Wednesday, July 16, 2008

هكذا تكلم الفضائيون

المُحاضر كان بيملي الايميل بتاعه على الحضور، وكان بيقول حروف الايميل والأرقام باللغة الانجليزية، فواحدة فضائية سألته سؤال فضائي هام
ـ لو سمحت انت قصدك تلاتة ولا ثريييه ؟؟؟
ومعرفش يرد عليها لأنه كان من كوكب تاني، والغريب... إنها كانت بتتكلم جد، مش بتهزر
**
من فترة وانا عايش حالة من التنقل العنيف بين أهل الكواكب المختلفة، وفيه منهم كان من خارج المجرة بتاعتي
أخدت قراري، وقعدت جنب واحد فضائي كان معايا في الجامعة، قعدت معاه على طرابيزة الأكل.. قال حاجة مهمة جدا عن نفسه
ـ أاه... أصل انا نباتي، مقدرش أكل لا مكرونة ولا رز
وكان برضو بيتكلم جد
**
زمان كنت أعرف فضائيين أظرف من كده بكتيييير
..
تحديث
ليال سألت سؤالا هاما : هل نحن الفضائيون أم هم؟
حتى وقت قريب.. كنت أظن أنني ضمن فئة قليلة تعاني من مخلوقات الأرض، كنت أعتقد أننا هبطنا جميعا إلى الأرض منذ مدة، وأن مركبتنا أمامها عدد من السنوات الضوئية كي تجدنا
مؤخرا، بدأت أرى الأمر بصورة مختلفة.. قد نكون فعلا فضائيون، لكننا لسنا وحدنا، الجميع هنا فضائي، حتى من كنا نظنهم سكانا للأرض، لكن ما يميزنا عنهم، وما يميزهم عنا، هو أن كوكبنا من مجرة أخرى. المسألة فقط اختلاف مجرات ... قد يرى البعض أنها نرجسية وتعالي، ووصم للآخرين، لكن بعد كل هذه السنوات الطويلة في الأرض، تأكد لي أن الأرض لم يعد بها سكان أصليون
الآن.. أعلن بكل فخر موت الإنسان

7 comments:

layal said...

تذكرت مقالك عن الاطباق الطائره
يوفو

هل هم الفضائيون ام نحن ؟؟

appy said...

لااااااا لو سمحت بلاش كلام عن الكواكب الاخرى انا الوحيده اللى كوبك وفيكون فضائى كمان

جابري said...

الفضائيين احتلوا البلد

The Alien said...

الفضائيين اﻷولانيين زعلانين
لكن دول مش دريانين

تحياتي

Abdou Basha said...

ليال
سؤال مهم، سأضيف اجابته في تحديث
**
أبي
لا لا .. فيه فضائيين تانيين كتير
:)
**
جابري
احتلوا العالم كله..
شوف جورج بوش مثلا
**
The Alien
ده مرجعه اختلاف المجرات

سمراء said...

دول انصاف او ارباع مثقفين
يعني يعرفوا مصطلحات لكن ميعرفوش المفهوم
مصطلحات جوفاء

سمراء

Summar said...

فى ناس بتقول فضائيين
وناس بتقول كائنات هلامية لزجة وحيدة الخلية
واحدة زميلتى فى درس الميكانيكا بتسألنى فى وسط الحصة
انتى كنتى علمى علوم ولا علمى رياضة!!
بيني وبينك ساعات بسأل اسئلة فضائية
:)العرق الفضائي فينا كلنا ماينفعش نستغنى عنه كلية