العلاقة بين مايكل جاكسون وباراك أوباما

عربية ملاكي بورسعيد.. سايقاها بنت محجبة، لسه محتفظة في الخلفية بشعار حملة أوباما، لتنضم إلى الأوبامويين في آسيا، واستراليا، وحتى في إسرائيل، بل وفي السودان أيضا !!.. أتساءل هل ستحتفل الفتاة المحجبة يوما ما بذكرى رحيل أوباما؟ هل ستوقد له شمعة كما فعل بعضهم من قبل مع جيفارا، والأميرة ديانا؟ أم سيبقى أوباما أسير نظرة العالم لأميركا؟
إيه العلاقة بين باراك أوباما ومايكل جاكسون ؟
باراك أوباما.. لم يأت من فراغ، فهو تجسيد حلم مارتن لوثر كينج الذي فقد حياته بسببه، هو تطور طبيعي، لمحاولات جيسي جاكسون الوصول إلى الرئاسة الأميركية، هو نتيجة طبيعية لحضور امرأة سمراء كأوبرا وينفري، هو التسلسل الطبيعي لوجود كولن باول، ثم كوندوليزا رايس في الادارة الأميركية
فماذا عن مايكل جاكسون؟
انظر الكليب أسفل هذه الثرثرة، وإن كانت لديك ذاكرة قوية تحتفظ بشكل حركات مايكل جاكسون نجم الثمانينات والتسعينات، ستكتشف أنه هو أيضا كان امتدادا لمن قبله

قصة شارع مارك وفادي في مصر الجديدة

في حي مصر الجديدة ميدان اسمه، ميدان الإسماعيلية... هكذا عرفه الناس، وهكذا دونته هيئة النقل العام على أتوبيساتها، لكن الواقع أن اسمه الرسمي هو ميدان الخلفاء الراشدين

حملت الشوارع المحيطة أسماء الخلفاء الراشدين وأسماء أخرى ذات طابع إسلامي

من ضمن هذه الشوارع كان شارع عمر بن الخطاب

لكن مارك وفادي قررا إدخال تعديلات هامة على خريطة مصر الجديدة، ودونا اسميهما على اللافتة، ليصبح الشارع هو شارع مارك وفادي

كان هناك أيضا من أراد المشاركة في رسم خريطة الحي، جرجس دون اسمه على شارعي الفسطاط، ومراد بك

هل هو شاب أراد التسلية مع أصدقائه، فكتب هذه الطرائف ؟
أم أن وراء هذه الكتابة نزعة طائفية ؟
أعتقد أن وراء القصة، قصة.. لن يحكيها أحد. ووراء الأسئلة، أسئلة.. لايرغب أحد في الاجابة عليها

ـــــــــــــــــــــــــــــ

2-8-2008 ـ

صور أخرى من نفس الشارع.. عثمان بن عفان، عبارات اسلامية مكتوبة على بعد أمتار من نفس اللافتات السابقة، تقريبا على الجدار الخلفي لمدرسة الفرير 1 - 2

سؤالات من الشارع

أين ذهب صقر؟

في ميدان روكسي.. وتحديدا في الإشارة أمام سينما روكسي، لفت نظري العداد التنازلي الجديد، الذي يرشد رجل المرور، وقائدي السيارات إلى الفترة المتبقية لتحول لون الاشارة الى الأخضر أو الأحمر
يا ترى مكتوب إيه جوا الاشارة دي.. غير العد التنازلي اللي بالثواني

مكتوب جواها الآتي.. مصنع الاشارات الضوئية، المدينة الصناعية الثانية – الدمام ... الصراحة افتكرت على طول صقر الله يمسيه بالخير، وقولت أمال صقر راح فين..؟ جاله عقد عمل في السعودية؟
**

لماذا يحرق الكاوتش؟

بعد بولاق ابوالعلا، وناحية القللي، فيه ورش كتير، على اساس انها جنب السبتية اللي فيها محلات تخدمهم، بس الغريب منظر الراجل ده وهو بيحرق الكاوتش في وسط الشارع، كان عامل حريقة فظيييعة، وريحة زفت، وبعض الناس واخدين الموضوع ببساطة، وبعضهم كان بيدعي عليه، بس مفيش حد اتخذ موقف تجاهه
مش عارف ايه اللي يستدعي حرق كاوتش؟
**

من يحل اشكالية مفهوم البيئة ؟

وانا رايح في زيارة لفندق من فنادق نيلنا العظيم جنب الأوبرا، لفت نظري الإعلانات المتكررة عن أسبوع أفلام البيئة، الكلام ده كان من أسبوعين او اكتر، أول حاجة خطرت على بالي، البيئة بمعناها الدارج الآن في العامية المصرية.. كتعبير عن البيئات والطبقات الاجتماعية المتواضعة، واصحاب السلوك الرديء، من مدة وده المعنى التقليدي لكلمة بيئة

مفيش شك انه المفروض تتعمل فعلا أفلام عن البيئة ـ بمفهومها الاجتماعي ـ اللي بيلوثوا البيئة ـ بمفهومها العلمي بتاع الامم المتحدة والايزو ـ بس أشك انه فيه الوعي البيئي العظيم ده، على الأقل عند الراجل اللي بيحرق الكاوتش في القللي
**

وحدة مصير، أم قيود أبدية؟

في شارع جامعة الدول العربية في المهندسين اعلان كبير لفيلم حسن ومرقص، مش عارف ليه حسيت انه الصورة ليها معنى تاني غير القراءة التقليدية لمضمونها، المسألة مش قيود في الايدين كدليل على وحدة المصير، انما القيود ممكن يكون معناها انها القيود اللي خانقة الطرفين، وان الطرفين محبوسين بقيود الوطن

جيفارا مات ؟؟؟؟

أشعر بالتعاسة والغم لمجموعة من الأسباب، الواقع يقول أن هذه المرحلة بالنسبة لي هي مرحلة ما بعد الأسباب، هي المرحلة التي يسألك فيها أحدهم عن السبب فتجيب.. مش فاكر
أرجعت هذه الحالة إلى حادثة وقعت لي منذ فترة، قد تكون هي ما رسخ تلك الأحاسيس الشنيعة
....الحكاية إنه....
صحيت الصبح على مكالمة من زميلة بتشتغل في مكتب الوكالة الفرنسية في بيروت وفاجئتني : شو؟ ما بتعرف انه فيه أخبار عندكن بمصر انه جيفارا مات !!؟
قفلت معاها وفتحت قناة الجزيرة، لقيت مافيش أي حاجة غريبة وكله ماشي عادي، حتى فيصل القاسم كان شغال وقتها
دخلت على جوجل برضو مافيش أي خبر، وكل الحاجات اللي على النت كانت عن علاقته بكاسترو وطموحاته الثورية
اتصلت بواحد اعرفه في الأهرام العربي، لقيته قافل الموبايل، اتصلت بأستاذ آخر في القسم الدبلوماسي للأهرام قالي دي إشاعة ومفيش أي بيان رسمي بيها، ومش ناويين ننشر أي حاجة لحد ما الخبر يتأكد
جبت نمرة سفارة كوبا من الأجندة، وكل اما اتصل يقول لي الرقم مرفوع من الخدمة
نزلت على وسط البلد، حى القهاوى، وقابلت محمد هنيدي اللي كان معايا في الجامعة.. وكان معروف بانه الشيوعي الأخير في جامعة عين شمس عشان كان الوحيد اللي بيقول عن نفسه انه شيوعي، رغم انه كلهم دلوقت بيقولو على نفسهم يساريين، سألته : هو جيفارا مات فعلا ؟ ، قالي إنها خطة، وانه مصر هتشهد أحداث كبيرة جدا في خلال ساعات، بمجرد ما الجماهير تسمع انه جيفارا مات، وتعرف طريقة موته . الثورة هتقوم
سألته : طب هو مات ازاي؟؟
قال لي : كل البلد هتعرف انه جيفارا مات من التعذيب على ايد الحكومة
..
فاتت أيام وليالي، ومحصلش حاجة
هل جيفارا مات فعلا..؟؟

طب لو مات، يعني هتبقى المسألة انتهت كده والراجل راح على الفاضي؟ واذا كان ماماتشي.. يبقى مختفى فين طول المدة دي؟؟؟

الجمعة اللي فاتت الشيخ طلع على المنبر ونبه انه المفروض محدش يتكلم عن جيفارا، لأنه جيفارا هيظهر لما كلنا نعمل اللي علينا وناخد بالاسباب، وقال لا يعلم مكان جيفارا إلا الله، ونفى الكلام اللي بيتقال إنه في سرداب تحت الآرض، أو ان ربنا رفعه لحد ما يرجع تاني في آخر الزمان.. قال ان كل ده كلام فاضي، والمفروض نشتغل ونعمل اللي علينا لحد ما جيفارا يظهر لوحده

!!! واضح انه مفيش حد عارف حاجة عن جيفارا!!!

الأسئلة العشرة الأكثر صعوبة

من أغرب التاجز اللي عرفتها في حياتي، الحملة اللي اتعملت مؤخرا على اليوتيوب بين حبه شباب، تحت اسم : حملة الفلوج العاري
!! The Naked Vlog Campaign
الفلوج، أو التدوين بالفيديو، منتشر جدا على اليوتيوب، لكنه مش منتشر بين العرب، لأنه على ما يبدو انه اليوتيوب ارتبط عندنا بالكليبات الفضائحية، والصراعات الدينية، والتعذيب...الخ
كنت شفت كام كليب بالانجليزي لعرب بيدونوا فيديوهات، وشفت زمان حاجات مفيدة جدا، منها فيديو لواحد أكاديمي كان بيدون زي محاضرة، بس الصراحة مفهمتش حاجة
..
حملة التدوين العاري.. انك تدون كليب ليك تدعو فيه صحابك للحملة، وفي نفس الوقت تتكلم عن فوائد التعرى..!!
أنا شايف إنها حاجة مسخرة، العجيب انه الواحد قرا آراء زمان وسمع ناس بتتغزل في التعرى وفوائده، وفي فن تصوير العري
للأسف.. لم أصل إلى هذه الدرجة من الليبرالية، ولا هذه الدرجة من التقدم والرقي في التذوق، ما زالت قابع في واحات الرجعية
:-)
**
افتكرت الحملة الغريبة دي أو التاج الغريب ده، بمناسبة إنه بقى لي مدة مش بشوف تاجز في المدونات، شريف بعت لي حاجة جديدة، إنه كل واحد يصنع التاج والأسئلة بتاعته اللي محيراه، بس للأسف.. عشر اسئلة بس، دي بعض الأسئلة اللي مش لاقيلها اجابة واضحة

ـ 10ـ إضراب السادس من ابريل العظيم.. فكرة مين بالظبط ـ عايز اسم شخص واحد محدد ؟
ـ 9ـ إسراء عبدالفتاح اللي اعتقلت بسبب إنها كانت مديرة مجموعة إضراب ستة ابريل على الفيسبوك، مين اللي بلغ عنها؟؟

تحديث 17 - 4 : اختفاء إلى حين.. بعد قرار الافراج
ـ 8 ـ هل ممكن في يوم من الأيام نكتشف أن شعبان عبدالرحيم كان بيغني بأوامر عليا من فوق، لأغراض أمنية ؟؟

تحديث 17 - 4 : خبر عن شعبولا.. تم نشره بعد هذا السؤال
ـ 7 ـ في الزمان اللي بيشوف فيه كتير من الأكاديميين إنه الدراسات العليا والماجستير والدكتوراه مجرد فرص لشباب متخبط، وبنات لسه متجوزتش.. ليه بيقبلوهم بقى أصلا؟؟ مش مكسوفين من الموقف المتناقض ده؟؟
ـ 6ـ هو ليه الأديب الأدباتي المثقف المناضل (أوصاف لسوبرمان قلما يتكرر) لازم يبقى متحرر إلى درجة التهتك؟؟
ـ 5 ـ سؤال شخصي : ليه فيه زميلة ليا افتكرتني ملحد، واتفاجئت لما قولتلها إني مؤمن جدا؟؟
ـ 4 ـ ليه الناس اللي من شبرا بيبقى أغلبهم جدعان بجد؟؟ ده بعيد عن اني أصلا من شبرا :-)
ـ 3 ـ إزاي ممكن الواحد يتعامل مع بنت من غير ما تفهمه غلط ؟؟

ـ 2 ـ الناس اللي بتتصور إنه تغيير/إقصاء الحكومة هو الحل.. هل هما متصورين انه الشعب طاهر ونضيف، وانه أي حد هيبقى في المنصب غير رجال السلطة الحاليين هيبقى كويس؟؟ ولا هما مخنوقين وخلاص؟
ـ 1 ـ ليه في حالة هوس بين الشباب والبنات ثم بين الأهل حوالين الجواز، واللي اتجوز واللي لسه ماتجوزش!؟ هو ده دليل عفة، ولا تطفل، ولا فراغ ولا إيه؟؟

..

الدعوة عامة: لطرح الأسئلة العشرة الأكثر صعوبة

أديب شاب.. صحافي شاب.. ناشط شاب

أسئلة غير مبررة تلك التي ألقيتها عليه، كانت كافية لأن يقلب عليِّ طاولة المقهى.. لكنه اكتفى بابتسامة غامضة ترجمها فيما بعد إلى أفعال عظيمة

**

السؤال الأول: من أين يحصل الأديب الشاب على قوت يومه، ومصاريف معيشته، في الوقت الذي يكتفي فيه بمراقبة الطريق على نفس المقهى منذ عدة سنوات؟

السؤال الثاني: من أين حصل هذا الناشط الشاب على ثمن هذا الجاكت الفخم الذي يتفاخر بأن ثمنه يتجاوز الستمائة جنيه؟

السؤال الثالث: من أين ينفق الصحافي الشاب على سهراته الصاخبة وهو يحصل ـ حسب ادعاءه ـ على أربعمائة جنيه شهريا فقط؟

**

كانت اجابة الأسئلة الثلاث مجرد ابتسامة حمقاء.. وصمت مهيب، هكذا ظننت في البداية، حتى وصلني رده عمليا من مكتب رئيسنا الوقور، كان درسا لن أتعلمه أبدا، أكد لي أن إجابات أسئلتي قد تتأخر، وقد تأتي من حيث لا أتوقع

**

لعلها كانت فرصة جيدة تعرفت من خلالها على صاحب الابتسامة الغامضة.. الأديب.. الصحافي.. الناشط..الــ...شششـاب

دعوة للمصارحة

تخيل أن شخصا يحاول صنع ثقب في جدار عملاق بواسطة سكين معدني صغير، أو يحاول إرشاد طائرة عملاقة ضالة بنور بطارية يد صغيرة.. الفكرة مستحيلة..!؟؟ لكن.. حين يجتمع الالاف، ربما تكون هذه هي بداية النهاية لهذا الجدار اللعين؟ وحين تجتمع الاف المصابيح بأضوائها الخافتة... ربما تهتدي الطائرة الضالة إلى ممر الهبوط.. ربما

هناك.. اختاروا جميعا صنع حوار ومصارحة، كبديل عن الصمت البغيض، عن نفسي أزعم اننا لا نعرف الكثير عن أنفسنا ولا عن جيراننا.. ولا عن من يسكنون معنا على نفس هذه الأرض، هي دعوة لسلوك جديد يعتمد على الصراحة العاقلة بدلا من الاستفزاز والمناطحة، محاولة للتعرف على أنفسنا وأفكارنا، كي نعيد تقييمها من جديد، ونفكر معا حول ما نقبله للآخرين، وما لانقبله من الآخرين، وما نقبله لأنفسنا وما لانقبله على أنفسنا

فكرة مبادرة "مصالحة ومصارحة".. جميلة، دفعتني إلى اجابة عشرات الأسئلة في دقائق معدودة، بالأسفل بعض هذه الأسئلة

متصالحون : شريف - ماريان - رامي - رامز - مينا - مريم - هاني

ـ هل ذهبت لبيت مسيحى قبل كده؟ و إيه كان شعورك لما شفت اللوحات و التماثيل الدينية المسيحية؟
ذهبت منذ زمن سحيق، وكان شعوري تجاه الصور والأيقونات المعلقة هو الاحساس بغموض المكان، وهو نفس احساسي لما بشرب عصير قصب عند محل حاطط صورة البابا شنودة، أو صورة جمال عبدالناصر أو صورة الشيخ الجعفري، بحس باحساس مختلف

ـ هل تتحرج من نطق كلمة مسيحى أمام المسيحيين أو المسلمين؟ لماذا؟

لا.. لا أتحرج لأنها كلمة لاتحمل اساءة أو إهانة، بل أتعمد ذكرها بدلا من كلمة قبطي التي أشعر أن بها شيء من التمييز غير المبرر، وكأنها كلمة تتناول شخصيات تاريخية

ـ لو نازل على السلم و لقيت جارك المسيحي يوم (عيد القيامة) خارج هو وعيلته لابسين جديد ومعيدين، حتقولهم إيه؟
صباح الخير.. وربما كل سنة وحضرتك طيب :)

ـ يعنى أيه كافر؟ (فى جملتين)ـ
غير مؤمن بأي ديانة سماوية، ومعادي للاسلام
ـ يعنى إيه غير مسلم؟ (فى جملتين)ـ
غير مؤمن بالاسلام، وغير مهتم بالتعرف الاسلام
ـ ما الذى يجمع المصريين مسلمين و مسيحيين؟ ـ وما الذى يفرقهم؟

يجمعهم الثقافة، الأصل، التاريخ، اللغة، المشاكل اليومية، وتجمعهم قبل كل شيء مصر، والايمان بالله، أما الذي يميزهم عن بعضهم البعض فأحيانا يكون المظهر الخارجي، إلى جانب الكنيسة والمسجد، لكن ما يفرقهم بمعنى التفريق، هو التعصب وضيق الأفق

ـ لو عرفت أن واحد أو واحدة من قرايبك تنصّر(ت)؟ ماذا سيكون شعورك و ماذا ستفعل؟
سأحاوره، واحاول أتعرف على اسبابه، ممكن تكون اسباب نفسية أو وقتية، أما بالنسبة لشعوري سأصاب بالدهشة كرد فعل أولي

ـ لوعندك قضية فى المحكمة يحكم فيها قاضي مسيحي يبقى فيه مشكلة؟

خالص.. ما دام القضية وصلت المحكمة يبقى أتوقع أي شيء أيا كانت ديانة القاضي، لأنه النظام القضائي اصابته مظاهر الفساد الاداري على حد زعم من تعاملوا معه
ـ هل التعامل مع المسلم أسهل من التعامل مع المسيحي؟ لماذا؟

لأ.. فيه مسلمين أو مسيحيين ممكن يكونوا من محافظات معينة ويبقى التعامل معهم صعب ومتعب، لكن اعترف ان فيه أنماط وشخصيات من المسيحيين بيكون التعامل معاهم صعب بسبب اختلافات الديانة، لأني قابلت منهم ناس ـ نسبة مش قليلة ـ بيبقى متحفز أو منغلق، ودي ظاهرة في المجتمع .. موجودة عند المسلمين، بس بتختلف محلامحها مع اختلاف الديانة

ـ لو دخلت مصر حرباً ، ينفع يحارب المسيحيين؟
طبعا مش بلدهم!؟
ـ المسيحيون يتبعون أمريكا و بيجيلهم فلوس منها؟
:)

السؤال ده خبيث، هو أكيد فيه ناس بتجيلها فلوس من أميركا ده أمر مفروغ منه، ومش شرط يكونوا مسيحيين
ـ القساوسة بيلبسوا أسود حزناً على دخول الإسلام مصر

أعتقد أنها شائعة من هيافات المجتمع المصري وميراثه النكد.. ده على حد علمي

ـ كيف تدعو المسيحيين للإسلام؟ ـ هل تفعل ذلك كثيراً؟
لما احس انه عايز يعرف عن الاسلام بتكلم معاه، لكن دي مش شغلتي أو نشاطي الرئيس في حياتي، بس بتكلم مع اللي عايز يعرف، وفي النهاية أهم شيء انه الانسان هو اللي يسعى للمعرفة وميعتمدش على حد الا في حدود ضيقة

ـ هل المسلم فى ماليزيا أو جنوب أفريقيا أقرب لك من المسيحى في مصر؟ لماذا؟
أقرب لي في الأمور الدينية، وان كان الآن كتير من الأمور ممكن تتعقد مع اقحام الثقافات في العبادات والفقه الديني

ـ "الناس سواسية كأسنان المشط" - هل ينطبق هذا على المسيحى و المسلم؟
طبعا

ـ تفتكر إن ليك حق فى البلد دى أكتر من المسيحى؟ لماذا؟
لأ.. بس ليا حق في انه تكون السياسة العامة مراعية للبعد الاسلامي، سواء على المستوى السياسي في علاقاتها بالدول الاسلامية وتعزيز هذه العلاقات أو حتى على مستوى الأمور الثقافية، البعد ده كان موجود دايما حتى قبل الثورة وفي عهد عبدالناصر، ومن حق المسلمين أنهم يعززوه، غير كده انا مليش حق أو فضل على اي حد مسيحي

ـ تفتكر من حق المسيحيين يعملوا مظاهرة لو مسيحي غير دينه للإسلام؟ لماذا؟
طبعا لأ.. لأنها غير مجدية أو مفيدة، بقدر ماهي مضرة وبتعمق الاحساس بالظلم وغالبا بتكون تحريضية، ثم ايه الهدف من هذه المظاهرة، أغلبها بيكون لتسليم البنت اللي اسلمت، وكإننا عايشين في مجتمع قبلي مش في دولة، ونفس الشيء أرفض المظاهرات الاسلامية اللي أغلبها بيكون من غير فائدة وأغلبها صراخ وعويل

ـ لو مسيحى ألقى طوبة على مسجد و كسر زجاجه حتعمل إيه؟

المفروض أبلغ الشرطة، لكن غالبا الجماهير بتتعامل مع المواقف دي، وهنا دوري اني اضع الموضوع في حجمه، لو حد كسر حاجة يصلحها وانتهت القصة، بعيدا عن ماورائيات الحدث، والتنقيب في الضمائر

ـ تفتكر من حق المسيحيين يبنوا كنائس زى ما هو عايزيين؟ كام كنيسة فى السنة؟
أيوه.. بس على شرط يكون ده متوائم مع ديمغرافيا الحي اللي هيتم البناء فيه، يعني ممكن حى ميكونش محتاج كنيسة هناك في حين حى آخر في مشكلة في عدد الكنائس
ـ لو بنى المسيحيين كنيسة فى الشارع اللى أنت ساكن فيه شعورك يكون إيه؟ و تعمل إيه؟
مفيش مشاكل معايا، بس هقلق لأني هتوقع مشاغبات من مسلمين، وبعض الاستفزاز من الشباب رواد الكنيسة، عشان الناس دلوقت بقت طباعها صعبة في مصر

ـ إيه شعورك لو الميكرفون فى المسجد صوته عالي؟

بضايق طبعا، وحصل قبل كده الموقف ده، وكنت سلبي لأني عارف مقدما موقف ادارة المسجد اللي كان بيزعج الناس ويخضهم بدل ما يجذبهم للصلاة، والمسألة اتحلت من داخل المسجد نفسه، لكن واحد ضيف زي حالاتي مش هيبقى ليه كلمة على حد هناك
ـ لو رايح تسكن فى بيت ولقيت كل سكّانه مسيحيين، تعمل إيه؟

هكلم صاحب البيت على الملحوظة دي، عشان اعرف اذا كانت صدفة ولا عن عمد ويكونوا مش مرحبين بحد مسلم يكون في العمارة، وهحاول اتعرف اكتر على السكان، عشان اعرف طباعهم، على فكرة فيه تجربة لأحد أقربائي كده، وعلاقتهم بالجيران أحسن ما يكون لكنهم من أجيال سابقة غير جيلنا المحبط

ـ إيه اللى بيعجبك فى المسيحيين؟ و أيه أكتر حاجة بتكرهها فيهم؟

احساس بعضهم بالاغتراب، لمست الاحساس ده أثناء بعض المعاملات، واقصد هنا من يعيشون الحياة مع احساس بالفردية لأن هذه الصفات تتواءم معي، وعلى العكس تماما أكثر ما أبغضه في بعض الشرائح المسيحية هو الانغلاق والتحفز، وانسحاق بعض الشرائح امام عقد الماضي واساطيره التي تحكم علاقاتهم بالآخرين، إلى جانب غياب الفردية لصالح مجموعة مرتبطة بالكنيسة فقط أو مرتبطة بثقافة الأهل على حساب رأيهم الشخصي أواندماجهم مع فئات أخرى من المجتمع .. وعلى فكرة هي أمور موجودة لدى المسلمين أيضا بصورة مختلفة وبدرجات متفاوتة

لمتابعة الاسئلة : مسلمين - مسيحيين

سؤالات واستفسارات

جاءتني هذه الأسئلة الجميلة من رامز العزيز.. ولعلها أخرجتني من مزاج متقلب، وأرجو أن تكون الإجابات خفيفة على قلب من يقرأها الآن
**
هل توافق علي حذف خانة الديانة من البطاقة الشخصية؟
..
لست أميل لحذفها، فهي في نظري إكسسوار جميل كان مشابها لخانة فصيلة الدم في البطاقة القديمة، وبوجه عام أعتقد أن الغرض من وجودها هو أسباب أمنية وإدارية، لأننا مجتمع يلعب فيه الدين دور كبييييير جدا

**
ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟
..
رأيي في المثليين أنهم شخصيات جديرة بالتأمل، وأشعر أن وراء كل واحد منهم-على الأرجح-مأساة إنسانية.. والمثلية في النهاية اختيار شخص، وأجد علاقاتهم غير مقلقة لأنها في الغالب تجري في سرية وبصورة غير معلنة، أما عن الاعتراف بهم.. فلا أدري كيف يتم الاعتراف بهم، هل المقصود تكوين كيان يضمهم، كاتحاد للمثليين العرب :-) ؟ أظن أن هذا في الغالب أمر من المستبعد حدوثه، وان كنت أعارضه من منطلقات أخلاقية لاتختلف كثيرا عن رفضي إباحة العلاقات الجنسية غير الشرعية أو تقنينها، بمعنى أنه لو أخطأ أحدهم فلنفسه، لكن عليه ألا يسعي لتقنين أو تبرير خطأه، وطبعا الأمر هنا يحتمل الكثير من الجدل السخيف حول ما أراه خطا وما يراه غيري خطا
وعموما.. لم يكن لي أصدقاء مثليين من قبل، وان كنت قد شككت في بعض من عرفتهم في فترة الجامعة من أنهم مثليين أو مصابين بالتخنث، إلى جانب اني شاهدت هذا النموذج في فترة الثانوى
**
هل تعتقد بوجود اضطهاد للمسيحيين في مصر؟
..
نعم.. هناك اضطهاد غير مقلق.. كما أنني أحسبه غير منظم أو مدبر
وأعتقد انه في زمن النفاق والخنوع والتأقلم والتعود على الباطل وغياب إحساس الفرد بذاته.. يصبح كل غريب أو مميز مقهورا تحت عبء الاضطهاد أو الرفض أو الاستبعاد
وهنا أريد أن أوضح أن الأمر ليس عن مسلمين يضطهدون مسيحيين كبعض الدعاية الفاشلة التي تحكي عن إبادة وما شابه، بل أعتقد أن المشكلة مصرية، والدليل على ذلك أن أجدادنا العظام في مصر المسيحية مالوا ميلة شديدة على الكفار الوثنيين، وأزعم أن المسلم إن وُجد وسط أكثرية مسيحية قد يقع ضحية نفس السلوكيات المتنمرة، وأزايد على نفسي وأقول أنه لو كان المسلمون أقلية عددية في مصر لكانوا هم محل الاضطهاد وقتها
الاضطهاد عموما ليس موجها للمسيحيين، لكنه موجه لكل من هو مختلف، أنا مسلم ممكن أتعرض لاضطهاد الإبل لو ظهرت كمختلف أو كمخالف، وممكن يكون ده نتيجة بعض الأفكار أو أسلوب المعيشة، وده شيء جربته، وربما غيري جربه كمان
دي مشكلة مصرية حقيقية، مش مشكلة دينية، وعموما المصريين ألطف من شعوب كثيرة أخرى.. لكنهم يعيشون الآن حالة من التردي
**
من هو الشخص الذي تختاره لرئاسة الجمهوريه؟
..
باراك حسين أوباما

:-)
وإذا ضغطت عليا وطلبت أن أرشح شخصية مصرية، فسأختار جمال مبارك وأنا مجبر، وذلك من منطلق إرجاء الفتن السياسية
وفي رأيي الشخصي أن مصر ليست في حاجة إلى هذا الهوس بالرئيس القادم، لكنها في حاجة إلى إنتاج أصحاب أفكار ورؤى تؤثر في جيل جديد نتخير منه من هم أفضل من جمال مبارك ومن ينافسونه سواء كانوا من المغضوب عليهم أو من الضالين
**
اذا قمت بتأسيس حزب سياسي ،فمن هم الأشخاص الذين سوف تضمهم للحزب ليشاركوك الحكم؟
..
هما هيشاركوني الحكم ولا الحزب؟ عشان أنا محدش يشاركني في الحكم أبدا، أنا اتوقراطي استبدادي، أما عن الحزب المزعوم، فليس لدي أسماء جاهزة لأن فكرة تأسيس حزب مرفوضة، لكني أعرف من يصلحون لهذه المهمة، فوقتها سأبحث عن الزهاد وأصحاب الشخصيات التجنبية والمخلصين، وابتعد عن المهووسين بالكراسي والمنافقين
**
هل توافق علي مشاركة الاقباط و الاخوان في حكم مصر؟
..
لا.. لا أوافق، من يريد أن يشارك في الحكم عليه يشارك بصفته أو بأفكاره السياسية ومشروعاته، وليس بهويته الدينية ولا حتى العرقية أو الإقليمية، طب واشمعنى النوبيين مبيشاركوش في الحكم، والصعايدة ملهومش مكان في الحكومات المتعاقبة وبقى كأننا في جمهورية شبين الكوم، وبعدين فيه كمان العرب والأشراف
على فكرة.. لو حد عايز ينسف مصر دي لجزيئات صغيرة ده ممكن.. نظريا، لكن واضح إن طبيعة البلد هي اللي بتمنع ده
**
ما هي افضل مدونه زرتها؟
..
كتير... مدونات مصرية وعربية، وحرام الواحد يقول أفضل مدونة، بس فيه مدونات بحب أعدي عليها على طول، زي مدونة جبهة التهييس.. دي أفيونة مسكنة لازم أعدي أشوف كتبت ايه خصوصا انها بتجيلي على الميل كمان
**
هل توافق علي الزواج من مطلقه؟
..
غالبا لأ.. بس هذا لايمنع احتمال حدوث هذه الزيجة المباركة، ليه لأ؟ أو على رأي الحلاق بتاعي لما غير اسم المحل بتاعه وخلاه
Why not?
مفيش مشكلة مع المطلقة إلا حاجة واحدة بس، هو التفكير في الأسباب اللي خلتها تطلق، حتى لو مظلومة، ايه اللي خلاها ترتبط بواحد حقير زي ده، رغم اني معرفوش شخصيا يعني
بس مع شخصية وسواسية زي حالاتي، الموضوع هيكون محتاج تقصى حقائق وده هيحصل مع أي واحدة لحد ما تقع الفاس في الراس

و ربَّ مطلقة خير من ألف عذراء

ده مثل عربي أنا مألفه دلوقتي حالا
**
اذا انجبت ولدين و بنتين ، فاي الاسماء ستختارها لهم؟
..
كمال ويوسف ، ومنى وماريا أو مريم
وغالبا اللي هيحصل انهم حيبقوا أسماء تانية خالص، بس غير الأسماء اللي بتحصل اليومين دول
أنا رغم اني كنت زمان مستثقل اسمي، إلا إني بحمد ربنا دلوقت وبشكر أسرتي العزيزة عليه بعد ما سمعت أسماء عيال لسه مولودين قريب حواليا.. أسماء اول مرة اسمعها في حياتي ومش عارف اذا كانت عربي ولا تركي ولا فارسي ولا عبري ولا ايه ده
**
هل تعتقد ان توريث الحكم في مصر سيحدث فعلا؟
..
هو التوريث موجود في مصر من ساعي البريد وكمساري السكة الحديد مرورا بالأكاديميين والأطباء انتهاء برئيس الجمهورية، ده واقع اجتماعي، وأظن إذا كنا بنتحدث عن السيد جمال مبارك، فهو لن يخرج عما يحدث في حياتنا اليومية، بس هي الصحافة بتحب تصنع مادة الناس تتسلى فيها وتظهر الخبر كإنه حاجة غريبة عشان الناس تستغرب وتندهش وتشتري
**
ما هو افضل انجاز لمبارك ؟ و ما هو اسوء سقطات حكمه؟
..
أنه لم يشعرنا بوجوده، وهو ما أظهر لدينا المجتمع الطبيعي، فظهرت طبيعة المصريين الحقيقية، خصوصا أنها كانت محكومة في عهد عبدالناصر بقيود، وفي عهد السادات بأجواء التحول، أما الآن فقد رست السفينة على الجودي.. وكما يقال كل واحد بان على أصله
.
أما أسوأ سقطات حكمه هي انه لم يقف وقفة تاريخية يُشهد فيها أفراد شعبه على حقيقتهم، لحظة المواجهة التي كان عليها أن تتم بعد ثورة يوليو، ولعل فكر السادات الذي أرسى فكر الرئيس العمدة أو السياسي القروي، قد مهد لهذا المجتمع الطبيعي الذي يسير بعفوية المجتمعات القديمة، لذا كان على الرئيس أن يوجه علماءه إلى تفكيك هذا المجتمع، ثم رسم صورة لما يجب أن يكون عليه، ثم يواجه الرئيس(الفيلسوف في هذه الحالة)شعبه بما لديه
لكن هذا لم يحدث ولن يحدث أبدا
**
لمن تمرر هذا التاج؟
..
لكن من مر من هنا ولديه مدونة، ولديه طاقة للإجابة الوافية

مصر بعد القنبلة النووية

أمنية غالية : أن أتمتع بالسير في مدينتي القاهرة بعيدا عن الزحام.. قبل أن تتوفاني الملائكة

**

أن أسير في طريق خال إلى وسط البلد.. فأرى كل أهالي القاهرة يتركونها لي وحدي

أن اسير وحدي دون رؤية شحاذين أو أمناء شرطة، أو باعة جائلين، فقط أنا والقاهرة

أن أستمتع بكنوز القاهرة وحدي دون صخب أو ازعاج أو تطفل

يقول أحدهم - وسأتعمد إخفاء هويته نظرا لغرابة رأيه - أن أغلى أمانيه هي أن تدك مصر بقنبلة نووية فيهلك في تلك الكارثة على الأقل 30 إلى 50 مليون مصري، فتكون تلك هي البداية لحل الكثير من أزماتنا المترتبة على كثافة السكان

ربما لن أقول مثل قوله.. ولن أتمنى هلاك ملايين المصريين، لكن سأدع خيالي يتصور هذا البلد وقد قل عدد سكانة إلى النصف أو الثلث أو الربع، ما أجملها من حياة!!

حول نفس الفكرة، يدور سؤال آخر.. ماذا إن هلك 40 او 50 مليون مصري.. هل ستتأثر الحياة كثيرا؟ لا أعتقد، هناك ملايين.. ربما أكون أحدهم - لاحظ تواضعي- ليس منهم أي فائدة، هذا إن لم أبالغ وأقول أن كل المصريين والعرب ليس منهم فائدة كبيرة، وغيابهم لن يفرق كثيرا مع بقية شعوب العالم

تصوير: عبدالرحمن مصطفى

عارف ومش عارف؟!

عارف لما يبقى حد عارفك وانت مش عارف انه عارفك، وهو عامل انه مش عارفك، وتكتشف انت بعدين انه كان عارفك وبيعاملك على الأساس ده؟

عارف لما تبقى عارف حد وهو عارفك، لكنك مش عايز تعرفه انك عارفه، ولا هو عايز يعرفك انه عارفك، وتعملوا انكوا مش عارفين بعض.. وده من غير سبب واضح؟

عارف لما تبقى عارف حد.. وهو مش عارفك، وانت تعمل انك مش عارفه، وتتعامل معاه كإنكم مش عارفين بعض؟

عارف لما تبقى انت وواحد مش عارفين بعض بس تعملوا انكم عارفين بعض عشان حاجة انتو عارفينها ؟

ده يبقى اسمه إيه؟؟

أ - استعباط
ب - انعدام شفافية
جـ - ذكاء اجتماعي
د – تخلف عقلي
هـ - اجابة أخرى

معاني

س1 : إيه معنى إنه البنات يلبسوا بنطلونات ضيقة والولاد يلبسوا بنطلونات واسعة ؟

جـ1 : عيب خلقي

س2 : إيه معني إنه هيئة النقل العام تدهن أتوبيساتها الخربانة بلون أخضر – مميز - وتعلي الأجرة ؟

جـ 2: عشان تحصِّـل تمن الدهان والبوية

س3 : إيه معنى إن واحدة كل ما أكلمها بالذوق - مضطر - تتصور إني معجب بيها فتترسم عليا وتخنقني وتعطلني ؟

جـ3 : عادي فيه ناس اتهبلت حضرتك

س4 : إيه معني إني مستحمل واحدة زي اللي فوق دي ومن شابهها ؟

جـ4 : ده لأني بخوض تجربة علمية، فلازم أكمل للآخر

س5 : إيه معنى إني أركب مع سواق تاكس، فيكرر عليا عبارة واحدة، هي هي.. خمس مرات ورا بعض بدون أي سبب أو مقدمات "العربية بتاكل بنزين يا عم الحاج"، "بتاكل بنزين يا عم الحاج"..الخ ؟

جـ5 : راجع الإجابة رقم3

س6 : إيه معنى إني بزهق بسرعة، وبالذات لو في مكان فيه تكلف..؟

جـ6 : لم أنل القسط الكافي من التدريب على التبلد والتناحة والنفاق

س 7 : إيه معنى إنه في يوم أركب 3 مواصلات عشان أروح الشغل الصبح، وأرجع في مواصلة واحدة؟

جـ 7 : النية ماكنتش سليمة وأنا رايح، واتعدلت وأنا راجع

س 8 : إيه معنى إنه أغلب الشباب على موقع فيسبوك متصورين بالمايوه ؟

جـ 8 : كلهم اشتركوا في الصيف

س 9 : إيه معنى إني أبقى عارف المفروض أعمل إيه عشان مستقبلي، ومش عارف أعمله ؟

جـ 9 : مفيش وقت يا عم الحاج

س 10 : إيه معنى إني أسأل الأسئلة دي وأنا عارف الإجابة مقدما ؟

جـ 10 : أصل دي حصة مراجعة

أسئلة من عند رشا

محاولة للتغيير.. جاتني الأسئلة دي من عند رشا

**

فلنبدأ

**
احب شخص لقلبك في الدنيا ؟

والدي
**
انسان مستعد تضحي بحياتك -ركز في كلمة حياتك - عشانه؟
هي ممكن تحصل بالصدفة إنه الواحد يضحي بحياته لحد، بس اني أتعمد اني أضحي بحياتي عشان حد، فمفيش حد في بالي، في رأيي أنه لو واحد جه قدره يبقى ربنا يرحمه، وهو مش مستني اني اضحي بحياتي

الحي أبقى من الميت

(إنها بشاعة التفكير العملي)

**
انسان كرهته لدرجه الجنون وتمنيت لو تمسك سكينه وتنقض عليه وتغرزها ف قلبه تقتله وتقف تبص لجثته وتشفي غليل قلبك؟
دلوقتي لا يوجد.. زمان كان ولد معايا في المدرسة وانا في أولى أعدادي، كنا بنكره بعض لله في لله، دي كانت آخر مرة كرهت فيها حد كده

**

ما هو اجمل كتاب قراته لبشر ومحتفظ به حتى الان ؟ انت متعلق بيه وبتقراه كل فتره؟

المسيح اليهودي ونهاية العالم- د.رضا هلال

**
اهم جهاز منزلي انت متعلق بيه او بتستخدمه كتير؟
الكمبيوتر، ثم الموبايل

**

شئ تحس بالراحه النفسيه لما تنظر اليه ؟
:) المشهد من فوق سطوح عمارتنا

**

مكان تحس فيه بالحنين الى شئ لا تدري ما هو وذكريات جارفة الى لا شيء؟
جامع السلطان حسن

**
اجمل مدينه زرتها داخل مصر؟
القاهرة أجمل مدينة رغم فظاعتها، بس حبيت المنيا، لأنها أنظف

**

اجمل مكان طبيعي رايته داخل مصر؟
أسوان (جزيرة النباتات) - والأجمل معبد أبو سمبل

**
شخصية كارتونية بتحبها؟
توم أند جيري

**

نوع هاتفك المحمول ؟

نوكيا

**
سرعة بروسيسور جهازك؟

مش عارف

**
حجم ذاكرة هارد جهازك؟
120 جيجا

**

المساحة التي تشغلها المواد الدينية على جهازك؟
مافيش..تقريبا قرآن بس، ونادرا لما اشغله على الكمبيوتر، عشان مش هسمعه وانا بعمل كذا حاجة

**
نفس المساحة السالف ذكرها ف قلبك-الاجابة لنفسك علشان الرياء يا اخوانا؟
المواد الدينية اللي في قلبي :)

لا يوجد مكان لشرائط شيوخ، أو حكم وقصص من نوعية الفتاة التي هلكت أثناء الشات، فقط أعتنق أوامر وغايات الدين

**
اهم هدف انت حاطه لحياتك دلوقتي؟
أيوه.. جينا للنكد، الحقيقة فيه هدف، إني أكمل مشواري المتقطع في البحث، لكن اللي عايش عشانه دلوقتي إني أستمر في شغلي الحالي المحبط رغم كل العواااائق اللي ضدي، وعلاقة الجفاء اللي بيني وبينه

**
مواصفات فتى احلامك؟
فتى أحلامي ؟؟؟؟

على أساس انه أنا

Gay

:S

فتاة أحلامي .. تكون ذكية، مش استعراضية أو مهووسة، الحياة مش ناقصة جنان، يكون عندها استعداد تتحملني، وتكون مؤمنة بيا زيادة عن اللزوم وتشجعني، ومخها ذكي، وليها شخصية، ,وأتمنى يكون عندها لمسة فنية

**

صف ما ياتي

**

شعورك لما تسمع كلمة مصر؟
بحس بأمل

لما تسمع كلام عن اليهود؟
عادي.. حسب الكلام هو إيه

لما تشوف ظابط شرطة ؟
بشعر بالضيق والغضب والتوتر والاستفزاز

**

لون البطانية اللي بتتغطى بيها ف الشتا؟
بني،

السؤال ده لازمته إيه ولا مؤاخذه، في الحر ده؟

**

لون الجورب او الشراب المفضل لديك؟
heheheh

أخضر وبأستك من فوق يا سعادة البيه

**

احساسك اذا داست رجلك ع مخلفات حيوانات- ولا مؤاخذة؟

:S

بنقرف قوي قوي قوي

على فكرة : سؤال مقرف

:)

**
افكارك تجاه شاب ماشي ف الطريق لابس جلابية بيضاء قصيرة وعمامة وله لحية وبجيبه سواك وف ايده مصحف؟
بفكر كيف كانت رحلته إلى أن وصل إلى هذا المظهر، والمراحل السابقة والتالية

**
احساس يراودك ف اشارة مرور مغلقة بسبب مسئول كبير ؟

الملل، التأمل، الترقب

**
مين اكتر ست اشخاص بتحبهم؟
ماما الله يرحمها، وبابا، وأخي، وجميع الأصدقاء

عادي كإني ببعت إهداء أغنية

لووووووول

**

هل انت سعيد؟
لأ.. عبدالرحمن

:)

**

لو اجتمعت انت وحسني مبارك ف مكان واحد هتعمل ايه؟
هدور على طريقة أسيب بيها المكان، عشان مش هعرف اتعامل معاه

**
لو معايا مليون ونص هتعمل ايه؟
لو معاك إنت ؟ :)

هو لو معايا انا، هستغلهم اني أسافر

**
بتحب مصر ؟
جدا

**

انت مسلم؟
واحد اسمه عبدالرحمن، هيبقى كونفشيوسي مثلا

hehehheh

**

ليه؟
عجبتني الحكاية، وناوي استمر فيها

:)

**
مين اكتر شخصية متقدرش تستغنى عنها ؟
أنا مقدرش أستغنى عني.. ونفسي أعرف استغني عني شوية، واعتمد على ناس تانية، لإن أنا كل حاجة في حياتي حاليا :(

**

ايه اكتر موقف محرج؟

إنك تتكلم عن ناس بطريقة مش لذيذة وتلاقي حد منهم جنبك ومصدوم فيك

ده موقف زبالة

**

الامنية اللي تتمنى تحققها؟
إني أترك حاجة مفيدة لحد من بعدي، وتحديدا علم ينتفع بيه

وده أمر صعب

**
التاج يتمرر لمين ؟
الصراحة الأسئلة طويلة أخاف حد يزعل، اني مررتهاله

ممكن أمرره لسمر، وولاء، وبحرينية

اذا حد حب يحله كنوع من التغيير، أو أي حد من الزوار اذا حابب يغير شوية.. بس احذفوا سؤال الجورب ده ، عشان أنا مش فاهمه

:D

حـ...ب إ..يــ... ـه ؟؟

وانا هناك ... فوق السحاب نظرت على الأرض، لقيت الدنيا صغيرة، دورت على ناس بيحبوني، معرفتش اذا كان فيه حد أو لأ، أو بمعنى أوضح مشفتش حد، كانت الصورة مش واضحة.

**

فكرت أنزل من على السحاب، واتمشى بين الناس، أتجول في الأسواق، واتقرب من خلق الله، مشوفتش حاجة برضه، ولما شفت مفهمتش .

**

يعني ايه حب؟؟

اهتمام.. احتياج.. نوع من القلق لغياب إنسان .

**

طب مين قال ان أي أعراض من دي ممكن تكون حب!؟

مين بيحبني؟؟ ومين بيحبك؟؟

وليه؟؟

هل هيستفاد شيء؟ هل أنا هستفاد شيء؟ هل هننضر في شيء؟

**

إيه اللي يخلي انسان يفكر في انسان..؟ ويحاول يساعده؟ وايه اللي يفرق حب عن التاني؟

من يؤمن بالحب؟

**

(فاصل)

**

وانا بتكلم في التلفون.. لقيت انسانة معرفهاش وقعت على الأرض جنبي، كإنها ماتت.. طالبة في الجامعة، لقيت نفسي خايف عليها وقلقان كإنها من أهلي وشيلتها وقعدتها، وحسيت برعب، رغم عدم اكتراث اغلب زمايلها.

الموقف ده كان بيحصل ساعات في الجامعة إني أشوف بنت وقعت من طولها فجأة كده، كنت بحس انه دلع....!

خدمة إنسان آخر، ومحاولة مساندته، عاطفة غريبة جدا.. خصوصا لما تكون مع حد مش واقع معاه في علاقة ........... حب !

المساعدة هنا كان ليها سبب، لكن الحب.....!؟

**

ممكن الواحد يحب أهله.. أو اصحابه.. أو ولاده.. أو زوجته.. أو زميلته

كل حب غير التاني .. لكن كله حب

أكيد فيه احتياج لدى الإنسان في كل الأنواع دي بيفرض على الإنسان الحب ده .

**

أنا بفكر.. وكل شوية هفكر، لاني من نوع من البشر لا يكترث بالحب

لكن يكترث بما وراءه .

(إيه الفلسفة دي!؟)

كنت هكتب وقلت مكتبش

كنت هكتب حاجة من يومين وقلت مكتبش.. أصل الحياة بقت مش لزيزة وممكن الواحد يحصل معاه مواقف مش لزيزة من ناس مش لزيزه..

قلت اكتب هنا برضو حاجة مش لزيزه

**

الجاي كله روابط، في زمن انعدمت فيه الروابط..

قصة إشاعة من موقع معارض