Saturday, May 10, 2008

رغيف، وضرايب، وجنيه ونص

منذ مدة.. وأنا أكاد لا أصدق أن الفنان الكبير شعبان عبدالرحيم يختار موضوعات أغانيه هكذا.. بعفوية ودون توجيه، أسررت بمكنون أفكاري إلى بعض المقربين في داوئر خاصة، وذكرت لهم انه من المؤكد أن الأستاذ شعبان غني هذه الموضوعات بتوجيهات من أحد الضباط أو خبراء الأمن القومي، لكن هذا الرأي الغريب أثار عواصف الاستهجان.. كنت أرى أن كلمات أنا بكره اسرائيل، لن يكتبها إلا سياسي أراد أن يخرج ما بداخله من غضب إلى الجمهور، وكذلك كانت الكثير من كلمات الأستاذ شعبولا التي بدأت تتخذ شكل البيان الرسمي، أو المنشور
أصبح للخبر تعليقا من واشنطن، وتعليقا آخر من مسؤول محلي، ثم التعليق الأخير لشعبولا
مؤخرا ... صرح الأستاذ شعبان عبدالرحيم بتعليق هام على أزمة رغيف الخبز في أغنية مؤثرة، في هذا الكليب البشع
**


**
أحد معارفي ـ أصغر مني بعشر سنوات تقريبا ـ يحب التمثيل مع اصدقائه في أفلام يوتيوبية، بواسطة الموبايل، عرض واحدا أمامي.... كان مثيرا للضحك. هذا الكليب أدناه ذكرني به، وان كان هذا الكليب المصور في أحد الأحياء الشعبية قد ركز على السخرية من حملة الضرائب الحكومية.. الكليب اسمه الضرايب مصلحتك عند ام التيتي
**


**
اليوم وانا أصعد إلى الأتوبيس أبو جنيه وبريزة، كنت أظن أنني سأدفع جنيه وربع فقط للتذكرة..لكن صديقي العربي أبدى كرما زائدا وقرر أن يتكفل بثمن التذكرتين، وفوجئت بأن سعر التذكرة مئة وخمسون قرشا بالتمام والكمال
الأهم من هذا أنها كانت بالفعل قد زادت قيمتها إلى جنيه وربع وتم ختمها بختم يوضح القيمة الجديدة.. لكنها الآن وبعد أن تم طبع قيمة الجنيه وربع، أخذت ختما جديدا قيمته جنيه ونص
س : هل يمكن في المستقبل أن تطبع تذكرة جديدة قيمتها جنيه ونص، ثم تختم بختم قيمته مية خمسة وسبعين قرش؟؟؟؟؟؟؟؟؟
ملحوظة : أعيش أسعد أيام حياتي.. مش طايق نفسي من الفرحة اللي مش عارف مصدرها

14 comments:

david santos said...

Excellent posting.
Thank you

Abdou Basha said...

ديفيد سانتوس
مش عارف اكتب لك ايه
..
باي

A.SAMIR said...

ديفيد سانتوس دة زي العسل
فاكهة المدونات بجد
مش عارف ليه عندي احساس انه لواء امن دولة
ماعلينا
بالنسبة للاجرة ولو عملوها ب 10 جنيه ولا الهواااا هم الاموات بيتكلموا برضة يا راجل؟
اما شعبولا فهو قمة الاستهبال..عمري ما شفت واحد راس ماله انه يبقى اهبل ومش فاهم
بالنسبة للسعادة...معقول يا راجل مش عارف مصدرها؟
دة الحياة مرشوشة سعادة
تحياتي

مصــــري..!! said...

شعبولا الناس عملت منه بطل وأسطورة والبعض كاد أن يُطير رقبتي وأنا أتكلم عنه عندما كان في برنامج من سيربح المليون.
في النهاية هو شخص يجني الاموال من المتخلفين الذين يُعجبوا به ويعتبرونه بطل.

أما بالنسبة للاجرة ...أيام السادات سعر الارز..أم أنه السكر زاد قرش واحد قامت الدنيا ولم تقعد.والحكومة زودت الف مرة في الف حاجة قبل كده ولم يتكلم أحد.

تحياتي
أسامة

عزة مغازى said...
This comment has been removed by the author.
بنت القمر said...

الاساذ عبده باشا
************
مش ممكن قريبك بتاع الضرايب ده عسل
بجد نكته.. ومين اللي نزلهوله علي التيوب يا لهوي علي المصريين لما يشخصوا علي حد الاعلان تحفه من كتر رخامته
:(
بجد حقنه والواد ابو تيشرت اصفر فكرني ببتاع اعلان ميلودي
يا نهاري بطني وجعتني من الضحك ..ولو اني عندي اكتئاب يتوزع علي بلد بحالها!!ا
ابو نضارة بيضا مش ممكن
تصدق عندي نظارة شمس الفريم بتاعها ابيض

:)) ها اولع فيها دلوقت
ربنا يكرمك وكملت بعم سانتوس
وردك عليه
تحياتي

Abdou Basha said...

لا الشباب اللي في الكليب دول مش قرايبي، بس هما فكروني بواحد معرفة بيعمل أفلام كوميدية زي دي مع اصحابه
:)

بس مين سانتوس ده واضح انه معروف؟؟
صورته مرعبة.. بس مش هحذفه برضو

hesham said...
This comment has been removed by the author.
hesham said...
This comment has been removed by the author.
hesham said...

عبد الرحمن

بوست بلون الايام الرائعة اللى احنا فيها و اللى اشاركك و بشدة رايك فيها بانها اسعد ايام حياتنا و ليس فى الامكان احسن من كده...يوم خبر غلاء الاسعار السار اللى اعلنه احمد عز باشا كعب الغزال كنت قاعد فى الشغل و الناس طبعا عرفت الخبر من النت و اللى جه عليهم بضحك هستيرى و قاللى واحد زميلى بمجرد ما قرا الخبر ..كده بقى اضمن لك و ااكد لك ان هييجى عليك يوم خلال السنة اللى جاية تنزل من بيتكم الصبح بدرى فى جيبك تلاتين جنيه رايح تجيب عيش بس..و ياريت تلاقى

بالمناسبة

الاخ سانتوس ده راجل دماغ بيحب يعلق فى مدونات من لغات تانية غير اللغة بتاعته و مش عارف بصراحة اذا كان بيترجمها و لا بيعلق كده من باب المشاركة و خلاص ..تفتكر بيعرف عربى..مش عارف بس اشك لانه كل التعليقات اللى شفتها له فى مدونات تانية او حتى لما علق عندى مرة كانت بنفس المنظر ده

ماعلينا..انا طولت عليك

تحياتى
هش

مــهــا said...

يا أخى حلوة أوى جميلة مش طايق نفسى من الفرحة دى ..معبرة فعلا
...
اخر اتوبيس ركبته كان من 3 أيام كده ولا حاجة ..هما قالوا إنها جنية وربع بس التذكرة مالحقوش يختموا عليها ..راحوا ادونا تذاكر - ولو إنى قبل كده عمرى ما أخدت تذكرة فى المينى باصات دى - بس كان مكان التمن عاملين خرم شيك كده

بعيدن على رأى سمير ..
لو بقت إيه ..هما الأموات بتكلموا !!؟

يمسيك بالخير يا سانتوس , شكلك أنت سبب المصايب دى كلها
:)

saso said...

من يومين حصلت مظاهرة في اوتوبيس لنفس السبب
التذكرة عليها جنبة وعشر قروش مطبوعة. وختم بجنية وربع
والمحصل عاوز جنية ونص
والناس في كورال محصلش يوم 6 ابريل
بيدعوا علي رئيس الوزرا والحكومة والللي نايم علي ودانه
بس حاولت اعرف مين ..معرفتش

بعد خمس دقايق كان ربع الركاب نزلوا والباص فضي جدا.. وبقي يستاهل الجنية ونص

لو مبسوط بجد اليومين دول
ربنا يديمها عليك ..بس متقراش جرايد ولا تشوف تليفزيون

Abdou Basha said...

صباح الخير
عديت النهاردة يا جماعة على البوست
لاحظت أخطاء نوحوية والاسلوب تقيل في الكتابة

آدي لما الواحد يكتب وهو فرحان
:)

قلم جاف said...

على ذكر الأتوبيس.. فيه حالة من الغضب عندنا نتيجة رفع أسعار الميكروباص إلى 30 قرش.. المشكلة في كم الشلنات والبرايز اللي الواحد مجبر يشيلها في جيبه من جراء هذا الوضع الشاذ.. اللي ناقص يخلوا سعر تذكرة الميكروباظ بـ26 قرش.. مامعاكش فكة تاخد بونبوناية، أو حتة من البونبوناية ، أو تعمل حسابك وتروح زي الشاطر على أقرب محل تطلب منه يفك لك "الشلن"!

مش غريبة إن الشلن يبقى له قيمة بالشكل الغريب دة في الوقت اللي فيه القيمة الشرائية للجنيه ، اللي هو عبارة عن عشرين شلن، بتتدهور من يوم للتاني؟

كليب "الضرائب مصلحتك عند أم التيتي" كليب شديد ومضحك جداً.. الناس دي برضه بتعرف ننفذ حاجات مبتكرة ومضحكة في نفس الوقت..