Wednesday, July 02, 2008

تجمهر صعيدي أمام مكتب الرئيس

حاجة ظريفة.. حاجة ظريفة جدا
في الكوربة وانا ماشي قدام البنك الأهلي ، لقيت تجمهر وشرطة بعيد، مشيت بمحاذاة سور القصر الجمهوري في الكوربة ناحية الميرغني، لقيت عربية من الفيوم بيجو سبعة راكب ركنت جنبي ونزل منها صعايدة.. انضموا لعشرات آخرين وقفوا بين المكتب الرئاسي ومبنى سينما مهجورة
**
منظر الناس بالظبط زي العمال اللي بيبقوا قاعدين على باب الله في الحى التامن أو في ميدان المطرية، قربت.. تقريبا كل الواقفين كانوا شرطة، وحرس قصر الاتحادية = مكتب الرئيس، ومخبرين، و... صعايدة
**
لافتات كارتونية رديئة الشكل، كتب عليها بخط يصعب قراءته عبارات من نوعية، أغيثونا.. أبناءنا يموتون من الجوع
طلعت الموبايل على أمل اني أصور، لقيت مخبر ظريف مسك ايدي وبص على الموبايل يشوف بصور ولا لأ..
ـ إنت تبع إيه؟؟
ـ أنا مش تبع حاجة
ـ طب لو سمحت اتفضل
ـ هو فيه مشكلة؟
ـ ااه بس لو سمحت
ـ هما مالهم؟؟
ـ لأ.. دي حادثة موتسيكل

**
مشيت.. وصعب عليا انه الموبايل يطلع كده على الفاضي من غير ولا صورة للذكرى، اتصلت بصديقة سألتها إذا كان الناس دول ليهم علاقة بالموضوع الطائفي اللي كان حصل في الفيوم من كام يوم ولا ده حاجة تانية، بالذات انه شكله عفوي قوي.. ومفيش صحافة
**
قررت أرجع تاني، كانت العملية سخنت ووقفوا ممثلي القرى في مبني سينما مهجور، وكان اللوا بيملي بيانات القرى في التلفون، على ما وصلت، طلع لي واحد تاني مخبر بس أشد من الأولاني
ـ انت واقف هنا ليه؟
ـ عايز اتابع اللي بيحصل
ـ انت تبع إيه؟؟
ـ أنا صحافة
ـ اتفضل لو سمحت
ـ عايز الكارنية عشان تتأكد؟

هنا وصل المخبر الأولاني وهو متنشن
ـ أنا مش سألتك قبل كده انت واقف هنا ليه؟.. انت بشتغل فين يا كابتن؟
ـ أنا صحافة.. تحب أوريلك الكارنية

حطيت إيدي في جيبي بحركة مفتعلة، بعد ما تحولت إلى كابتن
وانتهى الحال إلى توديع مشهد مجموعة غاضبة محاصرة إلى جدار سينما مهجورة
**
أظرف ما في الموضوع انه بحثت عن الفيوم عشان أعرف ايه اللي بيحصل ده.. لأني فعلا مبقتش أقدر أتابع أخبار الاعتصامات والتجمهرات عشان بقت كتير، وبتحسسني اني في بلد فاشلة، وتقريبا أنا حاليا مش عايش في مصر، أقصد مصر بتاعت الدستور والبديل و الاهرام و..الخ... مصر اللي بتتحرك
:)
لقيت من أخبار الفيوم ما يلي
16 / 03 / 2008 -
مواطني الفيوم يرشقون الوحدة المحلية بالحجارة فيه خطأ نحوي تقريبا
10 / 05 / 2008 -
تجمهر 100 مزارع بسبب تلف 1000 فدان بالفيوم
Mon Jun 30 - النيابة بمصر تحقق مع 23 مسلما بعد محاولة حرق ممتلكات أسرة مسيحية
**
ـ بيقولك إيه!!!؟
ـ إيه؟؟
ـ بيقولك : أنا عازمك النهارده يا حبيبي ع العشا.. بس أوعي تقولي انك بتنام من غير عشا
ـ وعزمه فين؟؟
ـ هنا
_______

10 comments:

Anonymous said...

أنا عايز اعلق على موضوع تامر امين البني ادم ده كفايه عليه كده يروح يشتغل وكيل نيابه احسن من البلاغات اللي بيضربها في الناس علهوا
بالنسبه للناس الل انت شفتهم دول عادى جدا مصر مليانه يا كابتن
:))

wara8mu5a6a6 said...

سؤال يطرح نفسه
و انت فعلا تشتغل في الصحافة ؟؟

mohra said...

هو ايه علاقه الاغنيه(لولا اللينك ماكنتش هاعرف انها اغنيه و لا بعد 100 سنه) باللى قبلها؟؟
اعذرنى ماقدرتش اكملها عشان افهم العلاقه

Abdou Basha said...

أنونيموس
مرحبا.. انت بتحب تامر امين جدا
ياريت تقول أكتر
**
بحرينية
إلى حدما..:)
أنا معي كارنية فعلا من جريدة مش مصرية، لكنه غير مفيد بأي حال
**
مهرة
أنا أول مرة كنت اسمعها امبارح برضو ، العلاقة تقريبا انه واضح انه فيه ناس بتنام من غير عشا زي، زي حبيب سعد الصغير

Migo Mishmish said...

البلد حالها بقى يخنق. لاول مرة في حياتي ابقى زعلانه علشان مش عارفه اخرج منها. انا عندي استعداد اسيبها دلوقتي وهاجر حتى لمدغشقر
كل يوم اتفرج على برنامج الطبعة الاولى واقول يا نهار اسود ايه النيله ديه ويتيألي ان مفيش حاجة انيل من كدة ممكن تحصل. اتفرج على حلقة تاني يوم الاقيها انيل من حلقه امبارح واقعد اقول يا ريتنا كنا استمرينا بحال امبارح. كل 24 ساعه البلد بتتنيل زيادة
مش عارفه اقول ايه. احنا وصلنا لمرحلة الصمت لان الكلام مابقلوش لازمة
Love,
MishMish

بنت القمر said...

http://www.gamaheer.suhufarabia.com/section.php?s_id=567
يقال والعهده علي الجريده انه ده السبب
مراسله صحفيه بنت القمر من منازلهم
تحياتي
بس يعني ايه جريده مش مصريه؟!
مع مين انت بالظبط انت عميل؟؟
:))

Abdou Basha said...

مشمش
معاكي حق.. الاحوال تخنق
**
بنت القمر
لأ.. الموضوع مش طائفي، هما كانوا كاتبين على اليفط ابناءنا بيموتوا من الجوع
المصري اليوم نشرت عنهم النهاردة
http://www.almasry-alyoum.com/article2.aspx?ArticleID=111840

مصــــري..!! said...

مصر بقي كل مترين فيها إعتصام

بلد بدأت تفوق وربنا يسهل.

البلد بقيت بتدور علي رغيف العيش وكوباية مية.

ولا البلاد الأفريقية الفقيرة.

تحياتي
أسامة

NilE_QueeN said...

اتقهر ..انت ف مصر

Abdou Basha said...

مصري
هو مش فقر قد ما هو ادارة فاشلة في الأقاليم والقاهرة، والناس مش بتشارك في الادارة والمسائل بتبقى عائلية اللي بيغلط مش بيتحاسب
:(
**
نايل كوين
والله الواحد ابتدا يتفهم هجرة الريف المفزعة للقاهرة، اللي ابتدت هي كمان تشتكي من نفس المشاكل
لأنه برضو الموظفين الفاشلين بيفضلوا في اماكنهم