Monday, April 14, 2008

الأسئلة العشرة الأكثر صعوبة

من أغرب التاجز اللي عرفتها في حياتي، الحملة اللي اتعملت مؤخرا على اليوتيوب بين حبه شباب، تحت اسم : حملة الفلوج العاري
!! The Naked Vlog Campaign
الفلوج، أو التدوين بالفيديو، منتشر جدا على اليوتيوب، لكنه مش منتشر بين العرب، لأنه على ما يبدو انه اليوتيوب ارتبط عندنا بالكليبات الفضائحية، والصراعات الدينية، والتعذيب...الخ
كنت شفت كام كليب بالانجليزي لعرب بيدونوا فيديوهات، وشفت زمان حاجات مفيدة جدا، منها فيديو لواحد أكاديمي كان بيدون زي محاضرة، بس الصراحة مفهمتش حاجة
..
حملة التدوين العاري.. انك تدون كليب ليك تدعو فيه صحابك للحملة، وفي نفس الوقت تتكلم عن فوائد التعرى..!!
أنا شايف إنها حاجة مسخرة، العجيب انه الواحد قرا آراء زمان وسمع ناس بتتغزل في التعرى وفوائده، وفي فن تصوير العري
للأسف.. لم أصل إلى هذه الدرجة من الليبرالية، ولا هذه الدرجة من التقدم والرقي في التذوق، ما زالت قابع في واحات الرجعية
:-)
**
افتكرت الحملة الغريبة دي أو التاج الغريب ده، بمناسبة إنه بقى لي مدة مش بشوف تاجز في المدونات، شريف بعت لي حاجة جديدة، إنه كل واحد يصنع التاج والأسئلة بتاعته اللي محيراه، بس للأسف.. عشر اسئلة بس، دي بعض الأسئلة اللي مش لاقيلها اجابة واضحة
ـ 10ـ إضراب السادس من ابريل العظيم.. فكرة مين بالظبط ـ عايز اسم شخص واحد محدد ؟
ـ 9ـ إسراء عبدالفتاح اللي اعتقلت بسبب إنها كانت مديرة مجموعة إضراب ستة ابريل على الفيسبوك، مين اللي بلغ عنها؟؟
تحديث 17 - 4 : اختفاء إلى حين.. بعد قرار الافراج
ـ 8 ـ هل ممكن في يوم من الأيام نكتشف أن شعبان عبدالرحيم كان بيغني بأوامر عليا من فوق، لأغراض أمنية ؟؟
تحديث 17 - 4 : خبر عن شعبولا.. تم نشره بعد هذا السؤال
ـ 7 ـ في الزمان اللي بيشوف فيه كتير من الأكاديميين إنه الدراسات العليا والماجستير والدكتوراه مجرد فرص لشباب متخبط، وبنات لسه متجوزتش.. ليه بيقبلوهم بقى أصلا؟؟ مش مكسوفين من الموقف المتناقض ده؟؟
ـ 6ـ هو ليه الأديب الأدباتي المثقف المناضل (أوصاف لسوبرمان قلما يتكرر) لازم يبقى متحرر إلى درجة التهتك؟؟
ـ 5 ـ سؤال شخصي : ليه فيه زميلة ليا افتكرتني ملحد، واتفاجئت لما قولتلها إني مؤمن جدا؟؟
ـ 4 ـ ليه الناس اللي من شبرا بيبقى أغلبهم جدعان بجد؟؟ ده بعيد عن اني أصلا من شبرا :-)
ـ 3 ـ إزاي ممكن الواحد يتعامل مع بنت من غير ما تفهمه غلط ؟؟
ـ 2 ـ الناس اللي بتتصور إنه تغيير/إقصاء الحكومة هو الحل.. هل هما متصورين انه الشعب طاهر ونضيف، وانه أي حد هيبقى في المنصب غير رجال السلطة الحاليين هيبقى كويس؟؟ ولا هما مخنوقين وخلاص؟
ـ 1 ـ ليه في حالة هوس بين الشباب والبنات ثم بين الأهل حوالين الجواز، واللي اتجوز واللي لسه ماتجوزش!؟ هو ده دليل عفة، ولا تطفل، ولا فراغ ولا إيه؟؟
..
الدعوة عامة: لطرح الأسئلة العشرة الأكثر صعوبة

9 comments:

Anonymous said...

SHOBRA Agda3 Naas Ya Basha

ياسمين حميد said...

بمناسبة السؤال رقم 3-
إزاي الواحدة ممكن تمشي في الشارع من غير ما تتفهم غلط؟

بنت القمر said...

بما اني لسه مسئوله اسئله من دي
من بنتي شرف عندي وبص علي الاصعب يبدو انها توارد تدوينات
:))))
فا هتلاقي بتاع 20 سؤال مش عشرة بس
ده تبع ان الصعوبه نسبيه ومرتبطه بالخبرات في الحياه والسن وغيرة
********************
السؤال الاول
هو العدل علي الارض فاضله قد ايه وييجي_______________
التاني
الناس ها تبطل امتي تتحشر في حياه بعض تحت ستارة النصيحه الاخويه الله يحرق النصيحه اللي كده
____________________
الست والبنت ها تفضل لحد امتي تدفع تمن غباء وعقد وتخلف ام المجتمع بالدرجه الاولي
_________________________
السادات كان راجل طيب و ظلمناه ولا لأ_سؤال فرعي مين اللي قتله تحديدا وده يهمني اكتر من اللي قتل كنيدي؟
______________________
ليه الناس دايما تقول كنت بتمني اعيش في زمن كذا وكذا
ليه محدش عنده امل في بكرة
_____________________
ليه الناس اللي بترقص علي السلم بين الايمان والالحاد وتقول احنا عارفين انه في ربنا بس اكيد هو نسينا وسابنا لانه سكت علي الظلم_ ليه مش قادرين يحددوا موقفهم _ كل اللي بيعملوه انهم عاوزين يبرجلونا مش اكتر؟
______________________________
هي فلسطين ها ترجع لاهلها في يوم ما ولو مش علي حياه عينا_____________________________
هو لو واحد مات ودخل الجنه ومش عاوز مراته معاه او مش عاوزة جوزها او مش عاوزين امهم وابوهم او اي حد قرفهم في الدنيا ممكن يتحط في حته تانيه في الجنه بعيد عن اللي مضايقينه عشان النفس بس مش اكتر
:)))))
______________________
هو الريس لما بيقرا كل الكلام السلبي _لاحظ الكلمه المهذبه اللي استعملتها بيحس بأيه
وقبل ما ينام بيفكر في ايه؟
___________________
هو ابليس مش بيفكر يراجع نفسه واشمعني ربنا قبل توبتنا ومش ها يقبل توبته
وليه هو مش عاوز يتوب اصلا ونخش الجنه كلنا سوا وكفي الله المؤمنين شر القتال
________________________
ليه الراجل لما يجيي يخطب او يجوز لازم يطلب من البنت طلبات تعديل جوهريه اثباتا الي دخوله حياتها زي سيبي الشغل اتحجبي
متخرجيش من غير ما تتصلي بيا قوليلي بس انا عاوز اطمن
وليه بيربط الطلبات دي برجولته الناقحه دوما
:(
_____________________
ليه الست المصريه عمرها ما بتحب مرات ابنها حتي لو عملت عفريت في حين بتعمل خدها مداس لجوز بنتها رغم ان الاجيال مختلفه في الحالتين
______________
_سؤال زياده اهو اوكازيون
تحياتي________________

Tamer Nabil said...

ازيك ياصاحبى مش بشوفك عندى من فترة

ان كان على الاسئلة هذة الايام فهى كثيرة وما تعدش

العرى بقى فن عادى ناس صحيح عبيطة بس شايفة كدة

الواحد اتعود يسمع ويشوف حاجات غريبة اليومين دول

ربنا يسترها

تحياتى

قلم جاف said...

عبود:

شكراً على انضمامك للتاج.. وأؤمن على سؤالك رقم 1 اللي جه ع الجرح:

بما إني أقترب تدريجياً من العام الثلاثين هناك نوع من "النَّنَّح" يلح على أناس كثيرين في دوائر قريبة مني في الشغل أو في الوسط المحيط بيا:

-انتا ماتجوزتش ليه لغاية دلوقت؟

-معقولة تبقى داخل على التلاتين وما تجوزتش؟

كنا لغاية وقت قريب بـ"نستغرب" إن الناس مستغربة إن "واحدة" داخلة على التلاتين ما تجوزتش لسة.. دلوقت بقى المجتمع كله مستغرب إن "شاب" -وفي ظل الظروف الحياتية والاقتصادية البشعة اللي احنا عايشينها- لسة ما اتجوزش مع إنه داخل على التلاتين!

هوة فعلاً الواحد لازم يتجوز قبل ما يبقى تلاتين سنة وإلا كدة حيطلع معاش، مع إنه لسة ع المعاش قد التلاتين سنة تلاتين كمان؟

لا وإيه.. تلاقي في الخطب وفي الدروس والمواعظ "الحاجة إلى تيسير الزواج" و"عدم المغالاة في المهور"..

حاجة وراها ريحة "فراخي".. وتحتوي على كمية هائلة من الصفار والبياض!

Dina El Hawary (dido's) said...

إنه لتاج جامد جداً ... عجبتني معظم الأسئلة اللي انت طرحتها
اعتقد اني لو عملت استة هتطلع حوالي 100 سؤال

Abdou Basha said...

صباح النور يا جماعة
..
أنونيموس
أيوه طبعا.. بلا جدال أو منازعة، شبرا هي أصل الكون ومحور العالم القديم
:)
**
ياسمين
معاكي حق.. اللي لابسة محزق محدش بيرحمها ، اللي لابسة خمار بتبقى عرضة لتريقة، اللي لابسة اسدال بيقولوا عليها بطريق أو كاسبر، اللي لابسة نقاب بتبقى ارهابية
الصراحة سؤالك ده من ضمن الأسئلة الأكثر صعوبة بجد.. مش لاقيله اجابة
**
بنت القمر
إيه الأسئلة الجامده دي؟؟
فيه في أسئلتك تابوهات برضو :)
تقريبا البنت طالعة لأمها، صح ؟؟
:D
**
تامر
إزيك يا تامر.. لأ أنا كتير ببقى زائر صامت على النت، بس الناس متخدوش بالها مني
:)
عزيزي انت مدعو لطرح أكتر عشر أسئلة محيراك.. في حالة رغبتك طبعا
**
شريف
شكرا على التاج ده، أنا متفق معاك، بس مش ملاحظ حاجة في بعض الشباب اللي بيتجوز جديد، بيبقى منهم ساعات فئات من ضمن الناس اللي بتسأل، مثلا فيه واحد أعرفه بعد ما أجوز سالني نفس السؤال الرخم، وهو اساسا انسان رخم، بس اللي لفت نظري انه بيتكلم بفحولة غريبة، وذكورة مسيطرة، كإنه أثبت رجولته قدام الناس، بقى عامل زي الديك الرومي في موسم التزاوج
حاجة صعبة بعيد عن السامعين
**
دينا الهواري
أوك.. اذا تحبي تقولي أسئلتك ، شاركينا فيها كمان، كفاية عشر أسئلة بس :)

Anonymous said...

الأسئلة دي صعبة اوي يا عبدالرحمن
مرت من هنا..
أنفال

Abdou Basha said...

أنفال
أسعدني مرورك جدا، ومتابعتك لجحري الصغير في الانترنت :)
تحيتي