Tuesday, February 27, 2007

تضامنات

فيه حاجة اسمها تضامنات برضو؟؟

يلا عادي بقى J

**

التضامن الأول:

ــــــــــــــــــــــــــ

العزيزة بحرينية أرسلت استجوابا...منذ مدة، وأريد حله وتضامنا معها، أجيب الآن..

استجواب الكتاب

ـــــــــــــــــــــــــــــــــــ

التقط أقرب كتاب إليك.. افتح الصفحة 123, وعدّ من بداية الصفحة إلى الجملة الخامسة ، اكتب الثلاث جمل التالية لتلك الجملةالخامسة ” في مدونتك .

"ولو أن هذه الاشتراطات كانت تستهدف الانحرافات الخاصة في البرلمان أو في المجالس الاستعمارية إلا أنها توضح أن الشعب يريد أن يكون حكامه امتدادا له وليسوا ملوك – فلاسفة محتكرين شغل الوظائف أو حتى مندوبين دائمين، إن طبيعة الإمكانيات هي التي أسرت سكان بنسلفانيا الأحرار بوجه خاص ونقلتهم بعيدا جدا من مفاهيم تقليدية عن الحكم."

الكتاب :

FROM COLONY TO COUNTRY

The Revolution in American Thought, 1750-1820

المؤلف : رالف كيتشام

التضامن الثاني :

ـــــــــــــــــــــــــــ

من الواضح انه كريم عامر أول مدون يحبس بسبب مدونته، قد تضامن معه البعض بالفعل، في الوقت الذي تضامن عدد ليس بالقليل –دون اتفاق – ضده.

لكن الحقيقة والصراحة التي لست مطالبا بقولها، أجد نفسي في حالة من (اللاتضامن) مع كريم، ليس هو وحده.. إلا أنني، أعتقد أيضا أن السجن لن يفيده او يفيدنا كثيرا، لكنها النهاية الطبيعية، ولا أشعر بالصدمة لها .

أعتقد أننا الآن في مرحلة العمل داخل الفساد، ولسنا مضطرين أن نفسد داخل الفساد.

هذه وجهة نظري.. وهي مختلفة عن وجهة نظر آخرين.

التضامن الثالث:

ــــــــــــــــــــــــــ

فريدة.. كتبت حاجة جت على الجرح، ومش قادر إني مأتضامنش معها، لكن أعتقد انه هيكون تضامن فاشل... هي كانت معترضة كتير على الموسيقى اللي بتكون في المدونات – أنا أقدر أضيف المنتديات كمان – واللي بتعمل فيها الموسيقى تلقائيا مع فتح الصفحة أو تقليبها .

عايز أقول، أنه أنا ساعات بكون بسمع مزيكا أسباني او فلامنكو، أفاجأ إنه في نشيد ديني، أو مزيكا من حفلة أو حد معرفوش بيغني.. وساعات بكون فاتح كذا صفحة وادور الصوت جاي منين.. وساعات يكون الصوت اعلى من الموسيقى اللي انا مشغلها .... الخ .

طبعا مش أقدر إني أفرض رأيي على حد، لكن أقدر إني أتضامن مع حد زيي .

أنا متضامن مع فريدة.

التضامن الرابع:

ـــــــــــــــــــــــــ

التضامن هنا مع المدون السعودي ماشي صح.. ومش فاهم خلفية توقفه، لكن أقدر أفهم انه كتب عنوان البوست "إيقاف" وهو يقصد توقف عن التدوين، أوكيه، سأتضامن معه وأنا لا أعرف التفاصيل، لكني اشعر بها .

التضامن الخامس:

ــــــــــــــــــــــــــــــــ

العزيزة ساسو.. أشعر إني ابتعدت عن مدونتها كثيرا، ليست هي وحدها، لكن أشعر بالابتعاد عن أشياء كثيرة، الآن أتساءل مالذي اقترب منه إذن؟؟

أتضامن مع ساسو في السعي الى الحصول على مزاج "السنافر"...!!

تقول ساسو: "الغريب اني بقيت باعرف اتحكم في اعصابي وباعرف اناقش نفسي واحدد الصح من الغلط بحياد ، جايز تكون صدفة وجايز يكون الجنان ده جاب نتيجة اللي اعرفة اني كنت ولا زلت اقل البنات مشاكل واقلهم احتياجا للنصايح، ودي كانت بدايات موود السنافر ".

وانا أتضامن معك في البحث عن (عدم البحث عن مشاكل).

التضامن السادس:

ــــــــــــــــــــــــــــــ

أتضامن مع أنيمة بلا حدود في خطتها الجديدة، واتمنى ألا تتخاذل عنها ابدا، فقد اختارت أن تولد من جديد، تقول : "و أقر أيضا أنه بعد تفكير دام لمدة، قررت أن أغير حياتي بالكامل، قررت أن أولد من جديد ( العام الماجي بحال هاذ الوقت ما تنساوش تقولوا لي عيد ميلاد سعيد) ".

Wednesday, February 21, 2007

مع الله


من منا ليس في حاجة إلى الله؟!!

في كل وقت.. وكل حين، لكل أمر، لكل حاجة...

أشعر أنني الآن هذه الأيام في حاجة إلى الله، ليس لحاجة، فحاجتي إلى الله لن تنقطع، ولكن لكي لا أبتعد عنه، ربما يكون إحساسي الآن أنني في حاجة إلى غار أذهب إليه وحيدا كي أتعبد فيه دون أن يراني أحد.. ربما في حاجة إلى رحلة حجازية اجلس بجوار الحرم، أو في المدينة المنورة أفكر في الله فقط.

الحياة تمر... وأسوأ ما حدث هو الانخراط فيها، ففي النهاية لن يتبقى منها شيء.

حالة زهد؟؟

لا أعتقد.. إنما خوف وخشية من صلة في حاجة إلى إعادة إحيائها...... مع الله .

تسيطر علي هذه الأيام فكرة.. عن الموت المبكر

أتذكر كل من ماتوا فجأة، أو تعرضوا لحوادث.. أتذكر من فقدتهم، ومن شغلهم العمل حتى أفاقوا ساعة الموت، أشعر أن الحياة لا تستحق، وان كانت تستحق.

تستحق عمل، لكن لا تستحق اكتراث.

مجرد أفكار

ليست غما، إنما فكرا

مشاهد من الشارع

كان من المفروض أن ينشر يوم 15 فبراير، قبل حرب بلوجر بيتا الأخيرة، والآن بعد أن عم السلام، ندون ما كتب هنا..

من كام يوم.. عملت بنصيحة جاءتني إني انفرد بنفسي، وفعلا، اخدت نفسي ونزلنا بلا هدف، لأمارس معها هواية قديمة.. هي التسكع في القاهرة.

وسط البلد بالليل في وسط الأسبوع، بتكون حاجة ملهاش معنى، معرفش !!؟ يمكن أنا كنت شايفها كده، بس عموما أنا مش مفتون بوسط البلد على عكس والدي اللي بيعشقها نظرا لأن أسرتنا كان ليها محلات هناك .

..

ما علينا..

**

في رحلتي.. شاهدت طفل صغير.. تقريبا في شارع شريف.. مش فاكر!!، تقريبا الولد ده قريت عنه في كذا مكان، لدرجة إني حسيت في وقت من الأوقات إنه مفيش صحفي في مصر ما كتبش عنه .

الولد معاه كتاب وقاعد في الشارع اللي تنقصة الإنارة.. بيذاكر، وعايش في دور الدحيح .

كنت عايز أقف أسأله.. أكلمه .

لكن كانت معايا نفسي.. وحسيت إنها حتبقى قلة ذوق انه اترك نفسي لوحدها واروح اكلم عيل صغير العالم كله اتكلم معاه، ومفيش شيء اتغير .

**

وصلت العتبة، والموسكي... على الساعة عشرة ونص مساء كانت المحلات ابتدت تستعد للإغلاق، لكن كان فيه سبب تاني.. كان فيه عقيد شرطة بيطوف ويجول على قدميه لسبب، إنه يكلم أصحاب المحلات المخالفة لإنهم حاطين بضاعتهم خارج المحل، فكان بيبعت العساكر يخلوهم يدخلوها جوا ..

حالة قلق كانت هناك.. قلق ممزوج باستهبال.. بحالة مشاغبة .

حسيت هناك ازاي إننا احنا اللي بنهين نفسنا بمخالفة القوانين.. الظابط مش غلطان، إنما ممكن انه يتحول الى غلطان لما يستغل خطأ الآخرين .

الكل كان بيؤدي تمثيلية، وكل شيء كان هيرجع زي ما هو تاني يوم الصبح، لدرجة إنه فيه محلات أغلقت.. على أساس ليه يدخلوا البضاعة اللي شاغلة الطريق في المحل، يدخلوها ويغلقوا المحل أحسن مرة واحدة، ويفتحوا بكرة وكل شيء يرجع زي ما كان ..!!

**

قلت ليه مروحش أزور أخويا في الشغل بتاعه..روحت عنده كان خلص شغله، روحنا على مؤمن مصر الجديدة وأكلنا ورجعنا البيت... ومعرفتش انام بسهولة ، لكن كانت خروجة مفيدة .

**

في الفالنتاين داي... كانت المشاهد مختلفة، وانا امام شباك المترو جاني واد شكله عنده 14 سنة، كنت بأعد الفلوس ومش نايم كويس ومتعصب، شاور على بقه (= فمه) – عايز ياكل – شاورت له براسي انه يبعد عني، انتظر على الرصيف التاني.. قطعت التذكرة وبصيت له، كانت بينا نظرات غضب، وغضبنا احنا الاتنين ماكانش له مبرر .

..

.

في الفالنتين حسيت بالخطر.. شفت بنات محجبات ماشيين مع ولاد.. السن صغيرين، واحد حاطط ايده على كتفها، شكلهم بيئة، وفيه منهم من شباب الجامعة، بنت زميلتي بتحكيلي عن زميلنا العربي اللي كلمها بصورة سيئة عن البنات المصريات.. بنات كتير محترمين لكن مفيش واحدة منهم حتلفت نظرك في الفالنتين.

في يوم الفالنتين كنت مع تلات بنات زميلاتي.. مش بنتفسح، لكن بنتكلم كلام عقيم (علمي) لمدة ساعة او اتنين، مين يصدق؟؟

2 محجبات وواحدة مش محجبة.. والتلاتة محترمات جدا

عملت مقارنة، وسألت نفسي ليه البنت المصرية مظلومة في الوطن العربي كله؟؟

لقيت انه بنات كتير في وطنا حاسين بكده، من الخليج لحد المغرب، ولقيت إنه المصري عموما البعض بينظر له نظرة مش سليمة، بسبب الصورة اللي روجها هو عن نفسه .

كمان المصري مميز.. ووحيد تحس انه شبه كل العرب، وساعات تحس انه غير كل العرب، فطبيعي انه يتحمل نتيجة ده .

**

خلص الفالنتين... لكن عندي إحساس إنه فيه حالة انفلات أوسع قادمة... الناس في العتبة، بنات الفالنتين، رغم انهم يمكن مش الأغلبية، لكنهم الأقوى .

الفرق بين مصر وبين أي بلد تاني عربي.. انك تقدر في مصر تشوف التطورات بوضوووووح.

يمكن أكتر حالة كآبة جت لي ان ده كله مع أمور أخرى جاء مع قضية هالة سرحان وفكرة سمعة مصر.. انا حاسس ان مصر مظلومة، على أيد المصريين والعرب.

مصر شيء.. وكل اللي بيتقال ده شيء تاني

**

يمكن انا متشائم؟؟

يمكن!؟

من ضمن مشاهد الشوارع مؤخرا موقف من كام يوم يمكن ملوش صلة بالكلام اللي فات، كنت ماشي في منشية البكري، جنب روكسي.. وانا ماشي كنت بقلب صور أخدتها بالموبايل، واحد معدي جنبي راح باصص لي وقال "استغفر الله العظيم...".. شخص عادي.

مقدرتش غير اني اضحك فعلا..

هو فاكرني بعمل ايه؟

المرة الجاية، أو اللي بعدها ممكن أنقل عن أقرب كتاب بجواري، كما طلبت بحرينية

فرصة أعرفكم على الكتاب الذي أراه ليل نهار دون أن أتعامل معه

Monday, February 12, 2007

Visitors online - خيال

على يمين المدونة، كنت حاطط مظهر بلدان الزوار.. كان شيء رائع، كنت بأحبه أكتر من عداد الزوار، يمكن لأني ساعات كنت بلاقي بلدان غريبة مكنتش أتوقع إنها تكون موجودة معايا على المدونة في نفس الوقت .

دي صور أخدتها زمان لجنسيات متعددة كانت معايا على المدونة في نفس الوقت .

**

**

كنت ساعات كتير ألاقي فيه ضيف من إسرائيل معايا في نفس الوقت على المدونة، هل هو من عرب إسرائيل؟؟ مسيحي.. مسلم ولا يهودي؟؟ مش مهم... في مرة فكرت إني أكتب رسالة إلى هذا الضيف واضع الصورة الموجودة أعلاه، لأني لا أعرف مدونين داخل إسرائيل، كنت أريد أن يتحدث بدلا من أن يتركني هكذا والأفكار تجول برأسي حول هوية هذا الزائر الإسرائيلي.

**

**

في يوم آخر.. وجدت زائر من أفغانستان.

بن لادن يحاول انه يتصفح المدونات المصرية عبر اللابتوب ؟

الظواهري؟؟ ولا الرئيس الأفغاني داخل يرمي السلام؟

مش عارف.. كانت الزيارة غريبة .

**

**

الزيارة اللي أسعدتني كانت من موريتانيا.. شعرت أنه هناك إخوة عرب مهتمين بزيارة صفحة أخ ليهم في شرق القارة الأفريقية يقطن في آخرة حارة مصرية.

مرحبا بك عزيزي الموريتاني دائما، وفي أي وقت أنت ضيفي المميز.

**

**

الرئيس الإيراني أحمدي نجاد سمعت انه عنده مدونة على الانترنت.. تقريبا هو حب يوطد العلائق بين المدونين المصريين والثورة الإسلامية، فقام بزيارة خاطفة تزامن وجودي معها في تلك الأثناء.

هل ممكن يكون الرئيس الإيراني لسه بيزور المدونة وأنا مش عارف بسبب انتهاء صلاحية مظهر بلدان الزوار؟؟

صعبة حبتين ... انه أصلا يكون بيقعد على الانترنت عشان يتابع المدونات.

**

**

خيال بخيال .. قلت أكيد انه الرئيس الأمريكي جورج بوش علم بزيارة أحمدي نجاد وشعر إن المدونة سيتم اختطافها وضمها إلى تحالف الهلال الشيعي المزمع إقامته، أو إلى محور الشر الذي أشار إليه عدة مرات .

عموما.. فيه مدونين مصريين في أمريكا، وأمريكيين بزور مدوناتهم وممكن عادي انه يكون حد منهم .

بس أنا خيالي واسع جداااا اليومين دول.

**

**

3 زوار.. واحد كان من بلجيكا ويمكن من بروكسل عاصمة الاتحاد الأوروبي، والتاني من السويد، بلد نوبل ومقر لجنة جائزة نوبل، التالت من روسيا.

يمكن كانت زيارات طريفة جدا، لكن مش غريبة لأنه فيه عرب هناك فعلا، إلى جانب انه هناك 1000 طريقة ممكن حد من البلاد دي يزور بيها المدونة .

**

**

ساعات كانت بتبقى المدونة زحمة.. لكن مش الازدحام الشديد، يعني ممكن العديد يصل إلى سبعة زوار في وقت واحد وقت الزحام أو اكتر.. وساعات كتير يكون فيه اتنين او تلاتة معي على المدونة .

في الصورة أعلاه تلاتة معايا على المدونة، من مصر وألمانيا وانجلترا.

**

**

ساعات كمان كان بيبقى معايا زائر من فلسطين، وده شيء جميل، واتبسطت كتير منه .

أدعو الله انه تتحسن الأوضاع في الأراضي الفلسطينية بعد التوترات اللي حصلت مؤخرا .

**

**

المشهد ده مش غريب عليا.. كنت متعود عليه وأنا بزور المدونة، إني ألاقي حد معايا من مصر على المدونة، خصوصا انه الزوار المصريين مش لازم يكونوا مدونين، ممكن ناس عرفوني من أماكن تانية، وحبوا يتابعوا أحوالي إيه

كمان كتير كنت بلاقي زائر من السعودية .

**

الصراحة انا مفتقد الــ Visitors online حبتين، لكن أحب أضيف تفسير لوجود الجنسيات الكتير المتنوعة اللي ممكن الواحد يلاحظ وجودها في مدونته، زي اليابان، أو روسيا، أو البرازيل.. الخ

أولا انه هناك عرب في هذه البلدان

لكن الأهم انه فيه ناس كتير بتزور المدونة عن طريق جوجل.

انا منساش الانونيموس اللي مستلمين المدونة وبيحطوا إعلانات في البوستس القديمة بصورة يومية، وهما مش عرب، بس بيعملوا اللي عليهم .

وأحيانا البعض بييجي ورا صورة أو ملف صوت وهو بيبحث على الجوجل.

في كل الأحوال.. مرحبا بكل زائر أيا كان أصله أو فصله.

Tuesday, February 06, 2007

س و ج

اية اللي حيحصل لايميلك لما تموت ؟

.

هدخل دي اس ال في الطوربة، وابص من وقت للتاني

smileys

طبعا هوتميل وجميل وياهو هيقوموا بالواجب.
**

اديت الباس وورد لحد قبل كده؟

.

اه .. ، وهو أكيد نسيها بعد كده، أنا كمان بستخدم كذا باسوورد

**

لو اه كانت طبيعة علاقتك بيه اية؟

.

أخويا

smileys

**

اسمك؟

عبدالرحمن

**

اسم الدلع المشهور في وسط اصحابك؟

.

عبده.. عوبد

وعبده باشا

smileys

**

عمرك؟

.

26 وكام شهر

**

برجك؟

.

في الأوراق الرسمية برج الميزان، لكن في الحقيقة....

خمنوا انتم..!

smileys

**

مجالك أو مجال دراستك ؟

.

كلية آداب – عين شمس

حاليا بحضر تمهيدي ماجستير، وغالبا حاسس إني مش هكمل عشان مش فاضي

مش عايز استفيض هنا

smileys

**

شخصيتك نوعها اية؟

.

نوعها ايه؟؟

بيجو 405

smileys

امممم ممكن نقول مثلا :

طيب (فيه حد يقول على نفسه طيب)

متحفظ أحيانا، أكره قلة الذوق..

من السهل أن تخسرني بتصرف أحمق.. لا أحب الحفلات أو الصخب والنفاق أو حتى المجاملات. (حاجة غم)

بوجه عام شخصية هادئة، لكن متقلب المزاج جدا.

كالغريب بين اللئام

smileys

**

السفر بالنسبة لك؟

.

السفر حياة..

وهواية قديمة لا أمارسها الآن.

**

المود بتاعك؟

.

منيل بنيله... قلوق جدا، وباخد كل حاجة على أعصابيsmileys

**

وقت فراغك بتعمل فيه اية؟

.

يعني ايه وقت فراغ؟؟

وقتي كله فراغ وكله عمل.. مفيش فواصل محددة.

smileys

**

الأكلة المفضلة؟

.

كبده اسكندراني..

**

الصفات اللي خدتها من بابا؟

.

الجدية، والصراحة والوضوح.

**

الصفات اللي خدتها من ماما؟

.

الله يرحمها

إلى حد ما مسالم.. القدرة على قراءة الأشخاص وشخصياتهم .

كمان ارتداء النظارات

**

اكتر 6 حاجات بتكرهها؟

.

1- الغل والحقد والمشاعر السيئة

2- قلة الذوق وطولة اللسان حتى لو بهزار

3- منطقة المطرية (حي قاهري)

4- لؤم الفلاحين

5- الانتظار بوجه عام

6- المستشفيات .. أصبح عندي رهاب منها

**


اكتر 6 حاجات بتحبها؟

.

1- إني أقابل حد ابن ناس وذوق

2- الشكولاته والشيبس

3- سماع الموسيقى.. واكتشاف المقامات الموسيقية، بحب مقامات الكورد، والحجازكار، والنهاوند

4- التسكع في القاهرة وأنا حاسس إني مش ورايا شيء

5- صلاة العشاء

6- إني أحس إن ربنا معايا، واني مش لوحدي في الدنيا.

**

الشغل بالنسبة لك؟

.

مغامرة غامضة.. أو محاولة للانتحار، مش متأكد

**

الكومبيوتر والانترنت بالنسبة لك؟

.

حاليا هو حياتي، أو على الأقل أغلبها

smileys