Saturday, July 12, 2008

جيفارا مات ؟؟؟؟

أشعر بالتعاسة والغم لمجموعة من الأسباب، الواقع يقول أن هذه المرحلة بالنسبة لي هي مرحلة ما بعد الأسباب، هي المرحلة التي يسألك فيها أحدهم عن السبب فتجيب.. مش فاكر
أرجعت هذه الحالة إلى حادثة وقعت لي منذ فترة، قد تكون هي ما رسخ تلك الأحاسيس الشنيعة
....الحكاية إنه....
صحيت الصبح على مكالمة من زميلة بتشتغل في مكتب الوكالة الفرنسية في بيروت وفاجئتني : شو؟ ما بتعرف انه فيه أخبار عندكن بمصر انه جيفارا مات !!؟
قفلت معاها وفتحت قناة الجزيرة، لقيت مافيش أي حاجة غريبة وكله ماشي عادي، حتى فيصل القاسم كان شغال وقتها
دخلت على جوجل برضو مافيش أي خبر، وكل الحاجات اللي على النت كانت عن علاقته بكاسترو وطموحاته الثورية
اتصلت بواحد اعرفه في الأهرام العربي، لقيته قافل الموبايل، اتصلت بأستاذ آخر في القسم الدبلوماسي للأهرام قالي دي إشاعة ومفيش أي بيان رسمي بيها، ومش ناويين ننشر أي حاجة لحد ما الخبر يتأكد
جبت نمرة سفارة كوبا من الأجندة، وكل اما اتصل يقول لي الرقم مرفوع من الخدمة
نزلت على وسط البلد، حى القهاوى، وقابلت محمد هنيدي اللي كان معايا في الجامعة.. وكان معروف بانه الشيوعي الأخير في جامعة عين شمس عشان كان الوحيد اللي بيقول عن نفسه انه شيوعي، رغم انه كلهم دلوقت بيقولو على نفسهم يساريين، سألته : هو جيفارا مات فعلا ؟ ، قالي إنها خطة، وانه مصر هتشهد أحداث كبيرة جدا في خلال ساعات، بمجرد ما الجماهير تسمع انه جيفارا مات، وتعرف طريقة موته . الثورة هتقوم
سألته : طب هو مات ازاي؟؟
قال لي : كل البلد هتعرف انه جيفارا مات من التعذيب على ايد الحكومة
..
فاتت أيام وليالي، ومحصلش حاجة
هل جيفارا مات فعلا..؟؟
طب لو مات، يعني هتبقى المسألة انتهت كده والراجل راح على الفاضي؟ واذا كان ماماتشي.. يبقى مختفى فين طول المدة دي؟؟؟
الجمعة اللي فاتت الشيخ طلع على المنبر ونبه انه المفروض محدش يتكلم عن جيفارا، لأنه جيفارا هيظهر لما كلنا نعمل اللي علينا وناخد بالاسباب، وقال لا يعلم مكان جيفارا إلا الله، ونفى الكلام اللي بيتقال إنه في سرداب تحت الآرض، أو ان ربنا رفعه لحد ما يرجع تاني في آخر الزمان.. قال ان كل ده كلام فاضي، والمفروض نشتغل ونعمل اللي علينا لحد ما جيفارا يظهر لوحده

!!! واضح انه مفيش حد عارف حاجة عن جيفارا!!!

5 comments:

بنت القمر said...

ادي اللي بيعمله محمود الليثي في شباب مصر
ادي دليل عمالته وخيانته.. وقبضه من ملالي ايران
زهرة شباب مصر ينحرف عن صحيح الدين ويتحول الي مذهب مهرطق.. ويشارك في نشره
ادي اساليب التقيه والتخفي المعروفه في نشر المبادئ الهدامه بتعتهم
رحماك يا رب... ارجع الي نبيك ودينك يا عبدو باشا اللهم اكشف عنه الغمه واهدي قلبه سواء السبيل
امييييييييين

wara8mu5a6a6 said...

يعني شنو !!

hesham said...

عزيزى

للاسف فقد تاكد الخبر

جيفارا مات و شبع موت

و لقد تلقيت رسالة قصيرة من احد مناضلى الشوارع

تختلط فيها السخرية بالحزن

ربما تساعدنى على فهمها فلم افهم معناها حتى الان

الرسالة تقول:


ما رأيكم دام عزكم يا انتيكات

يا غرقانين في
(البوستات والتعليقات)

يا دفيانين ومولعين الدفايات

يا محفلطين يا ملمعين يا جيم سينات

يا بتوع نضال آخر زمن في
(مدونات)

ما رأيكم دام عزكم جيفارا مات

لا طنطنة ولا شنشنة وإعلانات واستعلامات




البقاء لله

Abdou Basha said...

اعتذر على هذا الغموض
تقريبا الموضوع أشبه بواحد بيكلم نفسه
:)

amirakotb said...

لأ بجد عميق قوي