Wednesday, June 11, 2008

صور عجيبة

لافتات سكندرية
قابلت لافتات في شوارع الاسكندرية.. حسيت انها مش تقليدية.. مش عادية، فيها حاجة غريبة

في الطريق من الجمرك باتجاه ميدان المنشية، لافتة عند تحويل مسار الترام السكندري الشهير، ما لفت نظري هو استخدام لفظ "حرم"ـ على مدخل تحويلة الترام او المترو، ذكرتني اللافتة بمحل في ميدان السيدة زينب مسمى نفسه "الحرم الزينبي"، على طريقة الحرم الجامعي، أو الحرم المكي، او..الخ

حرم..!!؟؟ يخرب بيت المبالغة

على البحر .. أو الكورنيش، وتقريبا ناحية المنشية برضو حتلاقي اليافطة العجيبة دي.. أول ما شوفتها فكرتني لما اتجننت مرة وكنت عايز أعرف أوردو عشان افهم صاحبي الباكستاني بيقول إيه وهو بيكلم ابوه

محجوز عبايات المحتشمة!!ـ تنفع برضو تبقى جملة يرطن بيها باشا قديم أو هانم تركية في مسلسل عن عصر الاحتلال الانجليزي

محجوز عبايات المحتشمة.. أدب يوك، خرسيس

كل اللافتات التي صنعها الانسان في هذا العالم كانت تقول في الغالب : ممنوع الدخول، أما في الموقف ناحية محرم بك حيث يرقد البولمان الخصوصي بتاعي، وجدت لافتة لطيفة تقول ممنوع الخروج، واضح ان الاسكندرانية على شفا الكفر من اللي بيشوفوه من زوارهم القاهريين، اللي عامل اليافطة عايز يقولهم خليكوا عندكم هنا في الموقف الله ياخدكم

:)

أمام محل عصير على خط الترام، وجدت الآتي : قائمة ضخمة من العصائر العجيبة، التصوير سيء فعلا، والصورة غير واضحة، لكن ما لفت نظري أسفل عصير القصب أبو خمسة وسبعين قرش، هو الرضعات.. فيه رضعة الأسد، ورضعة النسر.. حاجة مسخرة، بس شديدة ، الصراحة كنت مكسوف اسال الراجل، لتطلع حاجة معروفة وابان جاهل
:(

**

على سيرة الصور اللي مش واضحة، صورة كمان حسيتها مش طبيعية شوية، يافطة زرقا قدام بوابة النادي.. مكتوب عليها إيه ؟؟ قول انت بقى

!!محظور دخول الأعضاء!!

أنا أعرف اليافطة تبقى محظور دخول غير العاملين، أو الدخول للعاملين فقط، أو أي حاجة كده، انما دي الصراحة جديدة جداااا

تقريبا حسب ما انا فاكر، ده نادي سبورتنج

عجبني منظر العمارات القديمة اللي على البحر.. بالذات الأعمدة الجريكورومانو اللي في البلكونة، وبرضو سألت نفسي سؤال : طب لما العمارة دي تندثر، هيتبني مكانها إيه ؟؟ أكيد هيبنوا ناطحات ملهاش أي أصل يعبر عن روح المدينة وأثارها

مش مهم.. مادام الناس مبسوطة، يبقى مفيش مشكلة

شوفت عمود السواري اللي في البلكونة ؟؟

;)

8 comments:

عزة مغازى said...

انا كمان كنت فى اسكندرية من اسبوعين بس كنت فشغل وملحقتش اتسكع
خطفت ساعة واحدة بس فى اليوم الاخير بين ندويتن عشان الف الف شوية

اخر مرة رحت اسكندرية كنت مستنية نتيجة تنسيق الثانوية العامة كان عندى 15 سنة وكام شهر
كانت ايام سودة كما لك ان تتخيل طبعا
عشان كدة المرة دى كنت راحة اسكندرية بعين مختلفة تماما
عين قارية عن المدينة وعايزة تقراها
صورت حاجات كدة مش كتير لكن برضه مبهرة
فى بساطتهات وجمالها الممزين
خلتنى افكر ارفعها
جميلة اوى دى يا عبد الرحمن
رغم انى شفتها فنص اليوم الا انها صنعت يومى فعلا

bluestone said...

على ذكر الصور السكندرية
صورة يافطة في احد الشوارع الكبيرة في الاسكندرية لمركز طبي مكتوب عليها كده بالحرف

(لدينا أطباء متخصصون في الطب)يظهر فيه في اسكندرية اطباء متخصصين في حاجة تانية غير الطب :))

صورت الصورة بس انا بليدة شوية في التكنولوبيا ومعنديش صبر ارفع وانزل

mohra said...

مصر مليانه صور عجيبه من النوع ده...بس معرفتش ايه رضعه الاسد ديه صحيح؟؟؟

Anonymous said...

البوست دمة خفيف والملاحظات ذكية.اماعن حرم الترام ...فالتعبير صحيح وهو الوصف القانونى للمكان الذى يسير الترام او القطار فية ويمنع الناس من استعمالة فى اى غرض اخر .....تحياتى

بنت القمر said...

عبدو باشا
===========
ادي جزاء اللي يدخل المصاروة
عندهم حق يعملوا الاسكندريه جمهوريه مستقله!!
بتصور و تنزل الصور يا عميل
:)))
بقا رحت مكتبه الاسكندريه وكأنك داخل الكعبه وقدامك كومبيوتر 6في 9 في الاخر
ههههههههه
:(وكمان من غير ايميل
والساعه ب4 جنيه
كنت رحت السايبر في حسن راسم الساعه بجنيه
انا بدخل المكتبه كتير بس اضطراري
عموما لي عوده للتعليق تاني
يا عميل يا قاهري
:)
سلام

Abdou Basha said...

عزة
اسكندرية أكبر من ان الواحد يتعامل معاها كمكان سياحي، فعلا فكرة انه الواحد يتعامل مع الاسكندرية على انها مصيف وبس، حاجة مهينة، دي مدينة حقيقية، رغم ان فيها سينمات أقل من القاهرة
:))
**
ماريان
أطباء متخصصون في الطب!؟
هو تقريبا اللي عامل اليافطة كان عايز يبالغ ويقول انو عندنا يعني دكاترة إنما دكاترة..جامدين يعني، بس العملية وسعت منه
:D
**
مهرة
أنا حسيت انه رضعة الأسد دي خلطة كده زي شاندويتشات الحبشتاكانات والحاجات السخيفة دي، للحظة تخيلت إنه رضعة الاسد والنسر دول الزباين بيشربوهم في ببرونة
:)
**
أنونيموس
بشكرك على الايضاح، يمكن لأن المكان ده كان مليان عربيات في الممنوع فحسيت انه كلمة حرم فيها مبالغة على الموقف، لإنها محققتش غرضها
**
بنت القمر
لا ولسه حضرتك عندي صور أبشع من دي بس مش هنزلها عشان برضو انا عايز اروح اسكندرية تاني ومش عايز الناس هناك ياخدوا مني موقف
:d
انا عرفت انه مكتبة اسكندرية فيها نت بالصدفة، الصراحة أجمل حاجة فيها انه مفيش موظفين خنيقين زي باقي مكتبات مصر العادية
النت كنت معتزله في فترة الاعتكاف السكندري، بس نت المكتبة اغواني اني اجربه
:)

بنت القمر said...

عبدو بيه
=====
سحبت منك البشويه عشان انت عميل !!وده تمهيدا لاعدامك
:))
السينمات كتير في اسكندريه كل مول في سينما غير سينمات محطه الرمل وكارفور وجرين بلازا
شوف لو ها تروح خميس وجمعه في سينما مول الكيروسيز في منطقه مصطفي كامل
التذكرة الصبح ب7 جنيه يوم الخميس ولجمعه حفله 11 الصبح
انا دايما بروحا توفير يعني
:)
وفيها اربع افلام دفعه واحده زي بقيه المولات
بس الكيروسيز تحطم الاسعار تحطيما
لازم كمان تروح شارع النبي دانيال قدام المعهد الثقافي الفرنسي حاجه كده زي سور الازبكيه بتاعكوا
غير مكاتب محطه الرمل اللي ما فيهاش كتب الا وصفات البيتزا علي الطريقه الايطاليه
وكتب عذاب القبر
وكتب المشورات الزوجيه
:((
ممكن كمان تقعد علي البحر في دوران جليم من الطف الاماكن
او بحري قدام القلعه بس دوشه اوي
عموما انت ليك زيارة تانيه بدون ما تسيئ لسمعه المدينه
دايما تنور بيك اليكس
تحياتي

Anonymous said...

ههههههههه

فعلا حاجات غريبه ماسمعتش عنها قبل كده بصراحه