولون، أبشع شيء في الأطباء الآن، هو إنه يكون دكتور حمار ومعندوش أي علم، وهو مش حاسس، حتى اللي جاي في مكان أكاديمي بالكوسة، غالبا بينسي ويعيش الموقف
    **
    رغم انه النسب العائلي يفرض إني أحترم المهنة دي.. بس العداء للهندسة سببه ملاحظة نسبة الرسوب الكبيرة اللي شفتها في أصدقائي اللي في هندسة، وكمان ملاحظتي أن أغلبهم مش مقتنع بالعلم نفسه، بس مقتنع باللقب، وانه كان في مجموعة الهندسة في ثانوي
    **
    شفت ظباط.. أحاول أعرف شغلته إيه، معرفش ؟؟ إيه العلوم اللي بيدرسوها اللي تخلي النتيجة 99% معرفش ؟
    ومش مهم أعرف.. ولا أي حد يعرف
    **
    المهنة الأكثر وضوحا هي الدعارة، لكن أعترف إنه فيه مندسات دخلوا المهنة، بيمارسوا مهن تانية خالص، بدءا من طالبة لحد إعلامية، دول اقتحموا مهنة الدعارة وبيمارسوها بدون شرف، لأن العاهرات كانوا بيبقوا أوضح من كده، ومعندهمش إلا الدعارة، مش بيمارسوا الدعارة جنب شغلهم
    فعلا فوضى
    **
    كلمة أخيرة، وتبرير

    كل المهن السابقة، مهن شريفة ومحترمة، ولا يمكن لبلد أن يستغنى عنها أبدا – عدا الدعارة – لكن كان لا بد أن أسجل انطباعي هكذا، فمن مر من هنا وتضايق، فلا يحزن، فتلك مجرد رؤية ضيقة لعالم واسع
    عن نفسي سأمر من هنا يوما ما واتذكر، واقارن

5 comments:

Lasto-adri *Blue* said...

متوقعة انك تقول انك متوقع انى اعلق
:D
اصل لا يمكن اقرأ عن هندسة وما اتكلمشى


بص يا عبد الرحمن... نسبة الرسوب فى هندسة عالية.. دا حقيقى جدا.. عشان دراستها مش سهلة ابدا ومحتاجة مخ اصلا نضيف.. واللى بيحصل ان فعلا معظم المناهج قديمة الى حد ما.. وطريقة تدريسها عقيمة الى حد كبير.. بس فى الآخر هندسة تطلع منها بمخ نضيف
:D
واللقب حلو صحيح.. بس التغيير اللى حصل فى شخصيتى عشان الهندسة خلانى أؤمن انى لو لم اكن مهندسة.. لوددت ان اكون مهندس.. من غير تاء مربوطة
:P

ومش ح فتى عن باقى المهن لاحترامى التام لها وتقديرى لكل العاملين فيها.. غير انى لا افقه فى اى شئ بعيد عن مجال دراستى

:)

Abdou Basha said...

ما هذا ؟
جئتِ مدافعة منافحة عن الهندسة..
كده حتشجعي المهن التانية إنهم يشتركوا في حملة ضدي؟
:D

فعلا معاكي حق، الهندسة أسلوب تفكير، ونظرة للحياة، ده في حالة اذا كان العلم قد انتفع به، هكذا علمني والدي عاشق الهندسة
**
سيبك من الكلام اللي فوق، دي نفحة غضب وتعاسة... وان كانت تحمل بعض الصدق

Anima said...

أنا ما ليش في الهندسة بالرغم من أن أغلب عائلتي مهندسين و بامتياز

و كمان الكتابة عائلتي مشهورة بكتاب

الصحافة بأعشقها بس لسة ما اتوفرت ليش ظروف علشان أدرسها

بس أول مرة أقرا لواحد كاره المهت دي للدرجة دي

طيب سؤال ليه كتبت الموضوع باللون ده عايز تجيب لينا عمى الألوان

:)

تائهة فى أرض الأحلام said...

فعلا رؤية ضيقة لعالم واسع

فالعالم فيه الكويس والوحش
وفى الصحافة ناس أفاضل علمونى كتير وعلمونى ازاى اكون صحفية محترمة مهنيا وأخلاقيا وعلى فكرة يا عبد الرحمن
عايز تشوف صحفيين بحق محترمين أبعد عن أصحاب الشعارات
شوف هيكل وفاروق جويدة وكتير غيرهم
أبعد عن بتوع الجرائد الواقعة وخاصة الستات منهم

بالنسبة للمهن
انت نسيت مهنة المرشدين السياحين وكم الحقارة والنصب اللى بيمارسوه
وأعذرنى ان قلت لك انى اشعرأن هذا البوست ليس الا تفكير بصوت عالى للبحث لك عن مهنة جديدة تحاول أن تشعر فيها بالاستقرار والامان والوقار
وان كنت فعلا تبحث عن ذلك فاخرج منها
وهاجر برة

بيبو said...

طبعا واضح جدا الحاله اللي بتمر بيها من غضب و... على البلد بكل ما فيها بس فعلا كل المهن اللي انت اتكلمت عنها ليها دور مهم ما نقدرش نستغنى عنه اه تم تخريبها مؤخرا لكن لكل قاعده شواذ ولسه فيه الكويس برده الغريب كلامك عن مهنة ذي الدعاره ما كنش يصح تذكرها وتساويها بباقي المهن المحترمة اللي ذكرتها - وقعت منك دي يا عبده باشا - بس سماح نظرا لحالتك