Sunday, October 21, 2007

معاني

س1 : إيه معنى إنه البنات يلبسوا بنطلونات ضيقة والولاد يلبسوا بنطلونات واسعة ؟

جـ1 : عيب خلقي

س2 : إيه معني إنه هيئة النقل العام تدهن أتوبيساتها الخربانة بلون أخضر – مميز - وتعلي الأجرة ؟

جـ 2: عشان تحصِّـل تمن الدهان والبوية

س3 : إيه معنى إن واحدة كل ما أكلمها بالذوق - مضطر - تتصور إني معجب بيها فتترسم عليا وتخنقني وتعطلني ؟

جـ3 : عادي فيه ناس اتهبلت حضرتك

س4 : إيه معني إني مستحمل واحدة زي اللي فوق دي ومن شابهها ؟

جـ4 : ده لأني بخوض تجربة علمية، فلازم أكمل للآخر

س5 : إيه معنى إني أركب مع سواق تاكس، فيكرر عليا عبارة واحدة، هي هي.. خمس مرات ورا بعض بدون أي سبب أو مقدمات "العربية بتاكل بنزين يا عم الحاج"، "بتاكل بنزين يا عم الحاج"..الخ ؟

جـ5 : راجع الإجابة رقم3

س6 : إيه معنى إني بزهق بسرعة، وبالذات لو في مكان فيه تكلف..؟

جـ6 : لم أنل القسط الكافي من التدريب على التبلد والتناحة والنفاق

س 7 : إيه معنى إنه في يوم أركب 3 مواصلات عشان أروح الشغل الصبح، وأرجع في مواصلة واحدة؟

جـ 7 : النية ماكنتش سليمة وأنا رايح، واتعدلت وأنا راجع

س 8 : إيه معنى إنه أغلب الشباب على موقع فيسبوك متصورين بالمايوه ؟

جـ 8 : كلهم اشتركوا في الصيف

س 9 : إيه معنى إني أبقى عارف المفروض أعمل إيه عشان مستقبلي، ومش عارف أعمله ؟

جـ 9 : مفيش وقت يا عم الحاج

س 10 : إيه معنى إني أسأل الأسئلة دي وأنا عارف الإجابة مقدما ؟

جـ 10 : أصل دي حصة مراجعة

6 comments:

Nada said...

باشا يا عبد الرحمن

:))))

Anonymous said...

السلام عليكم ..

عبد الرحمن .. كل عام وانت بخير وصحة يا رب.

ههههههه حقيقي باشا يا عبدو.

بس انا مبسوطة من حاجة
^-^
بديت احس ان لو وحدة سألت عبدو .. وكانت ناوية تفتح موضوع في تاكسي او ميكرو.. عبدو حيديها فرصة ان شاء الله هههههههههههههه


تساؤلات عميقة جدا .. اتمنى انك تقدر تحقق حلمك يا عبدو .. ويكون في وقت لكل حاجة في حياتك ..

معليش اتكلمت كثير اليوم هههههههه

سلم على هشام ..

انتبه على نفسك . وكل عام وانت بخير ..

اختك ايمان .

Anima said...

ربنا يحفظك من العين

ده انت حافظ كل الأجوبة

طيب امتى نتيجة الإمتحان؟

walaa said...

حلـــــــوة

;)))

Abdou Basha said...

Nada
أيوه فعلا.. باشا
نسيت أقول كمان إني متواضع جدا
:D
**
إيمان العزيزة
إنتي فيييين من زمان؟
شكرا على مرورك الجميل سلامك راح يوصل لهشام.. ان شاء الله أطمن عليكي أكتر قريب واعرف عملتي ايه في دراستك
**
أنيما
الامتحان على مدار العام.. كل يوم
هو امتحان الحياة
إمممممم!!
أنا بقول كلام كبير قوي
:)
**
ولاء
شكرا ليكي جدا
:)

بحرينية said...

اسئلة في الصميم و اجابات منطقية
ما اعتقد تحتاج تراجعهم لانهم المفروض راكزين في المخ من كثر ما تتكرر حالات من هالنوع


مبدع يا عبدو باشا

:)))