Friday, July 25, 2008

مشروع خد فطيرك

كان فيه (....) ممثلة أفلام إباحية أميركية رشحت نفسها ذات مرة في انتخابات حاكم ولاية كاليفورنيا الأميركية.. كان برنامجها بيضم حاجات غريبة جدا، منها إنها هتشجع الأفلام الإباحية، وهتستخدمها كوسيلة للقضاء على العنف والسلاح في المجتمع الأميركي، لكنها سقطت في الانتخابات، لإن الموضوع كان اقرب للهزار رغم إنها رشحت نفسها بعد كده كمان مرة

هي نفسها برضو.. أعلنت دعمها لأبحاث مرض السرطان، وقالت انها بتقرا الكتاب المقدس وبتصلي كل يوم، وبتتطلع لرئاسة أميركا، رغم انها كانت اتقبض عليها قبل كده لتصرفات غير لائقة ومخالفة للقانون
بس المهم انه فيه صناعة قوية، طلعت بني ادمة زي دي، بقى عندها الطموح انها تمارس السياسة
**
حاليا... فيه حملة لمواجهة الإباحية... خصوصا افلام الانترنت الاباحية اللي بيمثل فيها ناس زي الشيطانة دي.. أدوات الحملة هي مواقع بتعرض طرق حجب المواقع الاباحية، ودعوات لحجب هذه المواقع عن مصر، إلى جانب ملصقات على الحوائط
بس فيه سؤال : بعد خمسين سنة من النهاردة هل الناس هتقول اننا كنا متخلفين عشان كنا بنخش مواقع اباحية، واخلاقنا بايظة ؟
:-)
في منتدى مصري كان
السؤال كالآتي: هل توافق على حجب المواقع الالكترونية عن مصر..؟
وقال أحدهم :
ياريت .... و نبقى مستريحين زي السعودية و الإمارات كده
تقريبا الراجل ده ماعندوش فكرة، لا عن الامارات ولا السعودية، بس لاحظ التعبير اللي قاله: نبقى مستريحين زي الامارات والسعودية، الحقيقة انه الموضوع مش عن الإباحية بس، الفكرة الحقيقية هي البحث عن الراحة والاسترخاء بعيدا عن مشاكل مصر، وطبعا بسبب الاخفاق في حل كل هذه المشاكل.. تم ابتكار قضايا بديلة للدفاع عنها، على امل اننا نستريح بعدها.. بعد الانتصار
نفس السؤال وجهه واحد للشيخ، بيطلب منه كلمة للشباب الضائع بين المواقع الإباحية.. الشيخ ما صدق وفتح في الكلام .. لدرجة انه قال : انا لله وانا اليه راجعون.. وكانت فرصة لتقريع ذئاب الانترنت
**
الملصق الملزوق في الشارع بيقول إيه؟ : حجاب يصون، أو تنهش عيون، وحاطين صورة بونبوناية مغلفة، وبونوناية تانية مفتوحة والدبان واقف عليها، يعني زي المرأة المكشوفة والمرأة المغلفة المحجبة، والعبارة نفسها فيها صيغة تهديد، يعني يا تتحجبي يا هتنهشك العيون والدبان ييجي عليكي
ده ابتزاز .. وتقريبا احنا هنا بنتكلم في ازياء مش أخلاق.. صح ؟؟
فيه حاجة أهم.. فيه ناس ظايطة في كل حتة.. هل هما بيعملوا كده تحت تأثير المواقع الاباحية؟ ولا تحت تأثير البونبوناية المكشوفة؟؟ طب ما فيه محجبات زي الزفت، هو ايه القضية هنا؟؟
**
فيه واحد عنده
مشروع هيغير مستقبل مصر للأحسن، سلسلة مطاعم .. خد فطيرك
الراجل ده مايفرقش حاجة عن أي إعلامي دجال بيطلع في التلفزيون يقول كلام بيعمل عكسه، ولا سياسي كداب بيقول كلام محصلش وهو متاكد انه محدش هيدور وراه..... النماذج كتييير، وكإنهم بيقولوا أيوه هي كده اذا كان عاجبك، عندنا حل لكل حاجة، هنكدب اذا اتزنقنا، وهنفضل في مكاننا، احنا جزء من النهضة اذا فيه نهضة ومن النظام الفاسد اذا كان فيه فساد، سواء موظفين كبار أو صغيرين.. وعندنا مشروع كبييييييير
مشروع خد فطيرك
**
الحملة دي مش قادرة تواجه كل ده، فدورت على الشباب اللي بيبحث عن عالمه الخاص حيث الراحة والأمان مع الجنس الافتراضي، هروبا من احباطات الحياة، وعملت عكس ما عملت العاهرة الأميركية السالف ذكرها.. يعني هي كواحدة هبلة كانت هتواجه العنف بالاباحية، هما برضو عايزين يواجهوا اسباب انهيار المجتمع لكن بحجب الاباحية
دايما الأضعف بيبقى الضغط عليه، يعني سابو كل الــ....، وراحوا على واحد مستخبي ورا كمبيوتر
بس مين عالم!!؟ يمكن الحملة دي تكون من المشروعات اللي هتغير مستقبل مصر، زي مشروع
خد فطيرك

13 comments:

ahmad0101991789 said...

ههههههههههههههههههه
هههههههههههههههههههههههه
ههههههههههههه
إيه سفن إيه
الواد ده جامد كيييييك

قلم جاف said...

وأضيف على كلامك الإفراط الشديد في إعطاء "غض البصر" كل هذه الأهمية كما لو كان هو وحده هو حل كل المشاكل ، واللي بأحس إنه جزء من الدور الضخم اللي بيوليه المتشددين والمستنورين للجنس في حياتنا وتفكيرنا وحتى في شتايمنا كمان..

والظريف في حالة المستنورين همة إنهم ساعات بيحبوا يقلدوا المتشددين في اصطناع التشدد .. فبيكلموك عن "الأخلاق" و "الاحتشام" و "القيم" كمقابلات للغة الدينية المستعملة عند الناس التانيين.. غير طبعاً التشديد على إنهم "ضد الانحلال" بكافة أشكاله.. كلام بيفكرني بلازمة للراحل "صلاح منصور" في أحد الأفلام : "تَلَبُّس يا سَفَلة"!

Abdou Basha said...

ahmad0101991789
نعم.. انه جامد، وجريء، ووقح
:)
**
شريف
فعلا، تقريبا الكلام حوالين الجنس، أو تغيير نصوص قانونية أو تشريعية، او تلخيص مشاكل البلد في فئة حاكمة أو جماعة مصالح
هو هروب من مواجهة حاجات على ارض الواقع من الصعب انها تتغير
فيبقى الكلام على حاجات مش ملموسة
يعني مثلا حملة زي دي هتعرف منين انها نجحت في ان الشباب بقوا اكثر عفة

Amr Ahmed said...

يا راجل دي صورة البونبوانية دي



لو واحدة مش محجبة وعندها استعداد تلبس الحجاب مش هتلبسه ببسبب الصورة
قال بونبوناية قال

وبعدين هي مكافحة اباحية ولا دعوة للحجاب

وعلي رأيك ما محجبات كتير خاربينها

ربنا يهدي

بنت القمر said...

بما انه يا عبدة باشا المجتمع ذكوري طحن
فأن ثقافة النبنونايه ثقافه مقبوله لانه بالاصل تخاطب الرجل
ليه تحصل علي بونبونايه ملوثه طالما تستطيع الحصول علي اخري نظيفه
بونبونايه انت اول من يفض غلافها اول من يلمسها اول من يقتنيها
انت الاول
انت الاوحد
واظن كل واحد عاوز يكون الاول والاوحد احد الملصقات الاخري لماذا ترضي بمن نظر الالاف الي خصلات شعرها الايمتعك ان تكون الاول الذي ينظر الي مفاتنها
ثقافه الاول والاوحد دي ارضاء للرجل
متلومش الطرف الاضعف او الاكثر رضوخا
لانه كده الحجاب بيكون تلبيه لضرورة ومجتمعيه وثقافه ذكوريه
طبها بغض النظر عن اللي خاربينها واللي ظايطين
بتكلم عن الاهل
والبنات العاديه هما بيقدموا بناتهم باعتبارهن بونبونات مغلقات صالحات لالتهام والاقتناء
وقد لا يبالون بادائهن الصلاه مثلا التي هي عمود الدين اصلا
فقط نحن بناتنا مغلقات بالشمع الاحمر والايشارب مش بنات متاحات
هل ترغب في اقتناء نوبونايه مكشوفه طالما بامكانك الحصول علي اخري مغلفه
:))))))

بنت القمر said...

بالنسبه للمواقع الاباحيه
طب من ممكن اسألك هل القضاء علي الادمان اهم ام القضاء علي اسبابه والتي تتشابه جدا مع اسباب الاتجاه للمواقع الاباحيه
فراغ واحباط وبطاله
طبعا انت مش ها توافق اننا نسمح ببيع الامخدرات
ولا اقصد انا الدعوة الي اغلاق مواقع البورنو ولكن
هل مظاهر الانحلال اهم ام اسبابه
برجاء مراجعه فيلم كباريه
تفجير الكباريه لانه المظهر مش السبب لانهيار المجتمع

Abdou Basha said...

عمرو أحمد
تقريبا لان الحملة ملهاش مقياس نقدر نعرف بيه مدى نجاحنا، لإنها بتشتغل في جانب شخصي وسري، فيبقى الحجاب هو الشيء المظهري الملموس الوحيد اللي ممكن يتحكم بيه
زي الناس اللي بتعتبر انتشار الحجاب والأدعية الدينية و..الخ مظاهر صحوة او نهضة
**
بنت القمر
معاكي حق
تعليقك خلاني اشوف حالة البنت ـ مش الحجاب بس ـ مقياس لنجاح هذه الحملة
على فكرة الشاب برضو بيتعمل شغل عليه
بدليل انه الملصقات واللغة المستخدمة، بتخاطب الذكر، على انه هو وحده اللي بيتعامل مع المواقع الاباحية
بس ممكن ده كله يتحط برضو في اطار الفكر الذكوري
:)
بنت بتمثل منتج يجب الحفاظ عليه
وشاب فحل.. ذئب الكتروني

Lasto-adri *Blue* said...

إبتزاز وإبتزال لما أنا أتصور فى شكل بمبوناية لآخر الليل

واضح إن الفكر الوهابى بيحاول يفرض فكرة إن دول الخليج هى جنة الله فى الأرض..

زمان الوصل said...

أنا شخصيا باشوف موضوع الذئاب و الحجاب ده من زاويه أخرى
وهى أنّنا سلّمنا خلاص بأن دور الأمن فى البلد لم يعد موجودا و أن النصر للأعلى صوتا و للأطول لسانا و للأشد ذراعا .. ومن ثمّ الدعوات التى تدعو للبس الحجاب و إلاّ بتضايقنى رغم أنّى من مرتديات الحجاب لأن المنطق نفسه مرفوض !! و المفترض كل الناس فى الشارع تشعر بالأمن و الأمان و يبقى من حقّها لو تعرّض لها أحد بسوء أن ينزل به هو العقاب و ليس بالضحيّه بسبب شكل ملابسها

El Makas said...

هذا نوع من التدين الظاهرى

الذى يشكل بديلا عن الدين الحقيقى .

وهذا التدين البديل مريح وخفيف ولا يكلف جهدا ولا ثمنا لأنه يحصر الدين فى الشعائر والمظاهر .

فالدفاع عن مبادىء الإسلام الحقيقية : العدل والحرية والمساواة . مسألة محفوفة بالمخاطر فى مصر ستؤدى بك حتما إلى السجن وقطع الرزق والتشريد .

أما التدين البديل فلن يكلفك شيئا : وهو يمنحك إحساسا كاذبا بالطمأنينة والرضا عن النفس .

من مقالة لعلاء الأسواني
جريدة الدستور

الترزي

Eman M said...

لا البونبوناية المتغطية و لا المكشوفة، معناها انها حلوة من جوة

L0vElYGh0sT14 said...

مشكلة المواقع الأباحية تكمن في البطالة والفراغ والملل والبعد عن الله والصلاة والعبادة ... ولو جيت تبصلها من الموضوع الصح هما حاجتين البعد عن الخشوع والصلاة والتقرب من ربنا والبطالة واكيد البطالة دي مشكلة اجتماعية وسياسية واقتصادية يعاني منها الشعب المصري الفقير لله
ومن ناحية مشروع خد فطيرتك ... أفتكر أن كله هياخد في طيرته في الأخر بس أنت أكتب أسمك في قائمة الأنتظار وهيجي دورك والسلام أمانة
تقبل مروري ومشاركتي ... أحترماتي

Anonymous said...

على فكرة يا عبده باشا
الموقع المصرى اللى ضربته كمثال.. لا يعتبر معبر جيد عن العقلية المصرية.. ده منتدى أى حاجة هايصقف لها وهوه فى الخباثة هايعمل عكسها..

أهو ده موقع مصرى تانى
http://forum.sonsofegypt.net/t3915-2.html
والأعتقد إن الأخير ده معبر أكثر بصورة حقيقية لأن مساحة الحرية فيه جامدة والناس يتتحاور بجد مش بتصفق وخلاص..