Thursday, April 18, 2013

حوار فاشل عن ناس فاشلة

- هل ممكن مكان فاشل ينتج حاجة ناجحة ؟
- يعني حسب .. ممكن مرة الدنيا تظبط مع الفاشلين بالحظ.
-  لأ طبعا مستحيل .. لما تبقى القيادة فاشلة ، و السياسة فاشلة ، و الناس اللي بتتنافس فاشلة ، ولما يبقى الزباين نفسهم فاشلين ..  دي تبقى بيئة لا يمكن تنتج حاجة ناجحة !
- النجاح يا أستاذي الفاضل حاجة نسبية ، يعني كل الفاشلين اللي انت بتحكي عنهم دول عندهم معايير تانية للنجاح .. من الآخر النجاح هو انك تحقق الرضا لجميع الأطراف ، و طبعا اللي يرضي الفشلة يبقى انسان ناجح ، حتى لو حسب معاييرهم.
- بس اللي انت بتقوله ده مش منطقي ، خلينا نبتدي من الأول .. احنا لما نوصف حد انه فاشل ، فاحنا من الأساس بنقول انه شخص مش متوائم مع فكرة إدارة الأمور بشكل طبيعي ، يعني الفاشل بيخرج عن الشكل الطبيعي للتصرفات ، يعني الوضع الطبيعي إن الفاشل ده يبقى غريب الأطوار ، أو منبوذ .. مثلا : الطبيعي انك بتنقل فتيس العربية من الأول للتاني وبعدين التالت ، يقوم يجيلك الشخص الفاشل ينقل الفتيس من الأول على التالت على طول .. وده لا يمكن يستمر لإنه بتصرفه الفاشل ده ، هيتسبب في تدمير العربية بعد فترة .. طب لو فرض ان كل الناس عملت زيه ، وقرر الفاشلين إنهم يفرضوا قواعدهم ، هيحصل إيه ؟
- هيحصل إيه ؟
- اللي هيحصل إن مدربين السواقة ، هيبتدو يدربوا الناس على إنهم ينقلوا الفتيس من الأول على التالت على طول .. ويبقى المتدربين بيسألوا ، طب هو ليه مش بننقل على التاني وبعدين التالت؟ فيتقالهم : لأ التاني ده مالوش لازمة أصلا ، احنا كده بننجز، ويقنعوهم إن ده الصح .. بعد فترة العربيات في البلد الفاشلة دي هتخرب ، ويروحوا للميكانيكية ، ويبتدي الميكانيكية يعملوا فلوس من الفشل ده ، ولإن الميكانيكية بيستفادوا فهيسكتوا ، ويستمر الفشل !
- بس في الحالة هيفضل كل واحد في البلد دي فاكر انه بيحقق نجاح؟
- لكن في النهاية الوضع ده مش هيستمر مهما حصل ، هيحاول الفشلة إنهم يقربوا ولو على مضض من الوضع الطبيعي.
- طب في وسط العك ده كله ، إيه موقف الناس اللي كانت ماشية طبيعي طول الوقت ؟ هيبقوا عايشين ازاي ؟
- يا إما هيسيبوا الناس الفاشلة دي بدري ويروحوا مكان طبيعي ، يا إما هيصبروا ، لحد ما يثوروا عشان يفرضوا قواعد جديدة ، و ترجع الدنيا لوضعها الطبيعي ، وإذا ماقدروش يثوروا ، فأكيد هييجي وقت على الفشلة إنهم يحسوا انهم محتاجين يرجعوا للوضع الطبيعي عشان الدنيا بتنهار ، ساعتها هيدوروا على الناس الطبيعيين ، واللي فضلوا محافظين على نفسهم ، وماحاولوش يقلدوا الفاشلين. 
- بس خد بالك من حاجة ، إن اللي ما اختاروش يبقوا زي الناس الفاشلين دول أكيد هيكونوا اتشوهوا ، ونسيوا الوضع الطبيعي بيبقى ازاي ، لأنهم في نظام فاشل وغريب ؟
- كله عارف الصح والغلط .. حتى الفاشل ساعات بيبقى عارف اسباب فشله بس مش عايز يعترف ، في يوم من الأيام اللي متمردين على الوضع الفاشل ده بيوصلوا ، ويخوضوا حربهم ، عشان يحطوا التعريفات السليمة للفشل ، والنجاح .

No comments: