Saturday, November 10, 2007

أرض النفاق

أربع من كن فيه كان منافقا خالصا

‏‏إذا حدث كذب
جيت متأخر ليه؟ -
أصل المواصلات كانت زحمة قوي النهارده.. كل سنة وانت طيب بقى -
**
والله يا باشا البيعة دي واقفة علينا كده بخسارة -
**
مانشيت : مصر اجتازت اختبار الإصلاح الاقتصادي بنجاح


وإذا عاهد غدر

الثامن والعشرون من الشهر الفلاني : لأ اطمن خالص، إن شاء الله العقد هيتجدد مع بداية الشهر الجديد
الثلاثون من نفس الشهر الفلاني : معلش مش هنقدر نكمل العقد معاك، وده ملوش علاقة أبدا بشغلك
**
قبل الامتحان : الأسئلة دي الامتحان مش هيخرج منها.. ركز عليها كويس
بعد الامتحان : يبني مين اللي قالك الكلام ده، أنا قولتلك كده.. انت مابتفهمش
**
إنتي قولتي لسارة حاجة عن الموضوع اللي كلمتك فيه امبارح؟ -

معقولة.. بقى معقول أقولها برضو!؟ -

أووففف... أومال هي عرفت منين بس؟ -


وإذا وعد أخلف

مسؤول حكومي : لا نستطيع توفير هذا الكم من الوظائف كما يظن البعض، لأنها ستكون وظائف غير عملية وصورية، لذا نطالب الشباب بأن يحسن من مهاراته في برامج الدولة المعدة لهذا الغرض
**
إيه يا حاج؟ انتظرناك امبارح أنا والجماعة عشان تجيب لنا الراجل معرفتك اللي هيحل المشكلة

معلش حقك عليا.. ياريت تأجلها بس كام يوم عشان عندي زحمة في الشغل
**
بابا إنت وعدتني ندخل دي إس إل في أول الشهر -
لا موعدتكش.. وما تفتحش الموضوع ده تاني، وإلا هفتح لك نافوخك -


وإذا خاصم فجر
شوفت كاتبين عني إيه يا عماد؟ -
ما انت عارف يا فندم بيعملو كده ليه.. رئيس التحرير زعلان منك عشان حضرتك معبرتوش في الحفلة اللي فاتت
**
بنتك عمرك ما هتشوفها، لو اتنططت.. وانا قاعدة عند أهلي ومش راجعة، وإياك تتصل تاني
**
وجماهير النادي الأهلي بدأت في إلقاء الزجاجات الفارغة والسباب يطال كل أعضاء الفريق والجهاز الفني وهم في طريقهم إلى المنصة للتكريم من السيد الرئيس........... والأمن يحاول تهدئة الجماهير المحتدة.. سبحان الله نفس هذه الجماهير كانت من دقائق تهتف للنادي الأهلي ولاعبيه

4 comments:

جـيـداء said...

مجتمعنا الكريم
بحاول ادور على اى حسنة فيه مش لاقية
كلنا اتأصل فينا صفات المنافقين
بحس انها بقت جينات متوارثة
ربنا يبعدنا عن النفاق و المنافقين

بحرينية said...

من جذي مو قادرين نرتقي
اللهم يا كافي مجتمع مشحون لعينه منافقين
بس مو هاي المشكلة
المشكلة انهم ما يدرون انهم منافقين من خلال ما يمارسونه من سلوكيات يعتقدون انها عادية !!
شكرا لك يا عبدو باشا على هكذا حكم نقرأها من خلال تدوينك المتميز
:)

Abdou Basha said...

جيداء
أصعب شيء إنه يكون النفاق جزء من حياة الانسان اليومية
**
بحرينية
كثير من الروتينيات تحمل بداخلها مصائب، سواء رشوة او نفاق او غيره.. ربنا يهدينا للأفضل

تائهة فى أرض الأحلام said...

أجمل مافى الموضوع أن بقى عندك عين ثاقبة وناقدة وراصدة لتصرفات البشر المصريين اللى هو احنا
بس ياترى انك تلاحظ الطباع المصرية الخالص اللى بتتكرر فى كل مكان خلتك تبعد عنها ولا انت برده زينا