Friday, July 10, 2009

أمير المنشدين وإمام الزاهدين - عمرو دياب 2009

على تل متواضع أمام شباب وهبوا أنفسهم للذكر والزهد، أنشد قصائده في حب الله وآل البيت الكرام، وعم الأرض دخان من أفئدة مشتعلة بعشق الواحد القهار، و فاحت رائحة زكية مزجت المسك والبخور، فدارت الرؤوس، ومالت الأعناق، وتساقطت الدموع بغير حساب، كنت معهم في ثغر مارينا، أستمع، وارقص، على أنغام سماوية
**
كله الا حبيبي
ودي تبقي دنيا
الا ويا حبيبي
انا ليا مين في الدنيا بعد حبيبي
سمعنا وبكينا.. وشكينا ظلمهم رسول الله، وخرج شاب يرتدي تي شيرت صوفي ضرب على صدره بقبضة قوية وصرخ : كله إلا حبيبي.. إلا رسول الله
فردد الشباب عبارته، ثم عاد إنشاد عمرو دياب من جديد
**
بنات رابعة العدوية كن هناك، لم يمنعهن شيء عن التجمع في رحاب الزاهدين، أغشي على كثير منهن بعد أن أنشد الهضبة قصيدة "الله على حبك إنت" التي أهداها إلى صاحب المقام، حامي مارينا وإمامها مولانا أبو عبيد الله الماريني درة الخاشعين وشيخ المجاهدين في بحر الروم والأندلس
الله علي حبك انت
مبحبش غيرك انت
والدنيا عندي انت والدنيا عليك شويه
عاشق صوته وكلامه
عايش علي أحلامه معرفش ليه قدامه بتلف الدنيا بيا

**
رائحة الدخان أدارت الرؤوس، وضربت الدفوف فوق الآذان.. وعلا الصراخ حين أنشد هضبة الإنشاد قصيدة مولانا الماريني، حلوة الأيام، وذبنا جميعا في العشق الإلهي على انغام اندلسية
ايام بتفوت يا حبيبي وبتعدي علينا
وكاني بعيش انا وانت في دنيا لوحدينا
ايام.. حلوه الايام
يا حبيبي معاك ولا في الاحلام
**
رددنا أسماء الله وصفاته.. ثم حملنا ذخائرنا وعاد كل زاهد إلى بلاده محملا بحب الله ورسوله

12 comments:

amirakotb said...

نسيت مولانا رامي عياش في كليب يا مسهرني... بأمارة السبحة اللي كان بيسبح بيها...

كمان غادة عبد الرازق في العرض الخاص لدكان شحاتة كانت لابسة... طبعاً محترم بأمارة السبحة اللي لفتها على إيدها...

ولعلمك... ناصر عبد الرحمن ده صوفي كبير ماشي في الطريق هو كمان... ضلمة بأة ولا منور دي مش مشكلتنا...

كفاية حقد بقى يا عبد الرحمن... الناس كلها بقت متصوفة وانت
اللي رافض تسمع لصوت العقل والضمير...

amirakotb said...

ياه ... ده غير السبحة أنا أول مرة أخد بالي إن أول جزء من "كله إلا حبيبي" متاخد كوبي بالمللي من أغنية "خير البرية" في مدح الرسول -ص-...

بوست جامد جدا يا عبد الرحمن

Abdou Basha said...

والاتنين متاخدين عن لحن البنت الشلبية لفيروز، اللي هو متاخد من قد حلبي اسمه العزوبية طالت عليا غناه صباح فخري

Abdou Basha said...

على فكرة بعيدا عن الموضوع. مش كل أغاني عمرو دياب ـ وغيره ـ بتبقى فعلا عن الحب، مرة قال في مقابلة عن أغنية من أغانيه إنها معمولة لمصر، وأغنية تانية قال انه عملها للست والدته

amirakotb said...

مش قادرة أفهم بصراحة انت بتتكلم جد ولا كعادتك بتشتغل اللي قدامك :-)

Abdou Basha said...

شوفي يا أميرة تعليقك الأخير ده مهم جدا لأنه فعلا أنا حاسس اني قربت أفقد مصداقيتي
:D
**
بس انا بكلمك جد
الأغنية اللي كان بيتكلم فيها عن الست والدته
اسمها وهي عاملة ايه دلوقت، ألحان عصام كاريكا
الأغنية بتاعت مصر دي مش فاكر اسمها دلوقت، بس كانت كلمات الشاعر الراحل مجدي كامل
**

El - Shandwely said...

مجدى كامل ولا مجدى النجار ؟؟

الاغنية على ماعتقد اسمها "ملهاش حل تانى "

واغنية يا عمرنا تقريبا كان غناها لما سمع انه والده بدا يشتد عليه المرض

بستمتع بالمناسبة بقرأة جديدك

MooN MoN said...

مع كامل إحترامي ليك و لكلامك الناقد الساخر جدا جدا و أخيرا لمدونتك ..


و أرجوك قبل ما تعتبر تعليقي نقد ليك >> اعتبره نصيحة صادقة من اخت متواضعة جدا ليك في الاسلام ..

مهما كان رأيك و تصورك تجاه اي حد او اي حاجة و خاصة لو خطر في بالك انك تعرضه على المدونة او حتي في حوار عابر مع اي شخص بطريقة مرتبطة بالدين و هتذكر الرسول (صلى الله عليه و سلم) او الصحابة >> لازم تاخد في اعتبارك ان الناس دول ليهم إحترامهم و مكانتهم و تقديرهم اللي لازم ياخدوه كامل مكمل .. لأن و إسمحلي في الكلمة >> دول مش ناس انت كنت بتلعب معاهم كورة أول إمبارح و لا معارف راسك براسهم تجيب سيرتهم و انت بتتكلم عن عمرو كلاب ده و لا غيره من اللي واخداهم الدنيا لما مضيعاهم و مش هتخليلهم فرصة يفهموا انهم ماشيين في سكة اللي يروح ......



أرجوك إفتكر قوله تعالي ( مَا يلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )



ديه كانت مجرد نصيحة متواضعة ليك لا قصدت بيها تجريح و لا غيره
بس حسيت انها بقت موضة اليومين دول اننا نغلط كتير في اللي يستاهل الغلط و بناخد في الرجلين اللي مايستهلش ..

و عموما يارب تقبل النصيحة بصدر رحب و تعمل بيها و تنصح غيرك كمان ..




مودتي,

سلام

Abdou Basha said...

شندويلي
تقريبا هي دي الأغنية فعلا
من البوم ويلوموني
**
مووون مون
أنهي جزء اللي ضايقك ؟

mohra said...

رغم سخريتك الشديده و الممتعه بالفعل الا انى ارى ان شعراء الصوفيه يستخدموا نفس الالفاظ

"الحبيب و الساقى و الغرام و الولع

صحيح تختلف النوايا و لكن الالفاظ واحده

mahasen saber said...

يرغم انك عيشتنى جو الصوفيه اليى بحبه الا انه معتقد انه يليق انك تدخل الرسول الكريم وسيرته فى بوست زى ده
عن ولع الشباب الماريناوى وغيره بعمرو دياب

يعنى مفيش وجهه مقارنه ولا تشبيه بين حب الصوفيين للرسول وتعبيرهم عن حبهم ليه

وحب معجبين عمرو وولعهم بيه

وبيفضل برضه المعنى فى مخ الشاعر بس دى ملاحظتى الوحيده

Abdou Basha said...

فيه من اللي بيحششوا في حفلات عمرو ومنير كانوا بيتظاهروا عشان الرسول وقت الدنمرك، ودلوقت عايشين في قضية مروة الشربيني بكافة جوارحهم
بنفس الحماس، ونفس الأداء
وده شيء ممتع وملفت للنظر