Saturday, April 12, 2008

عن قتل المأمور - I Shot The Sheriff

الحقيقة مش عارف هل ممكن في يوم من الأيام الواحد يلاقي أغنية على طريقة العبث اللي مكتوب بالأزرق تحت ده..؟ طبعا ده بعيدا عن الفرق اللي ليها تجارب خاصة بتعرضها في أماكن زي ساقية الصاوي وغيرها من المسارح
وهي تجارب معرفهاش كويس ومش المفروض أكتب عن حاجة معرفهاش

:(
السؤال ده عموما دار في ذهني وانا قاعد بسمع من كام يوم أغنية قديمة مستهلكة لبوب مارلي، وكانت أول مرة أقرا الليركس بتاعتها
أغنية I Shot The Sheriff
الغريب إن الأغنية دي معرفتهاش ـ منذ سنوات عديدة ـ من بوب مارلي، لكن من مغني تاني، بس المهم إن كلماتها كانت غريبة شوية، بيحكي عن إنه قتل المأمور، وبينفي قتله للمساعد بتاعه، وبيحكي انه المأمور
جون براون كان كل اما يعدي عليه وهو بيزرع حبوب في الأرض، يقوله أقتلها قبل ما تنمو وتكبر!! الجميل في الموضوع إنه صديقة بوب مارلي بتحكي انه كان بيرمز هنا لفكرة تحديد النسل
عموما فكرة الأغنية فيه كتير كتبوا إنها رمزية ضد السلطة، أيا كان الطرف المقهور، وأيا كانت
السلطة.. لإن الموضوع يحتمل التأويل، واتقال إنه هو كان هيكتب كلمة البوليس بدل المأمور، لكن غير رأيه!
ممكن يكون فيه أراء تانية، بس اللي عجبني إن اللي غناها كان ملك الريجي، مش واحد مغمور، أو واحد بيغني لنخبة

أنا قتلت المأمور، لكن مقتلتش النقيب.. كلهم محاوطين المنطقة، وعايزين يقبضوا عليا، عشان قتلت النقيب، بس انا مقتلتوش
أنا فعلا قتلت المأمور، بس والله كان دفاع عن النفس.. الناس بتقول أنا قتلت واحد حكومة، بس أنا مقتلتش النقيب
المأمور جمال الخضري كان بيكرهني من غير سبب.. كل اما أصلح عربية الفول، يقولي شيلها بدل ما اقتلك، كان بيقولي كل اما هتصلحها هكسرها.. وهقتلك
قالوا في الجرنان اني قتلت المأمور، بس والله ده كان دفاع عن النفس، ليه بيقولوا اني قتلت النقيب كمان؟
كنت ماشي في المنطقة عادي، وشفت اللوا الخضري عايز يضربني بالنار.. ضربته بالنار.. بس أنا مقتلتش النقيب
غصب عني دوست عالزناد وجت في اللوا جمال.. بس مقتلتش
النقيب



صعب إنه الكلمات الرزقاء دي تبقى موضوع أغنية.. حاجة غير مستساغة ورخمة جدا.. بس فيه حاجة تانية، كلمات بعض الأغاني الشعبية، اللي خارجة من بيئات عشوائية ـ لاحظ النظرة المتعالية في الأسلوب واللي بتعبر عن تعالي طبقي ـ يعني مثلا فاكر مثلا من الأغاني المستهلكة برضو أغنية زي البانجو مش بتاعي بيقول حامد عبده : البانجو مش بتاعى و الله برئ يا بيه.. الذنب ذنب صحابي هما اللى رمونى عليه، أو مثلا سعد الصغير لما غنى في الفيلم بيحيي الباشا.. أو حتى الدنيا خربانة اللي هي تقريبا سخط مستتر على كافة الحياة والأوضاع
..
يمكن الفرق إننا مصريين، والمقارنة شبه مستحيلة، من الصعب أننا نضرب المأمور بالنار، أو نغني حاجة زي كده، لينا ولاء للسلطة يمكن بيوصل عند البعض إلى تقبل الوضاعة، وده اللي بيمنع إنه يبقى فيه حاجة زي الريجي، أو يبقى فيه
ملك للريجي، لكن يمكن البديل هو المولد، او ما يتلوه النبطشي في الأفراح..الخ
**
ليه افتكرت.. الأغنية دي؟؟ عشان حاسس انه المفروض يكون فيه حاجة بتعبر عن قتل المامور، في اللحظة اللي احنا عايشينها دلوقت.. يعني جميل انه يبقى فيه فوضى خالد يوسف، رغم ما يبغضه البعض في هذا المخرج أو أعماله، لكنه عبر عن ذلك.. جزيرة أحمد السقا برضو قربت شوية من المأمور
لكن لم أجد ما أسمعه عن قتل المأمور حتى الآن.... إلا بوب مارلي، وده بيأكد حاجة مهمة
أحمد السقا ممكن يبقى الحكومة، خالد يوسف ممكن يصنع الفوضى، لكن أي مغنى خرج من العشوائيات.. ميقدرش غير إنه يعظم للباشا

2 comments:

Abdou Basha said...

حصة فلسفة

Abderrahman Mostafa said...

بعد خمس سنين حصل هنا : https://soundcloud.com/anakhaledmedhat/i-shot-the-sheriff-remix-bob
:)