Saturday, March 08, 2008

وانت مال أهلك

لما تيجي تركن عربيتك وتقعد تدور على مكان في عشر دقايق، وبعدين تركنها في خمس دقايق، بيطلع دايما واحد من تحت الأرض أو من جوا محل يقولك، لو سمحت يا بيه رجع العربية ورا شوية عشان الطريق، أو يسألك انت هتقعد كتير؟؟، رغم انه هو شايفك وانت بتركن العربية واستنى لحد ما خرجت من العربية، وعايزك ترجعلها تاني عشان تهدى أعصابه ويمارس سلطته على الشبرين اللي انت راكن فيهم
الشخص ده ببقى عايز اقوله وانت مال أهلك؟
**
لما تيجي تسأل واحد عن مكان أو شارع، تلاقيه بيقولك انت رايح فين هناك؟ وساعات ممكن يقولك طب رايح عشان إيه؟ أو ساعات تسأل عن رقم عمارة، فحد يقولك عايز مين هناك؟
ببقى عايز أقوله وانت مال أهلك؟
**
ساعات بتبقى عند الدكتور وحالتك حالة، ويطلع واحد اجتماعي زيادة عن اللزوم، مش مقدر حالتك.. يسألك ويقولك انت عندك إيه؟ أو انت جاي للدكتور ليه؟
ببقى عايز أقوله وانت مال أهلك؟
**
ساعات بتكون في مكان عمل، وتروح هنا أو هناك.. أو تدخل اجتماع أو غيره، يطلعلك واحد، هاه حصل إيه بقى؟
ببقى عايز أقوله وانت مال أهلك..؟ خليك في حالك
**
لو كل واحد يخليه في حاله ويحترم نفسه.... كانت الأمور بقت ألطف
الأمثلة كتير.. والحالة دي لن تختفي، لأن البعض ببساطة لا يدرك الفرق بين التطفل وبين الفضول