قصة شارع مارك وفادي في مصر الجديدة

في حي مصر الجديدة ميدان اسمه، ميدان الإسماعيلية... هكذا عرفه الناس، وهكذا دونته هيئة النقل العام على أتوبيساتها، لكن الواقع أن اسمه الرسمي هو ميدان الخلفاء الراشدين

حملت الشوارع المحيطة أسماء الخلفاء الراشدين وأسماء أخرى ذات طابع إسلامي

من ضمن هذه الشوارع كان شارع عمر بن الخطاب

لكن مارك وفادي قررا إدخال تعديلات هامة على خريطة مصر الجديدة، ودونا اسميهما على اللافتة، ليصبح الشارع هو شارع مارك وفادي

كان هناك أيضا من أراد المشاركة في رسم خريطة الحي، جرجس دون اسمه على شارعي الفسطاط، ومراد بك

هل هو شاب أراد التسلية مع أصدقائه، فكتب هذه الطرائف ؟
أم أن وراء هذه الكتابة نزعة طائفية ؟
أعتقد أن وراء القصة، قصة.. لن يحكيها أحد. ووراء الأسئلة، أسئلة.. لايرغب أحد في الاجابة عليها

ـــــــــــــــــــــــــــــ

2-8-2008 ـ

صور أخرى من نفس الشارع.. عثمان بن عفان، عبارات اسلامية مكتوبة على بعد أمتار من نفس اللافتات السابقة، تقريبا على الجدار الخلفي لمدرسة الفرير 1 - 2

تفاصيل شعبية جدا

هدد الفنان أشرف البرنس بمقاضاة الفنانة هدى بدعوى أنها سرقت لحن أغنية علي يا علي المسجل بالمصنفات الفنية والذي غنته تحت عنوان زكي يا زكي
وكان أحد الهواة قد نشر على الانترنت ريمكس يجمع الأجزاء المتشابهة في الأغنيتين لتوضيح أن اللحن واحد في كل منهما

وذكر أحد عشاق الأغاني البيئة ان لحن الأغنيتين على يا علي، وزكي يا زكي مسروق أصلا من أغنية خش عليه التي غناها مؤخرا المطرب المشهور عماد بعرور

وكان البرنس قد تعرض لسرقة لحن أغنية العنب الشهيرة، ولم يستطع فعل شيء لا هو ولا أخوه جمال البرنس

من ناحية أخرى رفض المطرب الشعبي طه أبو لمونة تشبيه صوته في أغنية علي يا علي بالمطرب عماد بعرور الذي اشتهر في السنوات الأخيرة بأغنية العنب

خدمة وكالة الأنباء الشعبية

والروابط مؤقتة

من سجلات السايكوباتي الناضج

شاهدت أجزاء من جلسة النطق بحكم براءة ممدوح إسماعيل مالك العبارة الشهيرة، وضحكت بشدة، كان منظر المرأة بجلبابها الأسود وهي تدور في الأرض مثير للضحك، أما ما زاد قهقهاتي، فهو منظر الرجل ذو القميص المقلم وهو يصرخ في حركات مسرحية : حسبي الله ونعم الوكيل، وعيناه تطالع الكاميرات
ذكرني المشهد برجل عجوز صرخ ذات مرة في وجه من حوله بقلة حياء يحسد عليها: لا.. ده أنا اقلع لكم ملط هنا واوديكم في داهية

تذكرت بعض العرب الذين قابلتهم في حياتي وتذكرت كل انتقاداتهم للمصريين

**
علمت أن حالة الهيستريا التي أصابت أهالي الغرقى كانت بسبب أنهم رفضوا التعويضات، وأرادوا الاستمرار في إجراءاتهم القانونية.. هكذا قيل، فأصبحت أضحك بهستيريا أكثر كلما شاهدت المشهد المعاد المنقول عن الجزيرة وغيرها
**
كسايكوباتي ناضج، معاد لرغبات المجتمع، تعمدت مشاهدة مباراة الأهلي والزمالك في الشوط الثاني، وفرحت، واستهزأت بفريق الزمالك الذي كان ولا بد أن يهزم.. تناسيت كل شيء، وتعمدت أن ابتسم في سخرية من كل حديث أو مشهد أراه عن يوسف شاهين، وتهكمت على من يفتقدون يوسف شاهين العالمي، وقلت..... الآن لم يبق لهم من بقايا العصر الماضي، عصر فيكتوريا كولديج، سوى عمر الشريف، وبعدها لن يكون لديهم أي شخص عالمي.. سحقا لهم جميعا
**
ما زلت على أعتاب مرحلة النضج السايكوباتي، أودع مرحلة المراهقة السايكوباتية
فإلى مزيد من التقدم والنضج

صراع ثقافي على صفحات كتاب

من الطبيعي أنك تقرأ أحيانا على هوامش الكتب ملاحظات من قرؤوها، خاصة ما يدونه الطلبة المجتهدون في الكتب الجامعية أثناء فترة الامتحانات، وبعيدا عن هدفهم الرئيس من تدوين هذه الملاحظات، فهناك هدف آخر قد يسعى إليه هؤلاء، ألا وهو التأثير في القارئ القادم
**
في المخطوطات القديمة، قد يجد الفاحص أيضا ملاحظات دونها من اطلعوا عليها قبله، ولا يسلم الأمر من توجيهات يوجهونها للقراء، كالتي يتركها المترجم أو المحقق الآن على الكتب الحديثة
الأهم من هذا ان هذه الملاحظات المدونة تشكل إلى حد كبير رؤيتنا لزمن تدوين هذه الملاحظات، لا زمن تدوين الكتاب، فعلى سبيل المثال يقال أن الخليفة الحكم المستنصر بالله آخر الأمويين المحترمين في الأندلس كان تحت يده مكتبة ضخمة تضم الاف الكتب، وذكرت مصادر أنه سجل فيها العديد ملاحظاته.. هذه القصة ألهمت أحد المعجبين بالرئيس جمال عبدالناصر وساعدته حين أراد تقديم عبدالناصر كحاكم مستنير، فذكر انه كان يسجل ملاحظاته على كل كتاب يصله، ويناقش فيه من حوله، القصة رويت بصورة مؤثرة، لكنها عكست في النهاية رؤيتنا لعصر سابق، بربطها بصورة عصر أسبق
**
عن نفسي.. أعتقد أن من يدون مثل هذه الملاحظات هو بصورة أو بأخرى يمارس شيء من السلطة على محتوى الكتاب، وعلى من سيقرأه من بعده، فبعيدا عن محتوى الكتب، وتاثير الكلمات وكيف انها تشكل معرفة القاريء في موضوع ما، فمثل هذه الملاحظات هي مساهمة أخرى في هذا التشكيل
**
منذ اشهر كنت اقرأ الجزء الخامس من كتاب شهادات ورؤى: من تاريخ الحركة الشيوعية فى مصر ، والكتاب كنت قد استعرته من مكتبة عامة، ووجدت بداخله ملاحظات واشارات سجلها أحد/ أو عدد من القراء

في إحدى الشهادات، وتحت عنوان : الموقف من سياسات الاتحاد السوفيتي، ذكر أحد رواد الحركة الشيوعية كيف كان موقف تنظيمه من الاتحاد السوفيتي، وجاءت هذه الجملة نصا

كان ربنا الأعلى هو القيادات السوفيتية

وفي شهادة أخرى حول قضية فلسطين وحرب 1948، جاءت هذه الجمل

...قرار التقسيم كان قرار عملي
وعندما قبلت الحركة الديموقراطية للتحرر الوطني قرار التقسيم كان قبولها على اساس ان هذا هو الطريق ..... تنشا دولتان وبعد وجود نوع من التفاهم تصبحان دولة واحدة

**
في الاقتباس الأول، رأي القاريء أن يشطب عبارة كان ربنا الأعلى هو القيادات السوفيتية، التي لم تكن الا مجازا عن تقديس الشيوعيين في مصر لقيادات الاتحاد السوفيتي

وفي الاقتباس الثاني، رفض القاريء فكرة ان يكون هناك تقسيم إلى دولتين ـ فلسطين + اسرائيل ـ أو ان يكون الاثنان ضمن دولة واحدة
ـ في الأولى كان موقفه ايمانيا، فرفض تشبيه البشر ـ الكفار ـ بالله، رغم ان الله نفسه ذكر في كتابه على لسان فرعون أنا ربكم الأعلى، ولم يأت من يشطب هذه الجملة
في الثانية كان موقفه ـ حسب ظني ـ وطنيا مخلصا مقاوما للتطبيع، وفي علامة الاكس التي وضعها على يمين النص دلالة على أن هذا الكلام مرفوض، فالوجود الاسرائيلي مرفوض، سواء بعد قرار التقسيم أو في دولة واحدة تضمهما معا
**
ربما أزعم هنا ان هذا القاريء لن يستطيع أن يعبث معي، ولن يستطيع ان يشكل رؤيتي لما أقرأ، هكذا أزعم... رغم انه قد ترك أثره بداخلي :)ـ

ما أعتقد فيه أيضا ان المهمة الأعظم عند قراءة الكتاب هو تحليل ما هو مكتوب، لا انتقاء ما يتواءم منه مع رؤيتي
ما فعله هذا القاريء.. هو نفسه ما يفعله أستاذك، وما يفعله إعلامك، وما يفعله أهلك
وربما هو ما أفعله أنا أيضا هنا

مشروع خد فطيرك

كان فيه (....) ممثلة أفلام إباحية أميركية رشحت نفسها ذات مرة في انتخابات حاكم ولاية كاليفورنيا الأميركية.. كان برنامجها بيضم حاجات غريبة جدا، منها إنها هتشجع الأفلام الإباحية، وهتستخدمها كوسيلة للقضاء على العنف والسلاح في المجتمع الأميركي، لكنها سقطت في الانتخابات، لإن الموضوع كان اقرب للهزار رغم إنها رشحت نفسها بعد كده كمان مرة

هي نفسها برضو.. أعلنت دعمها لأبحاث مرض السرطان، وقالت انها بتقرا الكتاب المقدس وبتصلي كل يوم، وبتتطلع لرئاسة أميركا، رغم انها كانت اتقبض عليها قبل كده لتصرفات غير لائقة ومخالفة للقانون

بس المهم انه فيه صناعة قوية، طلعت بني ادمة زي دي، بقى عندها الطموح انها تمارس السياسة

**

حاليا... فيه حملة لمواجهة الإباحية... خصوصا افلام الانترنت الاباحية اللي بيمثل فيها ناس زي الشيطانة دي.. أدوات الحملة هي مواقع بتعرض طرق حجب المواقع الاباحية، ودعوات لحجب هذه المواقع عن مصر، إلى جانب ملصقات على الحوائط
بس فيه سؤال : بعد خمسين سنة من النهاردة هل الناس هتقول اننا كنا متخلفين عشان كنا بنخش مواقع اباحية، واخلاقنا بايظة ؟

:-)
في منتدى مصري كان السؤال كالآتي: هل توافق على حجب المواقع الالكترونية عن مصر..؟
وقال أحدهم : ياريت .... و نبقى مستريحين زي السعودية و الإمارات كده
تقريبا الراجل ده ماعندوش فكرة، لا عن الامارات ولا السعودية، بس لاحظ التعبير اللي قاله: نبقى مستريحين زي الامارات والسعودية، الحقيقة انه الموضوع مش عن الإباحية بس، الفكرة الحقيقية هي البحث عن الراحة والاسترخاء بعيدا عن مشاكل مصر، وطبعا بسبب الاخفاق في حل كل هذه المشاكل.. تم ابتكار قضايا بديلة للدفاع عنها، على امل اننا نستريح بعدها.. بعد الانتصار
نفس السؤال وجهه واحد للشيخ، بيطلب منه كلمة للشباب الضائع بين المواقع الإباحية.. الشيخ ما صدق وفتح في الكلام .. لدرجة انه قال : انا لله وانا اليه راجعون.. وكانت فرصة لتقريع ذئاب الانترنت
**
الملصق الملزوق في الشارع بيقول إيه؟ : حجاب يصون، أو تنهش عيون، وحاطين صورة بونبوناية مغلفة، وبونوناية تانية مفتوحة والدبان واقف عليها، يعني زي المرأة المكشوفة والمرأة المغلفة المحجبة، والعبارة نفسها فيها صيغة تهديد، يعني يا تتحجبي يا هتنهشك العيون والدبان ييجي عليكي

ده ابتزاز .. وتقريبا احنا هنا بنتكلم في ازياء مش أخلاق.. صح ؟؟
فيه حاجة أهم.. فيه ناس ظايطة في كل حتة.. هل هما بيعملوا كده تحت تأثير المواقع الاباحية؟ ولا تحت تأثير البونبوناية المكشوفة؟؟ طب ما فيه محجبات زي الزفت، هو ايه القضية هنا؟؟
**
فيه واحد عنده مشروع هيغير مستقبل مصر للأحسن، سلسلة مطاعم .. خد فطيرك
الراجل ده مايفرقش حاجة عن أي إعلامي دجال بيطلع في التلفزيون يقول كلام بيعمل عكسه، ولا سياسي كداب بيقول كلام محصلش وهو متاكد انه محدش هيدور وراه..... النماذج كتييير، وكإنهم بيقولوا أيوه هي كده اذا كان عاجبك، عندنا حل لكل حاجة، هنكدب اذا اتزنقنا، وهنفضل في مكاننا، احنا جزء من النهضة اذا فيه نهضة ومن النظام الفاسد اذا كان فيه فساد، سواء موظفين كبار أو صغيرين.. وعندنا مشروع كبييييييير
مشروع خد فطيرك
**
الحملة دي مش قادرة تواجه كل ده، فدورت على الشباب اللي بيبحث عن عالمه الخاص حيث الراحة والأمان مع الجنس الافتراضي، هروبا من احباطات الحياة، وعملت عكس ما عملت العاهرة الأميركية السالف ذكرها.. يعني هي كواحدة هبلة كانت هتواجه العنف بالاباحية، هما برضو عايزين يواجهوا اسباب انهيار المجتمع لكن بحجب الاباحية

دايما الأضعف بيبقى الضغط عليه، يعني سابو كل الــ....، وراحوا على واحد مستخبي ورا كمبيوتر
بس مين عالم!!؟ يمكن الحملة دي تكون من المشروعات اللي هتغير مستقبل مصر، زي مشروع
خد فطيرك

آخر الضباط الجراكسة

ـ خالك عنده ميت سنة!!؟
ـ معدي المية، هو يبقى خال والدي الله يرحمه
ـ لازم مرة أبقى أقابله..هه؟
ـ لأ.. مش ممكن
ـ هو لسه بوعيه.. و لا مريض؟
صمت قليلا، ثم انطلق في الحكي وكأنه لم يسمع سؤالي
ـ الأميرالاي قاسم عثمان، أبوه يبقى عثمان شوكت كان ضابط مميز في الجيش وكانت تربطه صداقة بعزيز المصري من ايام الطفولة وعشان كده فضلت العلاقة دي مستمرة بين قاسم وعزيز المصري بعد أما مات أبوه مع نهاية الحرب العالمية الأولى، أما جده فكان شوكت باشا أغا، من اللي شاركوا عرابي في مواجهة الاحتلال الانجليزي، وكان من المخالفين لعرابي طول عمره، لكن وقت الخطر.. راح له ومجموعة من الظباط وحلفوا قدامه على المصحف انه مفيش عسكري انجليزي هيدخل مصر طول ما احنا عايشين، ومات بعدها بسنتين من القهر
ـ العيلة كلها عسكر!؟
ـ قاسم بيه عثمان ربنا يديله الصحة، ده حكاية تانية، مثلا كان مرشح انه ينضم للظباط الأحرار وفعلا السادات جرب يستدرجه عشان يعرفه بالتنظيم لأنهم كانوا عارفين انه محبط من احوال الجيش، لكنه صارح عبدالناصر في مرة وقال له انا سامع عن التنظيم، بس مقدرش أشارك معاكم، واكتر من كده رشح لهم اسم كذا حد منهم محمد نجيب انهم يستعينوا بيهم كقيادة كبيرة
قاسم بيه كان عارف من بدري عن تجمع الظباط وانهم بيدبروا حاجة، لكنه كان ساكت، واكتر من كده وقف معاهم من غير ما حد فيهم يعرف، وللأسف مفيش دليل على الكلام ده غير كلامه هو
ـ إزاي؟
ـ قاسم بيه كان متعاطف معاهم وعنده فكرة عن نشاطهم من زمان، حتى قبل تكوين التنظيم كان بيتوقع انه الجيش هيظهر منه حركة زي دي لأنه كان عارف طبيعة الظباط اللي حواليه، وياما ضلل قادة عشان يترك مساحة عمل للتنظيم، ده غير انه تغاضى عن كتير من انشطة بعضهم من اللي كانوا تحت قيادته رغم انه كان عارف انتماءاتهم واتصالاتهم بره الجيش، مرضيش يأذيهم عشان كان مؤمن بيهم
مرة حكى لي قاسم بيه، انه قبل الثورة بفترة بسيطة كلم جمال عبدالناصر، وقال له خلاص يا جمال المسألة قربت، يا تعملوا حاجة، يا تفضوها سيرة، حتى جمال عبدالناصر زعل وقتها.. قاسم بيه محبش يشارك معاهم إنما كان ممكن يشارك اذا حب، لأن علاقته بعبدالناصر كانت كويسه
ـ وشارك معاهم في الثورة؟
ـ يوم ما قامت الثورة، كان قاسم بيه في مبنى القيادة واضطر انه يحضر الاجتماع مع رئيس الأركان وقادة من الجيش، وطبعا ضباط الثورة اعتبروه من أتباع القيادة وانه كان موافق على الاجتماع ده لاجهاض الثورة.. فما صدقوا، واتقبض عليه وبعدين أفرجوا عنه بعد وساطة محمد نجيب اللي كان متأكد انه قاسم بيه حظه هو اللي خلاه هناك في الاجتماع ليلة الثورة، لكن ده ميمنعش انه تم طرده من الجيش بعدها مباشرة
ـ وطول الخمسين سنة دي بيعمل إيه؟
ـ كان بيتنقل بين فيلته في مصر الجديدة وقصر عثمان شوكت في الزمالك، وبعدين اتاخد منه قصر الزمالك اللي بقى حاليا سفارة دولة أفريقية
ـ مفيش أي نشاط، أي كتاب، أي ظهور؟
ـ قاسم بيه اعتزل الدنيا من بعد الثورة، إلا من لقاءات محدودة، و في الفترة اللي اتاخد منه قصر الزمالك اتمنع من السفر، وكل الناس بعدوا عنه، ابنه كمال حاليا عايش في كاليفورنيا بيتعالج من سرطان الرئة وأحفاده كلهم هناك، وبنته جـُلـُس موجودة معايا هنا في باريس ومعدية السبعين
ـ أنا لازم أقابله.. خلاص؟
ـ مش ممكن، ناس كتير حاولوا معاه من زمان، ظباط جيش، باحثين، صحافيين، كان بيرفض دايما، يمكن مرة او اتنين قابل باحثين اجانب وكانوا بيعملوا في مرة بحث عن العائلات الشركسية في مصر، ومرة تانية بحث عن سكان مصر الجديدة.... حاجة زي كده
ممكن تلاقي اسمه في الوثائق اذا دورت كويس، قاسم بيه كان ليه دور في عمليات كانت بتحصل بره مصر، وابوه ساعد المجاهدين في ليبيا، وهو نفسه كان اقترح في الاربعينات على مجموعة من الضباط إنشاء تنظيم سري يساعد مصر انه يبقى ليها دور في العمليات اللي بتم ضد الاحتلال جوا وبره مصر، لكن الفكرة منجحتش وكانت هتوديه في داهية، لكن أفكاره اتحققت أيام عبدالناصر على مستوى الدولة
كمان تم التحقيق معاه مرتين عشان كانوا شاكين انه ليه أنشطة بره الجيش، وبسبب علاقاته مع سياسيين ودبلوماسيين وصحافيين
قاسم بيه كان ملهم لكتير من الظباط، لكن غموضه، وحبه لكرامته، وبعده عن الأضواء خلاه بعيد عن الأحداث
**
بعد سماع هذه القصة من سلطان باشا، استمر الحديث بيننا حوالي نصف ساعة عن أنشطته الحالية في باريس، أغلقت السماعة، وأخذت أفكر، في أي أرشيف قد اجد قاسم بيه، وهل يستحق البحث عنه؟ أم الأفضل أن تظل حياته سرا يستمتع به وحده هو وأفراد عائلته؟
من صنع قدر قاسم بيه؟ هل زهده في مشاركة الآخرين أنشطة لم يصنعها؟ أم رغبة الآخرين في إبعاد ملهمهم عن الصورة؟

سؤالات من الشارع

أين ذهب صقر؟

في ميدان روكسي.. وتحديدا في الإشارة أمام سينما روكسي، لفت نظري العداد التنازلي الجديد، الذي يرشد رجل المرور، وقائدي السيارات إلى الفترة المتبقية لتحول لون الاشارة الى الأخضر أو الأحمر
يا ترى مكتوب إيه جوا الاشارة دي.. غير العد التنازلي اللي بالثواني

مكتوب جواها الآتي.. مصنع الاشارات الضوئية، المدينة الصناعية الثانية – الدمام ... الصراحة افتكرت على طول صقر الله يمسيه بالخير، وقولت أمال صقر راح فين..؟ جاله عقد عمل في السعودية؟
**

لماذا يحرق الكاوتش؟

بعد بولاق ابوالعلا، وناحية القللي، فيه ورش كتير، على اساس انها جنب السبتية اللي فيها محلات تخدمهم، بس الغريب منظر الراجل ده وهو بيحرق الكاوتش في وسط الشارع، كان عامل حريقة فظيييعة، وريحة زفت، وبعض الناس واخدين الموضوع ببساطة، وبعضهم كان بيدعي عليه، بس مفيش حد اتخذ موقف تجاهه
مش عارف ايه اللي يستدعي حرق كاوتش؟
**

من يحل اشكالية مفهوم البيئة ؟

وانا رايح في زيارة لفندق من فنادق نيلنا العظيم جنب الأوبرا، لفت نظري الإعلانات المتكررة عن أسبوع أفلام البيئة، الكلام ده كان من أسبوعين او اكتر، أول حاجة خطرت على بالي، البيئة بمعناها الدارج الآن في العامية المصرية.. كتعبير عن البيئات والطبقات الاجتماعية المتواضعة، واصحاب السلوك الرديء، من مدة وده المعنى التقليدي لكلمة بيئة

مفيش شك انه المفروض تتعمل فعلا أفلام عن البيئة ـ بمفهومها الاجتماعي ـ اللي بيلوثوا البيئة ـ بمفهومها العلمي بتاع الامم المتحدة والايزو ـ بس أشك انه فيه الوعي البيئي العظيم ده، على الأقل عند الراجل اللي بيحرق الكاوتش في القللي
**

وحدة مصير، أم قيود أبدية؟

في شارع جامعة الدول العربية في المهندسين اعلان كبير لفيلم حسن ومرقص، مش عارف ليه حسيت انه الصورة ليها معنى تاني غير القراءة التقليدية لمضمونها، المسألة مش قيود في الايدين كدليل على وحدة المصير، انما القيود ممكن يكون معناها انها القيود اللي خانقة الطرفين، وان الطرفين محبوسين بقيود الوطن

هكذا تكلم الفضائيون

المُحاضر كان بيملي الايميل بتاعه على الحضور، وكان بيقول حروف الايميل والأرقام باللغة الانجليزية، فواحدة فضائية سألته سؤال فضائي هام
ـ لو سمحت انت قصدك تلاتة ولا ثريييه ؟؟؟
ومعرفش يرد عليها لأنه كان من كوكب تاني، والغريب... إنها كانت بتتكلم جد، مش بتهزر
**
من فترة وانا عايش حالة من التنقل العنيف بين أهل الكواكب المختلفة، وفيه منهم كان من خارج المجرة بتاعتي
أخدت قراري، وقعدت جنب واحد فضائي كان معايا في الجامعة، قعدت معاه على طرابيزة الأكل.. قال حاجة مهمة جدا عن نفسه
ـ أاه... أصل انا نباتي، مقدرش أكل لا مكرونة ولا رز
وكان برضو بيتكلم جد
**
زمان كنت أعرف فضائيين أظرف من كده بكتيييير

..

تحديث

ليال سألت سؤالا هاما : هل نحن الفضائيون أم هم؟

حتى وقت قريب.. كنت أظن أنني ضمن فئة قليلة تعاني من مخلوقات الأرض، كنت أعتقد أننا هبطنا جميعا إلى الأرض منذ مدة، وأن مركبتنا أمامها عدد من السنوات الضوئية كي تجدنا

مؤخرا، بدأت أرى الأمر بصورة مختلفة.. قد نكون فعلا فضائيون، لكننا لسنا وحدنا، الجميع هنا فضائي، حتى من كنا نظنهم سكانا للأرض، لكن ما يميزنا عنهم، وما يميزهم عنا، هو أن كوكبنا من مجرة أخرى. المسألة فقط اختلاف مجرات ... قد يرى البعض أنها نرجسية وتعالي، ووصم للآخرين، لكن بعد كل هذه السنوات الطويلة في الأرض، تأكد لي أن الأرض لم يعد بها سكان أصليون

الآن.. أعلن بكل فخر موت الإنسان

عن أعراض قلة النوم

في حالة مرور عشرة أيام أو أكثر مع عدم حصولك على القدر الكافي من النوم، قد تواجه الأعراض التالية

ـ عدم القدرة على توضيح آراءك، أو الوصول إلى نقطة محددة في حديثك
ـ الانزعاج الشديد بسبب الموسيقى العالية أو صخب السيارات
ـ القيام بأعمال غير تقليدية أو متهورة ربما لم تقم بها من قبل
ـ الانصياع لأوامر من لم يكن لديهم عليك أي سلطان
ـ التمرد على أشياء تافهة لا تستحق عناء التمرد
ـ التبلد والجز على الأسنان في مواقف تقليدية تستحق منك الاسترخاء أو الابتسام
ـ الانفعالات غير المحسوبة والمبالغ فيها، والإحساس بالاضطهاد والمؤامرة
ـ الإحساس بتورم العينين، حتى إن كانتا في حالتهما الطبيعية
ـ الرغبة في تثوير كل قضية حتى إن كانت طلب كوب من الماء
..
هذه بعض الأعراض التي تم اختبارها بالفعل في العشرة أيام الماضية، وهي قابلة للتحديث، كلما ظهرت أعراض جديدة
**
أما عن الأعراض الطبية والجانب العلمي للظاهرة، فالأفضل متابعة صفحة الجمعية النفسية الأميركية وما تحتويه من روابط عن نفس الموضوع
http://www.apa.org/topics/whysleep.html
..

اقتباس

ويفترض العلماء أن بقاء الإنسان مستيقظا لمدة ثمانية عشر ساعة دون نوم أو النوم لمدة ست ساعات فقط يوميا يمكن أن يكون له تأثير مماثل لشرب الخمر للدرجة المسموح بها قانونيا

في صحتك
:)

جيفارا مات ؟؟؟؟

أشعر بالتعاسة والغم لمجموعة من الأسباب، الواقع يقول أن هذه المرحلة بالنسبة لي هي مرحلة ما بعد الأسباب، هي المرحلة التي يسألك فيها أحدهم عن السبب فتجيب.. مش فاكر
أرجعت هذه الحالة إلى حادثة وقعت لي منذ فترة، قد تكون هي ما رسخ تلك الأحاسيس الشنيعة
....الحكاية إنه....
صحيت الصبح على مكالمة من زميلة بتشتغل في مكتب الوكالة الفرنسية في بيروت وفاجئتني : شو؟ ما بتعرف انه فيه أخبار عندكن بمصر انه جيفارا مات !!؟
قفلت معاها وفتحت قناة الجزيرة، لقيت مافيش أي حاجة غريبة وكله ماشي عادي، حتى فيصل القاسم كان شغال وقتها
دخلت على جوجل برضو مافيش أي خبر، وكل الحاجات اللي على النت كانت عن علاقته بكاسترو وطموحاته الثورية
اتصلت بواحد اعرفه في الأهرام العربي، لقيته قافل الموبايل، اتصلت بأستاذ آخر في القسم الدبلوماسي للأهرام قالي دي إشاعة ومفيش أي بيان رسمي بيها، ومش ناويين ننشر أي حاجة لحد ما الخبر يتأكد
جبت نمرة سفارة كوبا من الأجندة، وكل اما اتصل يقول لي الرقم مرفوع من الخدمة
نزلت على وسط البلد، حى القهاوى، وقابلت محمد هنيدي اللي كان معايا في الجامعة.. وكان معروف بانه الشيوعي الأخير في جامعة عين شمس عشان كان الوحيد اللي بيقول عن نفسه انه شيوعي، رغم انه كلهم دلوقت بيقولو على نفسهم يساريين، سألته : هو جيفارا مات فعلا ؟ ، قالي إنها خطة، وانه مصر هتشهد أحداث كبيرة جدا في خلال ساعات، بمجرد ما الجماهير تسمع انه جيفارا مات، وتعرف طريقة موته . الثورة هتقوم
سألته : طب هو مات ازاي؟؟
قال لي : كل البلد هتعرف انه جيفارا مات من التعذيب على ايد الحكومة
..
فاتت أيام وليالي، ومحصلش حاجة
هل جيفارا مات فعلا..؟؟

طب لو مات، يعني هتبقى المسألة انتهت كده والراجل راح على الفاضي؟ واذا كان ماماتشي.. يبقى مختفى فين طول المدة دي؟؟؟

الجمعة اللي فاتت الشيخ طلع على المنبر ونبه انه المفروض محدش يتكلم عن جيفارا، لأنه جيفارا هيظهر لما كلنا نعمل اللي علينا وناخد بالاسباب، وقال لا يعلم مكان جيفارا إلا الله، ونفى الكلام اللي بيتقال إنه في سرداب تحت الآرض، أو ان ربنا رفعه لحد ما يرجع تاني في آخر الزمان.. قال ان كل ده كلام فاضي، والمفروض نشتغل ونعمل اللي علينا لحد ما جيفارا يظهر لوحده

!!! واضح انه مفيش حد عارف حاجة عن جيفارا!!!

محمود الليثي بين الواقع والخيال

اتهامات لمطرب شعبي بترويج المذهب الشيعي في مصر
الليثي ينفي صلته بطهران ويؤكد على حبه لآل البيت

مكتب الحقائق – القاهرة
نفى المطرب الشعبي محمود الليثي في بيان ـ تلقت الحقائق منه نسخةـ ما أشيع عن حصوله على دعم مالي من الحرس الثوري الإيراني بهدف الترويج للمذهب الشيعي عبر كلمات أغانيه، وأكد متحدث رسمي باسم شركة صوت الطرب المنتجة لأعمال الليثي أن ما أثير مؤخرا هو إشاعات تهدف إلى تحطيم النجاح الذي حققته الشركة في الفترة الأخيرة
وكانت جريدة المصري اليوم قد أشارت في تقرير لها يوم الثلاثاء الماضي إلى حدوث لقاءات بين المغني الشعبي وشخصية إيرانية رفيعة المستوى في بهو أحد فنادق حي الحسين التاريخي بمدينة القاهرة، ونشر التقرير صورا لليثي وهو يتسلم مظروفا من رجل تبدو عليه الملامح الإيرانية

وامتنعت الخارجية الايرانية عن التعليق على الخبر، بينما ألمح مسؤول في الحرس الثوري الايراني ـ رفض الكشف عن اسمه ـ إلى دور أميركي وراء الأزمة الأخيرة التي وصفها بالمفتعلة بين مصر وايران
وكانت أغنية سيدي عبدالرحيم التي غناها الليثي ضمن ألبومه الأخير ـ كان فيه ولدـ قد أثارت عددا من الكتابات الصحافية والنقاشات بين مرتادي الانترنت حول ما احتوته من تمجيد للإمام الحسين حفيد النبي محمد

وقال الكاتب الصحافي مصطفى بكرى في عموده بجريدة الأسبوع المصرية أن المطرب المذكور دأب في الفترة الأخيرة على الاستهزاء بالمقدسات الإسلامية وغناء أجزاء من النصوص الإسلامية في الكباريهات والحانات

وكانت مدونة فارس الدعوة ذات التوجه السلفي أول من أشارت إلى ما وصفته بالمضمون المتشيع لكلمات الأغنية، وهو ما تبنته العديد من المنتديات والمدونات الاسلامية فيما بعد
وطالب محمد الكتاتني عضو جماعة الإخوان المسلمين والنائب البرلماني بضرورة فتح تحقيق حكومي حول ما أثير عن استقطاب الحكومة الإيرانية لمغنيين شعبيين مصريين
وتقول الأبيات التي اثارت الجدل مؤخرا :
إلى آل بيت النبي من أهلي خدوني
على باب سيدنا الحسين عالباب وخدوني
الحسين مني وأنا منه
اللي يمسه بالسوء آكل منه
كشفوا ضريح الحسين
فاح العبير منه
ويستعد الداعية المصري يوسف البدري لرفع دعوى قضائية ضد المغني محمود الليثي يتهمه فيها بازدراء الاديان والاساءة إلى الرموز الدينية عبر أغانيه

ولآل النبي محمد مكانة خاصة لدى جمهور المسلمين ويلقب أحفادهم بالأشراف والسادة، كما تعامل سيرة الحسين بن علي بحفاوة بالغة لدى أبناء الطائفة الشيعية حول العالم

وذكر محمد منير مجاهد منسق مصريون ضد التمييز في بيان صادر عن المجموعة أن مصر تعيش حالة من التعصب الديني ضد الأقليات الدينية لابد من مواجهتها على كافة الأصعدة الثقافية والاعلامية
من ناحية أخرى أعلن المجلس الأعلى للطرق الصوفية في مصر تبرئه من أي علاقة بالجمهورية الإسلامية الإيرانية، مشددا على علو مكانة آل البيت وأولياء الله الصالحين لدى المصريين، وذكر الشيخ محمد المركوبي شيخ الطائفة المركوبية أن الإنشاد في حب آل البيت ظاهرة قديمة تستحق التقدير، ولا تقتصر على أبناء الطائفة الشيعية
الجدير بالذكر أن العلاقات المصرية الإيرانية قد شهدت توترا في العام الماضي بعد منع فوج سياحي إيراني من إقامة أحد الشعائر الشيعية حول أضرحة آل البيت في مصر
**
المكتوب كله خيال، غير حقيقي، لن أندهش إن قرأت ما يشبهه صباحا في إحدى صحفنا السيارة

تنويعات على "أنا مش عارفني" لعبدالباسط حمودة

أخبرتني زميلة عزيزة أنها وصلت إلى مرحلة الاختناق التام بسبب أغنية أنا مش عارفني المتوافرة في كل بقعة وصل إليه العمران القاهري، أخبرتها أنها تقريبا رقم ـ 3873ـ في قائمة من ذكروا لي نفس الجملة
الأمس كان يوما عصيبا، شعرت ببعض الوحشة، خاصة بعد حفل تأبين الدكتور رؤوف عباس مساء، كعادتي أحيانا.. هربت من هذا التجمع سريعا، لم أبحث عن عبارات المجاملة التي تتلى بعد كل ندوة أو سمنار أو جلسة نقاش أو حفل أو..الخ، وليت بعيدا عن الجماعة والجامعة، إلى موعد مسائي جديد
**
أعتقد أن عبدالباسط حمودة كان يعاني من عدة أزمات في أغنيته، منها مثلا أزمة الهوية، و نوستالجيا الطفولة، وربما اكتئاب، وربما عقدة اضطهاد
**
الأتوبيس الأخضر تم تخفيض سعره من جنيه ونصف إلى جنيه وربع، وإلى يساري سائق يتقمص شخصية الليمبي ويؤديها على مسرحه المتواضع خلف عجلة القيادة، ارتدى ثوب السوقية هو وزميله قاطع التذاكر، وإلى يميني ناحية الشباك مراهق أراد أن ينضم إلى ثنائي السوقية بمشاركة فعالة أذاع فيها أغنية أنا مش عارفني انصياعا لأوامر السائق الصغير الذي طلب منه أيضا سوجارتين
**
أثارت الأغنية قضية هامة بالنسبة لي.. لا عن هويتي، لكن عن تنقلاتي العجيبة التي أعيشها في اليوم الواحد أحيانا
قد أكون صباحا بجوار بسين أو بسيم كما ينطقها الليمبي، ثم اخرج إلى الشارع لأقفز في ميكروباص، قد أحصل على أموال غزيرة في حقبة ما، وفي فترة أخرى اشعر بقيمة القرش الضائع، أحيانا أجلس إلى فتيات رقيقات وشباب متأنق، وفي مشهد آخر أكون بصحبة من يتحدث عن مشاكل زملائه في العمل الذين ضربوا بعضهم بالنعال من أجل عشرين جنيه
**
ما أعرفه أنني عارفني، لكن كثرة التنقلات، بين السيارات المكيفة، والميكروباصات، بين التأنتخ في دور الفخامة التي لا أحبها إلى الآن، والتسكع الرخيص في شوارع القاهرة.. وسط كل هذه التناقضات، بدأت أتساءل عن المستقر والمقام
كارثة كبيرة أن تكون وسطي، معتدل، مستقل، أن تكون قضيتك الإنسان، لا السلطة والسيطرة

تلصص على مدونات الآخرين

حين انتهيت من قراءة رواية التلصص .. أردت أن أرفع سماعة التلفون و أطلب أي انسان قرأها كي يقيم رأيي أنا فيها، لا أن يتلو عليّ تقييمه هو لها، ابتعدت عن الفكرة تماما، فتحت الكمبيوتر وتلصصت على مدونات آخرين، في عملية دامت ساعة على الأقل، وأغلقت الكمبيوتر، ورحت لحالي

**

حين بدأت قراءتها منذ أسابيع، قرأت عشر صفحات، وشعرت بملل شديد من التفاصيل، تركتها لأسابيع وعدت إليها، ثم انهيتها منذ عشرة أيام تقريبا، أكثر ما أعجبني في الرواية هو فكرة التلصص، لأنني ـ ولست وحدي في هذا تقريبا ـ أمارس التلصص، وبعد التلصص.. اندهش، واتساءل

التلصص في قراءة الصحف، مشاهدة التلفزيون، سماع الأغاني، ركوب المواصلات، مراقبة الحضور في أي اجتماع، التسكع أو التمشية في لفظها المهذب، حتى الأصحاب يتحولون إلى حالة للدراسة أحيانا.. وكأني أنثروبولوجي يراقب أجناس وأقوام ومجموعات

**

لأجرب التلصص على مدونات الآخرين

**

ساعات بيتحول كلام الناس إلى افيهات، وأحيانا كليشيهات، وأحيانا بيبقى زي جمل في تريلر فيلم
على سبيل المثال

والارض ما فيش اي وجه شبه بينها وبين الارض اللي كنت عليها من 22 سنه
حتى شكل وطعم الجاتوه مختلف

**

مش ضايقة أى حاجة ولا أى حد ولا ضايقة أشتغل ولا عارفة أعمل حاجة ولا أخرج من الحالة دى
بوسبوس قصدها .. مش طايقة

**

الشاب النصرانى بينام فى بيته مطمن
الشاب المسلم بينام قلقان خايف من قانون الطوارئ
**
أنا باكرهكوا كلكوا....
**
وسألت كتيييييييير هل فعلا القطط بتحلم ؟؟
وياترى لو بتحلم بتحلم بإيه ؟؟
**
- يا ماما خلقة ربنا...
في وصف أحمد عز على مدونة نوارة نجم
**
تنتابني تساؤلات حول الطريقة التي سأقضي نحبي بها..

**
عندما أزور مكان سياحي ككنيسة أو بيت آثري ، أكون مشغولة بالخبط على الأبواب
**

يقول بعض أصدقائى أنى تحولت لإبريق شاى

**
نمر العربية عندك خدها و روح للظابط
**
مكسوف لإننا بقينا صفيحة زبالة العالم

**

كان يحلم فقط بالحب والحرية

**

هناك من لديهم قدرة على إفساد أي شيء على الآخرين حتى أبسط المتع الانسانية البسيطة

**

الحكومة تلحق تلم نفسها وتحكم شعب غيرنا، عشان نحكم نفسنا من جديد على نضافة..

**

جرت العادة على ان تكون ليلة الحنة قبل الزفاف بليلتين أو بفترة عشان العروس تستريح وتستعيد لياقتها
**

بدايه التزامي كانت بسبب رؤيا

**

بيضايقني فعلا لما حد يقابلني ، و يسألني ، قال يعني كنوع من الحميمية : انت فين

**

أنا متأكد أنه فيه حد عدى أو بيعدي أو هيعدي هنا، وبتجيله نفس الحالة

تجمهر صعيدي أمام مكتب الرئيس

حاجة ظريفة.. حاجة ظريفة جدا
في الكوربة وانا ماشي قدام البنك الأهلي ، لقيت تجمهر وشرطة بعيد، مشيت بمحاذاة سور القصر الجمهوري في الكوربة ناحية الميرغني، لقيت عربية من الفيوم بيجو سبعة راكب ركنت جنبي ونزل منها صعايدة.. انضموا لعشرات آخرين وقفوا بين المكتب الرئاسي ومبنى سينما مهجورة
**
منظر الناس بالظبط زي العمال اللي بيبقوا قاعدين على باب الله في الحى التامن أو في ميدان المطرية، قربت.. تقريبا كل الواقفين كانوا شرطة، وحرس قصر الاتحادية = مكتب الرئيس، ومخبرين، و... صعايدة
**
لافتات كارتونية رديئة الشكل، كتب عليها بخط يصعب قراءته عبارات من نوعية، أغيثونا.. أبناءنا يموتون من الجوع
طلعت الموبايل على أمل اني أصور، لقيت مخبر ظريف مسك ايدي وبص على الموبايل يشوف بصور ولا لأ..
ـ إنت تبع إيه؟؟
ـ أنا مش تبع حاجة
ـ طب لو سمحت اتفضل
ـ هو فيه مشكلة؟
ـ ااه بس لو سمحت
ـ هما مالهم؟؟
ـ لأ.. دي حادثة موتسيكل
**
مشيت.. وصعب عليا انه الموبايل يطلع كده على الفاضي من غير ولا صورة للذكرى، اتصلت بصديقة سألتها إذا كان الناس دول ليهم علاقة بالموضوع الطائفي اللي كان حصل في الفيوم من كام يوم ولا ده حاجة تانية، بالذات انه شكله عفوي قوي.. ومفيش صحافة
**
قررت أرجع تاني، كانت العملية سخنت ووقفوا ممثلي القرى في مبني سينما مهجور، وكان اللوا بيملي بيانات القرى في التلفون، على ما وصلت، طلع لي واحد تاني مخبر بس أشد من الأولاني
ـ انت واقف هنا ليه؟
ـ عايز اتابع اللي بيحصل
ـ انت تبع إيه؟؟
ـ أنا صحافة
ـ اتفضل لو سمحت
ـ عايز الكارنية عشان تتأكد؟
هنا وصل المخبر الأولاني وهو متنشن
ـ أنا مش سألتك قبل كده انت واقف هنا ليه؟.. انت بشتغل فين يا كابتن؟
ـ أنا صحافة.. تحب أوريلك الكارنية
حطيت إيدي في جيبي بحركة مفتعلة، بعد ما تحولت إلى كابتن
وانتهى الحال إلى توديع مشهد مجموعة غاضبة محاصرة إلى جدار سينما مهجورة
**
أظرف ما في الموضوع انه بحثت عن الفيوم عشان أعرف ايه اللي بيحصل ده.. لأني فعلا مبقتش أقدر أتابع أخبار الاعتصامات والتجمهرات عشان بقت كتير، وبتحسسني اني في بلد فاشلة، وتقريبا أنا حاليا مش عايش في مصر، أقصد مصر بتاعت الدستور والبديل و الاهرام و..الخ... مصر اللي بتتحرك

:)
لقيت من أخبار الفيوم ما يلي
16 / 03 / 2008 - مواطني الفيوم يرشقون الوحدة المحلية بالحجارة فيه خطأ نحوي تقريبا
10 / 05 / 2008 - تجمهر 100 مزارع بسبب تلف 1000 فدان بالفيوم

23/05/2008 - تجمهر المئات من أهالي قرية سيد بركات بالفيوم بسبب انقطاع المياه منذ 40 يوماً

٩ يونيو ٢٠٠٨ - تجمهر المئات في الفيوم والدقهلية احتجاجا علي عدم وصول المياه إلي أراضيهم

19حزيران/يونيو2008 - الغيرة تدفع شبانا مصريين للهجرة غير الشرعية برغم خطر الموت

Mon Jun 30 - النيابة بمصر تحقق مع 23 مسلما بعد محاولة حرق ممتلكات أسرة مسيحية
**
ـ بيقولك إيه!!!؟
ـ إيه؟؟
ـ بيقولك : أنا عازمك النهارده يا حبيبي ع العشا.. بس أوعي تقولي انك بتنام من غير عشا
ـ وعزمه فين؟؟
ـ هنا

_______

تحديث- 3يوليو : ما نشر عن القصة في المصري اليوم

برجاء تبليغ الداخلية عن المواقع الوحشة

أول مرة من أسابيع.. أو من شهور، أشوف برنامج البيت بيتك، الصراحة شفت جزء من فقرة عن أخطار الانترنت والاتجاهات الإباحية فيها، كان الحضور دكتور سهير عبدالمنعم من مركز البحوث الاجتماعية والجنائية، ورئيس تحرير الحوادث محمود صلاح، وعمر الشريف المستشار القانوني لجهاز تنظيم الاتصالات
**
كان تامر أمين بيتكلم عن حادثة لراجل في مصر أتقبض عليه عشان ناشر صور بنته على الانترنت، وانه فيه في الفيسبوك مجموعة شباب فاسد بتدعو لحفلات جنس جماعي
المهم انه رئيس مباحث الانترنت كما عرّفه تامر أمين، أو مدير الإدارة العامة للمعلومات والتوثيق حسبما تم تقديمه فيما بعد اتصل عشان يوضح نقطة هامة، وهي أنه شغل مباحث الانترنت بيتم عن طريق البلاغات، وهنا استنكر تامر أمين وقال ازاي الداخلية تشوف حاجات غلط كده ومتدخلش، وأخدته الشهامة، وقال : أنا يا سيادة اللوا بقدم بلاغ على الهوا عن الناس اللي بتدعو للجنس الجماعي اللي في الفيسبوك دول.. بلاغ من المواطن تامر أمين
ودعا إلى تكاتف الجمهور مع الداخلية في التبليغ عن المواقع الاباحية المؤذية
**
الصحافي محمود صلاح ظريف جدا، اقترح انه يجب مواجهة هذه المواقع بالشباب نفسهم، على طريقة: اللهم اهلك الظالمين بالظالمين.. وقال لازم نجرس الناس اللي بتدعو للرذيلة ونشهر بيهم على الانترنت، ونعمل صفحة سوداء نكتب فيها أسمائهم وأسماء المواقع السيئة دي، وكمان مواقع بيضاء للحاجات النضيفة
**
تامر أمين قال انه مش بيفهم في الانترنت كويس، وخمن انه فيه طريقة ممكن منها الأب يخش ورا عياله يشوف دخلوا على مواقع إيه ويفتش وراهم، قام الصحافي قاله لا.. ده العيال دلوقتي جامدة وممكن يضحكوا على أهلهم
وهنا كانت الكلمة الوقورة من دكتورة علم الاجتماع عن دور الأسرة والصداقة مع الأبناء
**
الدروس المستفادة من الحلقة
ـ بإمكاني ان أبلغ عن أي موقع فيه شباب بيهيس، وعاملين حفلة جنس جماعي، زي المتخلفين اللي بيعملو حاجات وهمية كده في الفيسبوك
ـ بإمكاني أن أبلغ عن مدونة مخنوق منها عشان بتزدري الأديان، أو بتحض على الفسوق
ـ بإمكاني أن أقوم بدور أكثر طليعية وان أقيم حملة لحجب موقع معين أو على الأقل تجريسه، في حالة إن كان لاديني أو متهتك
ـ ممكن أن تكون مدونتي أو أن يكون نشاطي على الانترنت، شاهدا عليّ و بمثابة دليل إدانة أحاكم به
ـ الشباب قليل الأدب تامر أمين ممكن يبلغ عنهم في أي وقت
هناك ثلاث طريق للتبليغ
إما عن طريق أرقام الوزارة وتحديدا مباحث الانترنت
عن طريق موقع وزارة الداخلية المصرية
عن طريق الذهاب مباشرة إلى هناك
**
تقريبا... حلقة ظريفة لكن كان ينقصها بعض السينس أوف هيومر