Friday, June 20, 2008

! تحليل طائفي لصورة

ـ لا.. بس حلوة!!ـ
ـ عجبتك؟؟
ـ إنت قاصدها.. ولا طلعت معاك كده ؟
(......)ـ
**
ـ شوف.. الإضاءة متركزة أكتر ناحية الجامع، عايز تقول انه شمس الإسلام مشرقة فوق الجامع، وقوفك في صف الجامع، بيبين تحيزك، وده طبعا أثر على مساحة الكنيسة في الصورة والإضاءة بتاعتها
!!!!!!! ـ
ـ كمان انت واخدها بطريقة إن المأذنة واقفة باصه للسما، في وضع معدول نسبيا مقارنة بحال الكنيسة
!!!!!! ـ
(.......)ـ
ـ أااه.. شكرا على التحليل الجامد ده، تصدق إنها طلعت صورة طائفية، ما كنتش متصور انه أنا طائفي كده ومش عارف
:) ـ ولا يهمك
**
ـ لأ.. استني شوية!! طب ليه متقولش.. إنه الشمس هنا بترمز لشمس الصحرا اللي جه منها الإسلام، وإن الخشب اللي حوالين المئذنة بيعكس انه البنيان ضعيف مهما حاول يعلى، وليه متقولش انه نقاء السما فوق الكنيسة بيعبر عن النقاء ؟؟
!!!!! ـ
**
الصورة.. أي صورة، ممكن يبقى لها ألف تفسير، وانت وضميرك

13 comments:

بنت القمر said...

عبده باشا
===========
مش بس الضمير هو المنوط به تفسير الاشياء ولكن المصالح توجه ايضا طريقتك في التفسير والتحليل
ليك مصلحه ها تفسر الامر بالشكل المعين الاول
ملكش بتفسره بالشكل المعين التاني سواء عن قصد او لا شعوريا
كأنه حقيقه مطلقه
في حاله القصد نرجع تاني علي نقطه الضمير اما في حاله اللاشعور فدي مصيبه اكبر
لانك بتحس انك شهيد لفكرة صحيحه ومستعد للاستماته من اجلها في حين انك مخطئ تماما
:)))
وها اتموت اونطه:)
تحياتي

bluestone said...

لا ملعوبة :))
انا شم فهمت كده خالص
انا فسرتها على انها التنافس المحموم على البناء

كل كنيسة يطلع قدامها جامع عشان السباق
بس العكس نادرا ما بيحصل لان تصاريح بناء الكنائس حاجة شبه مستحيلة وكانت لحد السنة اللي فاتت بأوامر من الرئيس نفسه !!!

وبعدين على فكرة انت ممكن تكون طائفي وانت مش واخد بالك

او الشمس بقى هي اللي كانت طائفية

بنت القمر said...

علي فكرة تعليقي غير مقصود بيه الطائفيه تحديدا
لكن طريقه تحليلي الامور في اي موقف بشكل عام في الحياة اجمالا.. للوصول للحقائق من اول الحب الي الصداقه الي بيع الطماطم
:))))))
في النهايه

summar said...

هههههه
ضحكتنى والله ياعبده
انتى عارف زى اللى بيتلكك
لو شاف ضل عامل علامة كروس يقلك ده مسيحى..المسيحية هى الاساس
ولو شاف خطوط على زلطة يقلك كلمة الله
انا قابلت ناس من دى كتير
واحدة كانت مقتنعة تماما ان اى ضل على حيطة بيكون كلمة الله
:)بس عموما الصورة حلوة
من غير طائفية

karakib said...

اللعبة المدهشة بتاعة الطبيب او المحلل النفسي او الاخصائي الاجتماعي
حط قدامه الصورة ... فيها شمس و بحر و نجوم او فيها اي حاجة
اي حاجة
و خليه يتكلم عنها ... هيطلع كل اللي جواه و تقريبا مش هيتكلم عن الصورة نهائي

blackcairorose said...

بصراحة انا شفتها حاجة تانية

مأذنة الجامع وحولها الخشب كأنها نبات صبار ملىء بالاشواك

Go figure!

Anonymous said...

بجد بوست فى الجون
دايما الل جوا البني ادم بينعكس على اللي حواليه

Dina El Hawary (dido's) said...

بوست حلو قوي .. ومؤكد إن كل شئ حوالينا يحتمل مختلف التحليلات
keep it up :)

عزة مغازى said...

تصدق يا بارا
انا لما قلت بقين بهذا المعنى لد. حسنة عبد السميع اللى كاتنت بتدرسلنا تحليل الخطاب الست كانت هتقتلنى

بوست حلو جداااااااااااا

مــهــا said...

ده إحنا كلنا طلعنا طائفيين يا جدعان
اخر حاجة كنت أتوقعها منك يا عبده
طائفى ؟ طااائفى ؟

بوست جميل
:)

mohra said...

كل واحد بيشوف اللى هو عايز يشوفه

NilE_QueeN said...

هقولك انا اللى فيها



كل اناء ينضح بما فيه

layal said...

ببالي ان الصوره التي تجمعهم- لننظر لها بشكل ايجابي
القدره علي التعايش
وكما قلت كل صوره لها الف تفسير حسب نظره الشخص للموضوع وحسب تفكيره