Saturday, October 27, 2007

عارف ومش عارف؟!

عارف لما يبقى حد عارفك وانت مش عارف انه عارفك، وهو عامل انه مش عارفك، وتكتشف انت بعدين انه كان عارفك وبيعاملك على الأساس ده؟

عارف لما تبقى عارف حد وهو عارفك، لكنك مش عايز تعرفه انك عارفه، ولا هو عايز يعرفك انه عارفك، وتعملوا انكوا مش عارفين بعض.. وده من غير سبب واضح؟

عارف لما تبقى عارف حد.. وهو مش عارفك، وانت تعمل انك مش عارفه، وتتعامل معاه كإنكم مش عارفين بعض؟

عارف لما تبقى انت وواحد مش عارفين بعض بس تعملوا انكم عارفين بعض عشان حاجة انتو عارفينها ؟

ده يبقى اسمه إيه؟؟

أ - استعباط
ب - انعدام شفافية
جـ - ذكاء اجتماعي
د – تخلف عقلي

هـ - اجابة أخرى

13 comments:

bluestone said...

افتكر انه دايما بيكون ذكاء اجتماعي
في المقام الأول
لاننا بنتعلم المهارات الاجتماعية اللازمة اننا نتجنب بيها الحرج لنفسنا وا لغيرنا مع الوقت
كله جزء من المسرحية الكبيرة اللي كل واحد بطل فيها من زاوية ما

awres said...

هذا اسمه ذكاء اجتماعي و خداع لانا نعرف اننا نعرف و انمثل اننا مش عارفين كل هذا تمثيله نحسن بها دور الكذب
تحياتي اخي عبدو

Nada said...

ذكاء اجتماعي
هو بالاحرى

social adaptation

اللي هي
اتقان الكذب دون الشعور بالذنب او الزيف

يعني دور انا حاليا لا اتقنه

شــــمـس الديـن said...

و الله شوف
انا بختار اجابات اخري ...

انا اتعلمت اساسا اني التبع مبدئ لذيذ اوي ....
و افتكرت كلمة صديقة كانت دائما بتقولها ( و مش عارفة دا حديث ولا قول مأثور )

يعني اللي عمل كدا في كل الحالات مش لازم ان الواحد يكون وحش او افاق او بيستعبط او اي شئ ... بس زي ما بيقولوا that's the way it is

اصل شوف الواحد من فرط ايقاع حياتة بيبقي متوجس خيفة من انه يدخل اي حد حياته ... او لنقل مش عايز يضيف عبئ جديد و انه يكون عليه واجب و التزام اجتماعي تجاه شخص ما ...

و عادي الواحد ممكن يبص للامر من منظور كويس ... لانه و نظرا للانشغال الكبير بيلعب الادورا دي مع اشخص اخري ... العجلة بتلف و تبادل الادوار بيحصل ... و لما الواخد بيلتمس للناس الاعذار هو اولا نفسة بيرتاخ و ربنا بيرزقة بناس تلتمس له الاعذار هي كمان :)))

بس هو انا عندي ليك سؤال ...انت ليه مش بترد علي الناس اللي بيمروا عليم في المدونة ؟؟؟

Anonymous said...

السلام عليكم ..

عندي اجابات اخرى ..

الاولى والثالثة (( تنفيض ))والتانية استعباط والرابعة ذكاء اجتماعي ..

فين جائزتي ^-^

حلو البوست .. خلاني افكر وافتكر حاجات كنت كـــنــت اتمنى اني انساها ههههه

يلا كلو بأجرو ان شاء الله يا عبدو

تسلم ايدك على البوست .. وانتبه على نفسك .

اختك ايمان .

Abdou Basha said...

ماريان
فعلا هي مهارة أوقات بتكسب الواحد كتير، يمكن سبب الحيرة إنها اوقات برضو مش بتمشي صح أو زي ماانتي عايزة
يمكن يكون برضو العيب في الحالة دي في الشخص، بس دايما بحس إن الأجواء الطبيعية بعيدا عن التصنع هي الأفضل
**
رشيدة
رأيك إنه ذكاء اجتماعي وخداع أيضا
أنا متفق معك، بس عايز أعكسها، خداع وبعدين ذكاء اجتماعي
:D
**
ندى
لست وحدك من لايتقن هذا الدور، أكبر مشكلة في هذا النوع من الكذب - ان اتفقنا على انه كذب - هو ان البعض ليس لديه الصبر على كمية الضغط المتولدة عن اجواء التكلف والادعاء والعبط التي تقع هناك.. هناك في مجالس الذكاء الاجتماعي
:D
**
شمس
ازيك؟ ساعات بتأخر في الرد.. وكمان لما التعليقات بتبقى جميلة بخاف أرد، عشان بحس اني هبوظها
:)
عجبني جدا في تعليقك إنك اخدتي الجانب الكويس في الموضوع، جانب الدفاع.. وهو فعلا حقيقي ووراد جدا، يعني مثلا ممكن حد تعرفيه يخاف يسلم عليكي لا مش تردي عليه.. هو طبعه كده، وممكن واحد تاني يكون متعكنن.. أو متحفظ
بس برضو بيبقى فيه حالات فيها شبهة تعمد، لأغراض أخرى خصوصا في الحياة العملية، هي دي اللي بتمثل ضغط وانزعاج للإنسان
**
إيمان
شكلي قلبت عليكي المواجع
:)

اجابتك الرابعة صح 100% ملهاش حل تاني، وعموما احساسي إنهم الأربع مواقف في ظروف كتير خصوصا في الحياة العملية بيكون المحرك الرئيس وراهم هو المصالح

summar said...

حلاوة روح

Ahmed Al-Sabbagh said...

نظرا لتميز مدونتكم فقد تمت اضافتها لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نذكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

Mirage said...

طيب بما إنى اتعرضت للنوع الأول من المواقف .. بقول إنه بيكون لغرض ما فى نفس يعقوب

يعنى اللى بيتعامل بالطريقة دى أكيد بيكون فيه غاية فى نفسه ومش هاتتحقق لو عرفت أنت إنه عارفك


المهم يعنى .. أنا أخترت إجابة أخرى
(",)
تحية

walaa said...

عارف لما تلاقي نفسك ابتديت تكره عمرك لانك ممكن تكون فاشل في الكدب ايل هو تأدباً بقوا يسموه مهارات اجتماعية .. اي نعم انت مش ملاك بس كمان بتموت وتكره الكدب والخداع ..

بس هو انا ممكن اختار كل ما سبق

:D

بحرينية said...

بوست هايل حقيقتن و يبقى الاقتراح
اشرايك تعرض هالكلمات على عمرودياب عشان يغنيها كجزء ثاني حق اغنيته الاولى اللي تقول في مطلعها انا عااااارف و مش عااااارف
لووول
شكرا لك يا عبدالرحمن على البوست :)

Abdou Basha said...

سمر
اجابة جديدة، ومتشائمة
إنتي شكلك مودك متغير!؟
:)
**
أحمد الصباغ
شكرا لك يا أحمد، سعدت بالتعرف على صفحتك الجميلة
**
ميراج
معاك حق.. كمان بحس انها دايما بتكون غاية لئيمة اللي في نفس الحالة الأولى، أو على الأقل تعالي، وعدم ود
**
ولاء
ازيك.. أكيد طبعا ممكن تكون كل الإجابات، وممكن الاجابات تتبدل حسب انطباع الواحد من فترة لفترة
تعرفي المشكلة.. في عدم القدرة على التكلف والتزيد والتجمل.. صفات البعض يراها مقززة ومتعبة
أنا أحد هؤلاء
**
بحرينية
:D
طبعا ممكن، وهتنجح جامد كمان

شــــمـس الديـن said...

اوبا
انا لما قرأت تعليقي لاقيت اني مش قولت ايه هي كلمة الصديقة اللذيذة

" التمس الخيك سبعين عذرا فان لم تجد فلم نفسك "

و الله انا في الحياة العملية اساسا بعد ما اتخرجت من الكلية خلاص ... اصدقائي هما اللي طلعت بيهم ... لاني عرفت طباعهم و كنت معاهم بقالي 5 سنوات

منين هجيب ناس تانية هعاشرهم و هتعامل معاهم بدون اي مصلحة ار غرض زي كا كنا في الكلية ؟؟؟

يالا دمت بكل الخير :)