Tuesday, March 11, 2008

أعراض اكتمال القمر

(1) العمر مش بالسن

هي: إنت عندك كام سنة؟
أنا: 72
هي: لا كام بجد؟ متبقاش رخم!!ـ
إحساس سخيف لما حد يتهمك إنك رخم من أول لقاء بينكو
أنا:عندي 27سنة.. وانتي كام سنة؟
هي: عندي 53سنة
ابتسامة بعد تفكير: آااه.. عندك 35سنة :-)، شفتي أنا ناصح ازاي
**
(2) الريس بيرة مات

أنا: تعرف إيه معنى
وفاة الريس بيرة؟؟
هو: مين الريس بيرة ده؟؟
أنا: ده مؤلف أشهر أغاني عدوية، مات عنده ستة وتمانين سنة... عارف معنى وفاته إيه؟؟ إنه النهارده مات شارع محمد علي، ومات ابن البلد، النهاردة انتصر أهالي شبرا الخيمة.. وبتوع العنب على أهالي الجمالية والدرب الاحمر.. وبتوع
التفاح
هو: معاك حق
**
(3) ازي حضرتك؟

أنا: ألو ازي حضرتك.. أنا (...)ـ
هي: ازيك.. اخبارك إيه؟ الحمدلله؟
الخط بيقطع، وبتوصلني آخر كلمة في الجملة.. بتقول: كلمني.. أوكيه
أنا: أيوه فعلا انا من مدة عايز أكلم حضرتك، فيه كام موضوع عايز أعرضهم عليكي..ـ
هي: ماشي...... كذا حاجة... بكرة ..عشرة حكون موجودة... أوكيه
أنا : إن شاء الله.. مع السلامة

**
(4) الصف الثاني الثانوي

للمرة الأولى في حياتي أجلس ضمن الصف الأول في فصل 2/15في مدرستي الثانوية، وعلى يميني الأستاذ عمرو خالد الذي استغل غياب أستاذ المادة وقدم لنا درسا وعظيا.. كنت جالسا أمامه مباشرة، وطلب مني أن أرجع إلى الصفوف الخلفية، حيث كانت هناك فتاة وحيدة، تعجبت لوجودها في مدرسة ثانوية بنين، وعلى شاشة عرض عملاقة دار حوار بين الأستاذ عمرو خالد
ومجدي إمام تحت شعار قناة روتانا.. لم استيقظ إلا بعد أن أدركت غرابة الأحداث
**
(5) قضاء وقدر

دخل جلال إلى المنزل القدييييم يحمل بيده كيلو بسبوسة، سأل شابا يجلس على السلم عن الحاجة أم جمال، ففاجأه الشاب بطعنة غادرة، استلقى جلال وهو محتفظ بالسكين في صدره.. ابتسم ونعي نفسه ولعن سوء حظه، في الوقت الذي وصل إلى مسامعه صراخ أهل الحارة وهم يركضون وراء سيد المجنون

عن القمر

6 comments:

مــهــا said...

امم بمناسبة القمر ..
فكرتنى بشخص عزيز عليا كان بيقولى دايما إنه بيبقى فى أضيق حالاته لما بيكون القمر مكتمل و بدر..
كنت بستغرب أوى , لحد ما بدأت أحس بشجن حقيقى لما ببص للقمر و هو مكتمل ..
مش عارفة الشجن هايقلب علي إية بعد كده ؟

...
ربنا يفرجها علينا يا عبد الرحمن .
على فكرة بخصوص البوست السابق
كنت أتمنى إنك كنت تفتح الكومنتس
كنت هاقول و أنت مالك أهلك لناس كتير أوى
:)
تحياتى

Anonymous said...

عارف يا عبدو ممكن الوقت جا عشان اخرج لك جنون ايمان .. والعذر موجود بعد كم يوم 14 مارس باذن الله
وتطبقا للمدونة السابقة ..

عبدو

ايش الي موجود في مدونة رحاااااب

(( وانتي مال اهلك يا ايمان ))

^-^

بوست جميل يا اخي .. طبعا اصدق الحاجات دي .. عدا المستذئبين .. والوحوش الي تظهر في الوقت دا ..

ربنا يكون في عونك يا اخي ..

بارك الله فيك .

قهوة بالفانيليا said...

صباح الخير
اكتمال القمر ..
له علاقة بحدوث حالات الاكتئاب و دة صحيح
حاجة مش فاكراها ليها علاقة بكمية الماء داخل الجسم
مش قادرة افتكر
المهم يعني
صباح الخير

Abdou Basha said...

مها
وساعات بيبقى كإنه القمر مكتمل على طول
:)
**
إيمان العزيزة
كيف الحال؟ إنتي تسألي في أي وقت، عموما المدونة التانية مش رحاب، هي ريهاب : الرابط فيه معنى الكلمة
http://en.wiktionary.org/wiki/rehab
ولسه مكتبتش فيها حاجة كتير
:)
**
قهوة بالفانيليا
مرحبا بزيارتك
حبيت اسم مدونتك جدا

Abdou Basha said...

كمان.. حاجة مهمة، كل سنة وانتي طيبة يا إيمان وعقبال 100 سنة
:)

عند اكتمال القمر said...

كلمات جميله
نفع الله بك
لخدمة الدين و
اهله