Saturday, December 06, 2008

سرد جديد في يوم العيد

بسم الله
أهم حاجة إنه الواحد لازم الأول يسرد حاجة كده.. وبعديها يدخل في اللاموضوع
الفأر يجري وراء القط، والحمل يوبخ الذئب، توتر الحمار وبال على الأسد.. انفعل القرد، اتجه نحو النمر، جره من ذيله، اندلعت غارة على عش النسر بقيادة الذبابة، قام وحيد القرن ورقص، هشم بيضة الديك..... عن غير عمد
اجتمع أعضاء مجلس الإدارة، أصدروا حكما بجلد الأرنب اللعوب مئة جلدة.. سيجلده الفيل بخرطومه

الحمد لله
**
فيه واحد مغني عنده واحد مشكلة، اسمه أشرف يا وهبة...... الليركس لقيتها منشورة عند إنسان ظريف بيستخدم الانترنت زي بقية الناس، وعنده بلوج برضو وكده، المغني بيقول في السرد بتاعه
وانا عامل دماغ تمام .. مام مام مام مام .. مش بانجو ولا برشام.. شام شام شام شام.. مش عايز يا ناس انام.. نام نام نام نام
عاوز اغنى عاوز اقول .. قول قول قول قول.. انا فايق مش مسطول.. طول طول طول طول
وقال كمان : كنت بعامله زى الاخ.. اخ اخ اخ اخ.. خدنى على وشى طراخ.. راخ راخ راخ راخ
وكمان قال : دا انت طلعت قليل الاصل.. اصل اصل اصل اصل.. وانت ملكش اساسا اصل.. اصل اصل اصل اصل.. بكره يا صاحبى مسيرك جاى.. جاي جاى جاى جاى.. يالى ملكش فغدرك زى .. زى زى زى زى
وانا عامل دماغ...........الخخخخ

**
تلات أشهر أو أكتر بسمعها، ومش عارف إيه دي.. أغنية.. مزيكا.. مولد... حسيت إنها اغنية ليبي، بس طلعت مصري، العرب فعلا قريبين من بعض، مثلا حزب مصر العربي الاشتراكي بيحتفل بذكرى صدام، سبحان الله!!ـ قصدي الله يرحمه
**
سأفتقد مدونة التهييس إلى حد كبير، أعتقد ان اغلب مرتادي النت في حاجة إلى التفكير في قرار مشابه، أو التفكير في جدوى الجلوس خلف الشاشة
**
أغنية البانجو والبرشام ـ(= انا عامل دماغ تمام)ـ اللي عرفت اسمها امبارح بس.. مرتبطة معايا بكوبري اكتوبر، ناحية ماسبيرو، كنت من شهرين تقريبا بصور الوقفة المصرية، كان فيه حد واقف على الكوبري وقفة مصرية وبيفكر يرمي نفسه رمية مصرية
ولما سمعتها من كام يوم، اتضح انها كانت أنسب خلفية ملائمة لسبب وجودي أعلى كوبري أكتوبر مع كاميرا ديجيتال
**
أهم حاجة في فترة قبل العيد، ووسط العيد، وبعد العيد بشوية، أنك تسرد.. مع نفسك، أو مع صحابك
السؤال.. يعني إيه اسرد؟ الاجابة :ـ مش مهم، الأهم انك تكون مبسوط، والناس مبسوطة، سواء كنت واقف وقفة مصرية، أو قاعد قعدة مصرية
كل عام وانتم بخير
الأغنية دي أنا متأكد هسمعها كتيييييييير في العيد، وبعد العيد .. عيد عيد عيد عيد

14 comments:

ماء تشرين said...

هو انا مش فهمت حاجه بس كل سنه وانت طيب وكويس وانا من راى متسمعش الاغانى دى وتشرب كوباية مايه قبل النوم
بجد كل سنه وانت طيب

Abdou Basha said...

وانتي طيبة
:)

ghorBty said...

قال النبي صلى الله عليه وسلم "خير الدعاء دعاء يوم عرفة، وخير ما قلت أنا والنبيون من قبلي: لا إله إلا الله وحده لا شريك له، له الملك، وله الحمد، وهو على كل شيء قدير"

كل عام وانتم بخير والامه الاسلاميه بخير وسلام

wara8mu5a6a6 said...

و كل عام و انت بخير يا عبدالرحمن
:)

Bella said...

مش ممكن ياعبده باشا

عليك طريقة جبارة في الانتقال من فكرة لفكرة بسلاسة جبارة

انت تنفع على فكرة تتزعم المذهب السردي الجديد ... يد يد يد

هههههههههههههههه

Bella said...

صحيح نسيت اقول لك كل سنة وانت طيب ياباشا

ويارب كل ايامك اعياد

amirakotb said...

Looool :-)
وكل سنة وانت طيب

summar said...

انا سمعت الاغنية دى فى وسائل النقل البشري

اعصابي تعبت..وبقيت عصبية..علشان نغمة الصوت المستفزة اللى كان بيجعر بيها المطرب
ده بقى اللى بيقولو عليه مطرب من الطرب
والطرب يعنى الخضة
حد بيخض حد يعنى
على رأى معظم الشرقاوية
كل سنة وانت طيب

Cognition Sense said...

في أغنية كدا؟

أنا لسه ماسمعتهاش، و يا رب ماسمعها...


كل سنة وانت طيب

karakib said...

بالسبة للسرد اللي في الاول خلاني اوصل لحد الاخر مش عارف ابطل ضحك :)

م/ الحسيني لزومي said...

تقبل الله منا ومنكم
وكل عام وانتم بخير

Anonymous said...

كل سنة و انت طيب و الجمنهور عايز يعرف ايه اخر اعمالك و كان حساسك ايه و انت بتسرد في العيد سرد جديد

قلم جاف said...

كل سنة وانت طيب يا عبود ..

العيد السنة دي خنيق نيق نيق نيق.. بمتمسلفينه وموظفينه وناصحينه وواعظينه وسلطاته وبابا غنوجه خنيقين لدرجة الموت ..موت ..موت..

حتى ولو ما كنتش أعرف جنسية مطرب الأغنية المعجزة اللي ضربت العبد والشيطان في مقتل .. ما أعتقدش إنها ليبي لإن الدماغ دي مش في الكتاب الأخضر ..أخضر ..أخضر!

ROITER said...

كل سنة وانت طيب ياباشا