Monday, August 11, 2008

لسه فيكي رجالة يا مصر ← إيه سفن إيه

مترو مصر الجديدة، على رأي واحد أعرفه.. أسرع وسيلة لتضييع الوقت، عموما كنت في المترو العجيب، تمايلت معه، كأني داخل سيارة جيب تسير فوق تبة داخل منطقة عسكرية، وجدت هذا الملصق المؤثر، تذكرت شكايا من اعترضوا عليه في المدونات أو في الفيسبوك المخنث... احترم نفسك، لسه فيكي رجالة يا مصر!!!حملة مجلة كلمتنا ضد التحرش الجنسي

لسه فيكي رجالة يا مصر.. شعرت للوهلة الأولى أن من ابتدع هذا الشعار يهدف إلى التهكم على المصريين، أو على الحملة نفسها
قرأت العبارة بصعوبة، وحاولت تصويرها رغم ضيق الكومساري، ذكرتني الجملة تلقائيا بدبور، أو احمد مكي، وهو متقمص دوره، حين خرج على مريديه قائلا : إيه سفن إيه
افتكرته ساعتها عشان كنت لسه متأثر
بإعلان الفيلم
لكن..ماذا قال دبور أيضا ؟؟ قال في أغنيته:
ده الناس الايام دي ناس جدعان وطيبين
ربما هؤلاء هم من تستهدفهم الحملة
**
يوم الجمعة الماضية، وانا داخل جامع الحاكم بأمر الله مارست سياحة المتصوفة، تجولت قليلا قبل الرحيل، تناثرت أجساد المترفين في اماكن متفرقة من المسجد، وحولي أطفال يركضون في مرح، كأني داخل قصري في الجنة، لولا هذا الحر في هذه الصورة.. كانت الضلالات والهلاوس في اوج عظمتها، حتى ظننت أن هذه الهالة النورانية التي أخفت صحن المسجد هي علامة أو إشارة أو هداية من السماء، وفي لحظة.. نسيت عدد السنوات التي عشتها على هذا الكوكب، وبدات أفكر فيمن يراقبوني من اعلى، وينتظرون عودتي
**
تركت المسجد، واندمجت مع البشر، وعدت واحدا من رجالة مصر المستهدفين
:-)

ــــــــــــــــــــــــــــ

عرض الصيف : بإمكاني تنفيذ كليب دعائي لهذه الحملة يكون محوره الرئيس هو هذه الجملة المؤثرة : لسه فيكي رجالة يا مصر، الفكرة تتلخص في مشهد ليلي، يخرج فيه أهالي القرية بالمشاعل، ويرددون معا نفس الجملة : لسه فيكي رجالة يا مصر.. لسه فيكي رجالة يا مصر.. وتتقدم الجموع فتاة مصرية سمراء ترتدي زي الفلاحة، وبحماسة جان دارك، تشير إلى مكان المتحرش المتحصن في بيت العمدة، لينال جزاءه على يد أهل القرية الرجالة

10 comments:

Hossam said...

hello
it is ma pleasure to be the first comment.
nice topic
but Ahmed Mekki is bad person
his new film is valguer
c u
bye

bastokka طهقانة said...

و بعدين؟

مقلتش عملوا اية في الواد؟


اوروفوار

بثينــــــة said...

أدمنت تجوالك يا أخي
:D
فين البوست اللي فات

عدى النهار said...

المهم إن كلمة "رجالة" مؤنثة.. أكيد الحملة دي مُغرضة

كل الل كنت أعرفه عن الحاكم بأمر الله هو منعه أكل الملوخية لكن ججولته وقريت العجب. البلد دي حكمها ناس خُلل ولفترات طويلة.. ربنا يتوب علينا

بنت القمر said...

مش عارفه انا بقرا من اليمين ولا من الشمال اليومين دول
وانت بتقول
بإمكاني تنفيذ كليب دعائي لهذه الحملة يكون محوره الرئيس هو هذه الجملة المؤثرة : لسه فيكي رجالة يا مصر!!،
==================
ى قلت بسرعه ايه دخل الرئيس في التحرش
لسه فيكي رجاله يقصد مرشحين للرئاسه
هيهيهيهيهيهي
بقا هالة النور طالعه عشانك وهما منتظرينك:))ا
طب ما تقطعش الجوابات يا مولانا مش !!:)
ممكن ده مش انا لوحدي بقا
...السلك اللاسع يمتد وينتشر ويتوغل
سلام

blackcairorose said...

اول ما قريت عنوان الحملة

لسه فيكى رجالة يا مصر

معرفش ليه افتكرت انها حملة موجهة من الرجالة اللى بيتحرشوا، على اساس ان التحرش بيشوفوه اصحابه نوع من اثبات الرجولة !!!!

على باب الله said...

فعلاً حملة غريبة زي حملة
( ما عيب إلا العيب )

بتاعة الساقية


---
و إسمحلي أجاوب من وجهة نظري عن الأستاذ اللي بيسأل

و بعدين؟

مقلتش عملوا اية في الواد؟


" أغتصبوه طبعاً "

---

NilE_QueeN said...

هو فى رجاله اه

بس السوق شاحح صعب تلاقى واحد

Abdou Basha said...

حسام
أنا شفت الفيلم، هو الصراحة مسلي
:)
**
طهقانة
عملوا له عملية جراحية مؤلمة
:d
**
بثينة
شكرا
البوست اللي فات شيلته، عشان لقيته مؤثر زيادة عن اللزوم
**
عدى النهار
هو الحكام، والناس زي الفل.. مايفرقوش عن بعض
:)
**
بنت القمر
الكليب الدعارئي يليق اكتر على شريف صبري
وهينجح اكتر لو روبي رجعت تاني وعملت البنت الفلاحة
**
وردة القاهرة السمراء
فعلا حتى الشعار فيه حس ساخر، مافيهوش جدية
**
على باب الله
كده هنضطر نعمل جزء تاني
**
نايل كوين
كمان فيه مشكله انه مش واضح ايه المطلوب من الرجالة بالظبط

زمان الوصل said...

المشكله أن كثير من مشاكلنا بقينا نتصوّر حلّها فى مجرّد حملات و شعارات !! الحملات كتيره أوى فى البلد اليومين اللىّ فاتوا دول

إشى حملة "حقّك من حقّك" للتوعيه بحقوق الإنسان

وحملة "نحكّم عقلنا نفرح نشتغل كلّنا" بتاعة تنظيم الأسره

وحملة لا للعنف الخاصه بالعنف المنزلى !!

ومين عارف ماذا سيستجد لدرجة مفروض يغيّروا الجمله الشهيره "بلد شهادات " لتصبح بلد حملات !! و الأهم أن ندرك أنّه حين تفعّل حقّا الأشياء التى تدعو إليها هذه الحملات لن نعود بحاجه لحملات !! حد يتصوّر أن يسمع عن حمله لدعم حقوق الإنسان فى أمريكا !! الموضوع محتاج فعل مش حملات بس إحنا بنختار الأسهل و هو الشعارات و الخطب و بعدها نشد اللحاف