Sunday, March 02, 2008

دعوة للمصارحة

تخيل أن شخصا يحاول صنع ثقب في جدار عملاق بواسطة سكين معدني صغير، أو يحاول إرشاد طائرة عملاقة ضالة بنور بطارية يد صغيرة.. الفكرة مستحيلة..!؟؟ لكن.. حين يجتمع الالاف، ربما تكون هذه هي بداية النهاية لهذا الجدار اللعين؟ وحين تجتمع الاف المصابيح بأضوائها الخافتة... ربما تهتدي الطائرة الضالة إلى ممر الهبوط.. ربما
هناك.. اختاروا جميعا صنع حوار ومصارحة، كبديل عن الصمت البغيض، عن نفسي أزعم اننا لا نعرف الكثير عن أنفسنا ولا عن جيراننا.. ولا عن من يسكنون معنا على نفس هذه الأرض، هي دعوة لسلوك جديد يعتمد على الصراحة العاقلة بدلا من الاستفزاز والمناطحة، محاولة للتعرف على أنفسنا وأفكارنا، كي نعيد تقييمها من جديد، ونفكر معا حول ما نقبله للآخرين، وما لانقبله من الآخرين، وما نقبله لأنفسنا وما لانقبله على أنفسنا
فكرة مبادرة "مصالحة ومصارحة".. جميلة، دفعتني إلى اجابة عشرات الأسئلة في دقائق معدودة، بالأسفل بعض هذه الأسئلة

ـ هل ذهبت لبيت مسيحى قبل كده؟ و إيه كان شعورك لما شفت اللوحات و التماثيل الدينية المسيحية؟
ذهبت منذ زمن سحيق، وكان شعوري تجاه الصور والأيقونات المعلقة هو الاحساس بغموض المكان، وهو نفس احساسي لما بشرب عصير قصب عند محل حاطط صورة البابا شنودة، أو صورة جمال عبدالناصر أو صورة الشيخ الجعفري، بحس باحساس مختلف

ـ هل تتحرج من نطق كلمة مسيحى أمام المسيحيين أو المسلمين؟ لماذا؟
لا.. لا أتحرج لأنها كلمة لاتحمل اساءة أو إهانة، بل أتعمد ذكرها بدلا من كلمة قبطي التي أشعر أن بها شيء من التمييز غير المبرر، وكأنها كلمة تتناول شخصيات تاريخية
ـ لو نازل على السلم و لقيت جارك المسيحي يوم (عيد القيامة) خارج هو وعيلته لابسين جديد ومعيدين، حتقولهم إيه؟
صباح الخير.. وربما كل سنة وحضرتك طيب :)
ـ يعنى أيه كافر؟ (فى جملتين)ـ
غير مؤمن بأي ديانة سماوية، ومعادي للاسلام
ـ يعنى إيه غير مسلم؟ (فى جملتين)ـ
غير مؤمن بالاسلام، وغير مهتم بالتعرف الاسلام
ـ ما الذى يجمع المصريين مسلمين و مسيحيين؟ ـ وما الذى يفرقهم؟
يجمعهم الثقافة، الأصل، التاريخ، اللغة، المشاكل اليومية، وتجمعهم قبل كل شيء مصر، والايمان بالله، أما الذي يميزهم عن بعضهم البعض فأحيانا يكون المظهر الخارجي، إلى جانب الكنيسة والمسجد، لكن ما يفرقهم بمعنى التفريق، هو التعصب وضيق الأفق
ـ لو عرفت أن واحد أو واحدة من قرايبك تنصّر(ت)؟ ماذا سيكون شعورك و ماذا ستفعل؟
سأحاوره، واحاول أتعرف على اسبابه، ممكن تكون اسباب نفسية أو وقتية، أما بالنسبة لشعوري سأصاب بالدهشة كرد فعل أولي
ـ لوعندك قضية فى المحكمة يحكم فيها قاضي مسيحي يبقى فيه مشكلة؟
خالص.. ما دام القضية وصلت المحكمة يبقى أتوقع أي شيء أيا كانت ديانة القاضي، لأنه النظام القضائي اصابته مظاهر الفساد الاداري على حد زعم من تعاملوا معه
ـ هل التعامل مع المسلم أسهل من التعامل مع المسيحي؟ لماذا؟
لأ.. فيه مسلمين أو مسيحيين ممكن يكونوا من محافظات معينة ويبقى التعامل معهم صعب ومتعب، لكن اعترف ان فيه أنماط وشخصيات من المسيحيين بيكون التعامل معاهم صعب بسبب اختلافات الديانة، لأني قابلت منهم ناس ـ نسبة مش قليلة ـ بيبقى متحفز أو منغلق، ودي ظاهرة في المجتمع .. موجودة عند المسلمين، بس بتختلف محلامحها مع اختلاف الديانة
ـ لو دخلت مصر حرباً ، ينفع يحارب المسيحيين؟
طبعا مش بلدهم!؟
ـ المسيحيون يتبعون أمريكا و بيجيلهم فلوس منها؟
:)
السؤال ده خبيث، هو أكيد فيه ناس بتجيلها فلوس من أميركا ده أمر مفروغ منه، ومش شرط يكونوا مسيحيين
ـ القساوسة بيلبسوا أسود حزناً على دخول الإسلام مصر
أعتقد أنها شائعة من هيافات المجتمع المصري وميراثه النكد.. ده على حد علمي
ـ كيف تدعو المسيحيين للإسلام؟ ـ هل تفعل ذلك كثيراً؟
لما احس انه عايز يعرف عن الاسلام بتكلم معاه، لكن دي مش شغلتي أو نشاطي الرئيس في حياتي، بس بتكلم مع اللي عايز يعرف، وفي النهاية أهم شيء انه الانسان هو اللي يسعى للمعرفة وميعتمدش على حد الا في حدود ضيقة
ـ هل المسلم فى ماليزيا أو جنوب أفريقيا أقرب لك من المسيحى في مصر؟ لماذا؟
أقرب لي في الأمور الدينية، وان كان الآن كتير من الأمور ممكن تتعقد مع اقحام الثقافات في العبادات والفقه الديني
ـ "الناس سواسية كأسنان المشط" - هل ينطبق هذا على المسيحى و المسلم؟
طبعا
ـ تفتكر إن ليك حق فى البلد دى أكتر من المسيحى؟ لماذا؟
لأ.. بس ليا حق في انه تكون السياسة العامة مراعية للبعد الاسلامي، سواء على المستوى السياسي في علاقاتها بالدول الاسلامية وتعزيز هذه العلاقات أو حتى على مستوى الأمور الثقافية، البعد ده كان موجود دايما حتى قبل الثورة وفي عهد عبدالناصر، ومن حق المسلمين أنهم يعززوه، غير كده انا مليش حق أو فضل على اي حد مسيحي
ـ تفتكر من حق المسيحيين يعملوا مظاهرة لو مسيحي غير دينه للإسلام؟ لماذا؟
طبعا لأ.. لأنها غير مجدية أو مفيدة، بقدر ماهي مضرة وبتعمق الاحساس بالظلم وغالبا بتكون تحريضية، ثم ايه الهدف من هذه المظاهرة، أغلبها بيكون لتسليم البنت اللي اسلمت، وكإننا عايشين في مجتمع قبلي مش في دولة، ونفس الشيء أرفض المظاهرات الاسلامية اللي أغلبها بيكون من غير فائدة وأغلبها صراخ وعويل
ـ لو مسيحى ألقى طوبة على مسجد و كسر زجاجه حتعمل إيه؟
المفروض أبلغ الشرطة، لكن غالبا الجماهير بتتعامل مع المواقف دي، وهنا دوري اني اضع الموضوع في حجمه، لو حد كسر حاجة يصلحها وانتهت القصة، بعيدا عن ماورائيات الحدث، والتنقيب في الضمائر
ـ تفتكر من حق المسيحيين يبنوا كنائس زى ما هو عايزيين؟ كام كنيسة فى السنة؟
أيوه.. بس على شرط يكون ده متوائم مع ديمغرافيا الحي اللي هيتم البناء فيه، يعني ممكن حى ميكونش محتاج كنيسة هناك في حين حى آخر في مشكلة في عدد الكنائس
ـ لو بنى المسيحيين كنيسة فى الشارع اللى أنت ساكن فيه شعورك يكون إيه؟ و تعمل إيه؟
مفيش مشاكل معايا، بس هقلق لأني هتوقع مشاغبات من مسلمين، وبعض الاستفزاز من الشباب رواد الكنيسة، عشان الناس دلوقت بقت طباعها صعبة في مصر
ـ إيه شعورك لو الميكرفون فى المسجد صوته عالي؟
بضايق طبعا، وحصل قبل كده الموقف ده، وكنت سلبي لأني عارف مقدما موقف ادارة المسجد اللي كان بيزعج الناس ويخضهم بدل ما يجذبهم للصلاة، والمسألة اتحلت من داخل المسجد نفسه، لكن واحد ضيف زي حالاتي مش هيبقى ليه كلمة على حد هناك
ـ لو رايح تسكن فى بيت ولقيت كل سكّانه مسيحيين، تعمل إيه؟
هكلم صاحب البيت على الملحوظة دي، عشان اعرف اذا كانت صدفة ولا عن عمد ويكونوا مش مرحبين بحد مسلم يكون في العمارة، وهحاول اتعرف اكتر على السكان، عشان اعرف طباعهم، على فكرة فيه تجربة لأحد أقربائي كده، وعلاقتهم بالجيران أحسن ما يكون لكنهم من أجيال سابقة غير جيلنا المحبط
ـ إيه اللى بيعجبك فى المسيحيين؟ و أيه أكتر حاجة بتكرهها فيهم؟
احساس بعضهم بالاغتراب، لمست الاحساس ده أثناء بعض المعاملات، واقصد هنا من يعيشون الحياة مع احساس بالفردية لأن هذه الصفات تتواءم معي، وعلى العكس تماما أكثر ما أبغضه في بعض الشرائح المسيحية هو الانغلاق والتحفز، وانسحاق بعض الشرائح امام عقد الماضي واساطيره التي تحكم علاقاتهم بالآخرين، إلى جانب غياب الفردية لصالح مجموعة مرتبطة بالكنيسة فقط أو مرتبطة بثقافة الأهل على حساب رأيهم الشخصي أواندماجهم مع فئات أخرى من المجتمع .. وعلى فكرة هي أمور موجودة لدى المسلمين أيضا بصورة مختلفة وبدرجات متفاوتة
لمتابعة الاسئلة : مسلمين - مسيحيين

13 comments:

karakib said...

جزيل الشكر لأهتمامك يا عبدة باشا
و احييك علي جرأتك و صراحتك في نشر اجاباتك هنا
و يا رب نقدر نعمل حاجة .. طول ما في ناس زيك
يبقي اكيد مصر هاتبقي احسن

عباس العبد said...

شكرا يا باشا
متشكر جدا
و يا ريت فعلا نقدر نقدم و لو حاجة بسيطة للمجتمع و بمساعدتك طبعا و بمساعدة كل المدونين

وجهة نظري said...

أنا اشتركت في الأستقصاء دة امبارح بس شايف الأسئلة بتاعتة غريبة أو عمري ما فكرت فيها أبدا، وبصراحة أنا كنت قلقان أوي من النوايا المستترة داخل الأسئلة، لأن بعضها ممكن يفتح أبواب خلاف لو اترد علية بأستهتار، وكمان أنا مش عارف مين اللي ورا الأسئلة دي.

بعض الأسئلة غربية زي كلت في بيت مسيحي قبل كدة، واية شعورك لما بتدخل بيت مسيحي، كأننا مكناش عايشين مع مسيحيين قبل كدة طول عمرنا وكأن المسيحيين دول عمرهم ما حاربو معانا أبدا ولا عمر ما كان في قاضي أو جار مسيحي.... حاجات غريبة

bluestone said...

صنع ثقب في جدار بواسطة سكين :)

صحيح قوي يا عبد الرحمن :)

وكلنا أمل .. ان تنجح آلاف السكاكين في شق الجدار .. للأبد .. ربما في يوما ما يظهر ضوء للشمس من بين الشقوق

جزيل الشكر يا باشا

بنت القمر said...

وانا كمان
بعض الاسئله عبيطه عمرك اتعزمت عند مسيحي
ماشي سؤال اهبل
ليه؟؟
ليه عشان اكيد هو عزمني
عمرك بت في بيت مسيحي
لا
ليه عشان مكنش في مناسبه
مش عنصريه ولا حاجه

bluestone said...

يا بنت القمر :
الاسئلة مش عبيطة ولا حاجة

هو كل الفكرة ان الاستبينان مصمم ليحتوي كافة اطياف المجتمع
يعني من اول البواب لرئيس الجامعة

مختلف الافكار والخلفيات

وعشان كده الاسئلة اللي ممكن تبقى عبيطة عند بعض الناس بتبقى اساسية عند ناس تانية

هي محاولة في الاول وفي الاخر
واحنا متابعين كل الملاحظات وجاري دراسة وتقييم التجربة

محمود المصرى said...

بسم الله الرحمن الرحيم

اسمحلى اخى اعلق على نقطة بسيطة جدا وهو تعريف حضضرتك للكافر
الكافر دا مصطلح عقيدى اخى وهو كل من ينكر معلوم من الدين بالضرورة حتى لو كان يقول لا اله الا الله محمد رسول الله وينكر مثلا فرضية الصلاة او الصوم او اى شىء معلوم من الدين بالضرورة , وطبعا المسيحيين بينكروا الرسول ورسالته كلها فطبيعى اننا نقول عليهم كفار , وهذا لا يفرض العداء بيننا وبينهم فهذه قضية اخرى
احب اذكر حضرتك بقول الله تعالى (لقد كفر الذين قالوا ان الله هو المسيح ابن مريم قل فمن يملك من الله شيئا ان اراد ان يهلك المسيح ابن مريم وامه ومن في الارض جميعا ولله ملك السماوات والارض وما بينهما يخلق ما يشاء والله على كل شيء قدير )
ولا يشترط اخى ان يكون الكافر معادى لنا فى الدين فالله يقول ( لا ينهاكم الله عن الذين لم يقاتلوكم فى الدين ولم يخرجوكم من دياركم ان تبروهم وتقسطوا اليهم ان الله يحب المقسطين ) وهذه الاية تشمل كل الكافرين مسيحيين ويهود وبوذيين ووثنين ماداموا سالموا اهل الاسلام .

مــهــا said...

عارف , بما إنى متابعاك من زماااان ..بس ماكنتش برد يعنى
لو كنت لاقيت ردود غير اللى أنت رديتها هنا دى ..
كنت خدت على خاطرى شوية
:)
...
بالنسبة لكلمة كافر أو الكفر
أنا مش عارفة إية معناها الأصلى فى المعجم
لكن مؤمنة بإنك لما تكفر بحاجة يعنى مش مؤمن بيها ..أيا كانت الحاجة دى
فلما يكون أخوانا المسيحين مش مؤمنين بالإسلام يبقى هما بالنسبة لنا كفار ..
الكلمة ترسخت عند الناس بمفهوم خاطىء و غبى من خلال أفلام زمان زى بتاعة الشيماء و غيرها اللى بتيجى فى المولد النبوى ده
الكفار هما أبو جهل أو راجل بيبقى شكله وحش أوى و عينه طايرة مثلا ..
فتلاقى الناس كلها متاخدة أوى من كلمة كافر دى ..
.....

عامة دعوة جميلة من المسيحين و المسلمين المدونين..اهى دى الحوارات بقى ..
:)
...

مــهــا said...

نسيت أزود إنى مش ببرر إستخدام كلمة كافر و أنا عن نفسى مابحبش أقولها على غير المسلمين ..لكن قصدى اللى فاهماه و مقتنعة بيه من كلمة كافر
:)

بس كده

Abdou Basha said...

أشكركم جدا على التعليقات الجميلة
وعن الكفر والكافر، أشكرك محمود المصري.. رايك جدير بالتسجيل هنا
أما الاجابة على الاستبيان، فقد تعاملت معها من منطلق أنها أسئلة استبيان وليست اسئلة اختبار، أي أننا نسجل انطباع ورؤية شخصية وليست معلومة مرجعية كما يحدث مع اسئلة الاختبار، ولعل هذا ما يجعل مشرف أي استبيان يحرص على منع اي تأثير على المبحوثين و اجاباتهم، فالمفروض ان يتم تسجيل الاجابة دون تحفز او تحليل مسبق للأسئلة او مع انطباع سابق.. أقصد الا يتم التعامل معها كأسئلة تؤدي إلى نجاح ورسوب، لكن ان تكون معبرة.. ولهذا استأذنت قبل أن أدون هنا بعض الاجابات، وجاء النشر هنا لأن الأسئلة كانت غريبة وغير متداولة تقريبا في حياتنا اليومية، وأعجبتني الفكرة
**
عن الكافر.. الحقيقة انني يأتي في ذهني دائما حين اسمع كلمة كافر نموذج مر بي من قبل الأصح أن يوصف بالملحد، وكان له موقف معادي للدين، فأصبح الكافر أقرب لدي إلى الملحد، لا من وقع في الكفر لعلة وسبب.. وأثارت مها ملحوظة جميلة جدا، هل الكافر هو كافر قريش.. بصورته التقليدية في الأفلام العربي؟؟ في رأيي هناك ملحد ولاديني، وهناك من دخل في الكفر لعلة وسبب، الفئة الأول اتخذت موقفا من الدين أو الاسلام ككل، أمام الفئة الثانية نالت لقب كافر بجدارة لسبب ما، وربما لم تكفر بنواحي أخرى من الدين
عموما الاجابة لم تكن معلومة، لكن تصور شخصي وصورة ذهنية استدعاها السؤال
هذا ما دار في رأسي وانا أكتب الجملتين
:)

هشام نصار said...

es

هشام نصار said...

بوست حلو ومعبر وواقعي وكله تقريبا ً نفس اللي بيدور في بالي ..

ibn_abdel_aziz said...

اجابات موضوعية جدا يا عبدة
بجد
ربنا يكرمك

هو انا شفتك في المنطقة عندنا وسلمت عليك؟